Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat viij. Capittel.

1. De openinghe des seuenden seghels, 3. de ghebeden der Heylighen gheoffert, ende de tempeesten verwect door den seluen Enghel, 6. seuen Enghelen met trompetten, 7. met het gheluyt van de vyer trompetten wort vyer ghesonden, 9. de Zee beroert, 11. de wateren bitter ghemaect, 12. ende de sterren verduystert, 13. dryerley wee verkondicht door eenen Enghel.

A.1

ENde als het den seuenden seghel opghedaen hadde, wert daer stilte inden Hemel ontrent een halue vre.

2

Ende ick sach de seuen Enghelen die voor den Heere staen, ende hen werden seuen trompetten ghegheuen.

3

Ende daer quam een ander Enghel, ende stont aen den Altaer, ende hadde een gouden wieroocvat, ende hem wert veel reuckwercks ghegheuen, om dat hijt [met] den ghebeden aller Heylighen ^a offeren soude, op den Altaer die voor den Throon was.

a Griecx, gheuen

4

^b Ende de roock des reuckwercx [met] den ghebeden der Heylighen, ghinck op van de handen des Enghels, voor God.

b Psalm 141.a.2

5

Ende de Enghel nam het wieroockvat, ende vulde dat vanden vyere des Altaers, ende wierp het in de Aerde: ende daer werden stemmen ende donderslagen, ende blixemen, ende aertbeuinghen.

6

Ende de seuen Enghelen die de seuen basuynen hadden, bereydden hen om te basuynen.

7

Ende de eerste Enghel heeft ghebasuynt, ende daer is gheworden haghel ende vyer, ghemengt met bloet: ende zijn op de Aerde gheworpen: ende het derde [deel] der boomen is verbrant, ende alle het groene gras is verbrant.

[fol. 93r]

8

Ende de tweedde Enghel heeft ghebasuynt, ende daer is als eenen grooten berch met vyer brandende, in de Zee gheworpen: ende het derde [deel] der Zee is bloet gheworden:

9

Ende het derde [deel] der leuende creatueren in der Zee, zijn ghestoruen, ende het derde [deel] der schepen is vergaen.

B.10

Ende de derde Engel heeft ghebasuynt: ende daer is gheuallen vanden Hemel een groote bernende Sterre, ende is gheuallen op het derde der waterstroomen, ende op de waterfonteynen.

11

Ende de naem der Sterre wert genaemt Alssen, ende het derde [deel] der wateren is alssen geworden, ende vele menschen zijn ghestoruen van de wateren, want sy waren bitter gheworden.

12

Ende de vierde Engel heeft ghebasuynt, ende det derde [deel] der Sonne wert gheslagen, ende het derde [deel] der Mane, ende het derde [deel] der sterren: so dat het derde [deel] van dien is verduystert geworden: ende het derde [deel] des daechs niet en luchtede, ende des nachts desghelijcks.

13

Ende ick sach, ende hoorde eenen ^c Engel vliegen midden door den Hemel, seggende met luyder stemme: Wee, wee, wee, den inwoonderen der Aerde, van de andere stemme der basuynen dier dry Enghelen die basuynen sullen.

c Anders, Arent