Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat x. Capittel.

1. Uanden Enghel die den boeck hielt welcken Ioannes att, ende verkondichde het eynde der werelt, 4. de stemme der seuen donderslaghen verseghelt.

A.1

ENde ick hebbe ghesien eenen anderen stercken Enghel vanden Hemel afkomen, die met een wolcke ommekleet was, ende de reghenbooghe was op zijn hooft, ende zijn aensichte als de Sonne, ende syne voeten als vyerighe pilaren.

2

Ende hy hadde in synen hant eenen open boecxken: ende hy sette synen rechteren voet op de Zee, ende den slinckeren op de Aerde.

3

Ende riep met luyder stemme ghelijck een leeuw briescht: ende als hy geroepen hadde, spraken seuen donderslaghen hare stemmen:

4

Ende doe de seuen donderslaghen hare stemmen ghesproken hadden, soude ickse gheschreuen hebben: maer ick hoorde een stemme wt den Hemel die tot my seyde: Verseghelt wat de vier donderslaghen ghesproken hebben, ende en schrijft se niet.

5

^a Ende de Engel dien ick sach staen op der Zee, ende op der Aerde, hief zijn hant op na den Hemel:

a Danielis 12.a.7

6

Ende swoer by den Leuenden van eewicheyt tot eewicheydt, die den Hemel ende wat daer in is geschapen heeft, ende de Aerde ende wat daer in is, ende de Zee ende wat daer in is, dat daer gheen tijt meer wesen soude:

7

Maer dat in de daghen der stemmen des se-

[fol. 93v]

uenden Enghels als hy basuynen soude, de verborgentheyt Gods soude veruult worden, ghelijck hy synen Dienaren den Propheten verkondicht heeft.

8

Ende de stemme die ick hoorde wt den Hemel, sprack wederom met my, ende seyde: Gaet ende neemt dat open boecxken dat in de hant des Engels is, die opter Zee ende opter Aerden staet.

9

Ende ick ghinck totten Enghel, ende seyde hem: Gheeft my dat boecxken: Ende hy seyde my: ^b Neemt ende eet dat, ende het sal dynen buyck bitter maken, maer in dynen mont sal het soete wesen als honich.

b Ezechielis 3.a.1

B.10

Ende ick nam dat boecxken wt der hant des Enghels, ende ick at het, ende het was mynen monde als soet honich: ende als ick het gheeten hadde, wert mynen buyck bitter.

11

Ende hy seyde tot my: Du moest wederom Propheteren, by volcken ende nacien, ende tonghen, ende vele Koninghen.