Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

1. Met het gheluyt des vijfsten ende sesten Enghels, 3. komen sprinckhanen op vanden put des afgronts, 15. de vyer Enghelen werden ontbonden, ende ruyters gesonden om de boose te straffen, 4. wtneminghe der geteeckenden.

A.1

ENde de vijfst Enghel heeft ghebasuynt, ende ick hebbe gesien dat een Sterre wt den Hemel gheuallen was op der Aerden: ende haer is de sleutel des puts des afgronts ghegheuen.

2

Ende sy heeft den put des afgronts opgedaen, ^a ende daer is roock ghekomen wt den putte, als roock eens grooten ouens: ende de Sonne is verduystert gheworden, ende de lucht vanden roock des puts.

a Apocal. 14.b.11 ende 19.a.3

3

Ende vanden roock quamen sprinchanen wt opter Aerden, ende hen wert macht ghegheuen gelijc de Schorpioenen der Aerden macht hebben.

4

Ende hen wert gheseyt: ^b dat sy het gras der Aerden niet en souden schadighen, noch yet dat groen is, noch eenighen boom: ^c maer alleenlick den menschen die het teecken Gods op haer voorhooft niet en hebben.

b Apocal. 7.a.3

c Ezech. 9.a.5.

5

Ende hen wert ghegheuen, niet dat sy se souden dooden, maer dat sy souden ghequelt worden vijf maenden: ende hare quellinghe [zy] gelijck de quellinghe des Schorpioens, als hy den mensche steeckt.

6

^d Ende in die daghen sullen de menschen de doot soecken, ende sullense niet vinden: ende sy sullen begheeren te steruen, ende de doot sal van hen vlieden.

d Apocal. 6.b.16 Esaie 2.b.19 Ieremie 8.a.3 Osee 10.a.8 Luce 23.c.29

7

^e Ende de gedaenten der sprinckhanen, [waren] ghelijck den peerden die ter oorloghe bereyt zijn: ende op hare hoofden, [waren] als kroonen ghelijck gout, ende hare aensichten ghelijck menschen aensichten.

e Exodi 10.a.4 Sapient. 16.a.9

8

Ende sy hadden hayr als vrouwen hayr: ende hare tanden, waren als leeuwen [tanden:]

9

Ende sy hadden borstwapenen ghelijck ijseren borstwapen: ende het gheruysch haerder vloghelen als waghens met vele peerden ter oorloghen loopende.

B.10

Ende sy hadden steerten ghelijck den Schorpioenen, ende in hare steerten waren prickels: ende hare macht was den menschen te schadigen vijf maenden.

11

Ende sy hadden ouer hen eenen Koninck, den Enghel des afgronts, ghenaemt in Hebreische, Abaddon, ende int Griecksche is hy ghenaemt ^f Apollyon.

f Dat is, Uerderuer.

12

Dat een wee is wech ghegaen: Siet daer komen noch twee ween na desen.

13

Ende de seste Enghel heeft ghebasuynt, ende ick hoorde wt de vyer ^g hoecken des gouden Altaers die voor God was, een groote stemme:

g Griecx, hoornen

14

Segghende totten sesten Enghel die de basuyne hadde: Ontbint de vier Enghelen die aen den grooten waterstroom Euphrates, ghebonden zijn.

15

Ende de vier Enghelen zijn ontbonden gheworden, welcke bereyt waren tot der vre, ende dach, ende maent, ende iaer om het derde [deel] der menschen te dooden.

16

Ende het ghetal der ruyterschen krijgheren [was] tweemael duysentmael hondert duysent: ende ick hoorde haer ghetal.

17

Ende also sach ick de peerden in het gesichte: ende die daer op saten, hebbende vyerighe ende peersche, ende sulphuren borstwapenen: ende de hoofden der peerden, als leeuwen hoofden, ende wt hare monden quam vyer ende roock, ende sulphur.

18

Ende van dese dry, is het derde [deel] der menschen ghedoot, vanden vyere, ende van den roocke, ende vanden sulphure dat wt haren monde ghinck.

19

Want hare krackt is in haren mont, ende in haren steerten. Want hare steerten zijn ghelijck slanghen, ende hebben hoofden, ende daer mede doen sy de schade.

C.20

Ende de andere menschen die niet ghedoot en zijn door dese plaghen, hebben hen niet bekeert van de wercken haerder handen, om niet te aenbidden de Duyuelen: ^h ende de gouden ende silueren, ende eernen, ende steenen, ende houten Afgoden, die noch sien, noch hooren, noch wandelen en konnen:

h Psalm.115.a.4 ende 135.b.15

21

Noch sy en hebben hen niet bekeert van hare dootslagen, noch van hare verghiftinghen, noch van hare hoererie, noch van hare dieuerie.