Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vij. Capittel.

3. Het groot ghetal der wtuerkorenen die bewaert worden inden dach der wrake Gods, 13. hare eerlickheyt ende troost.

A.1

ENde na desen sach ick vier Enghelen staen op de vier hoecken der Aerden, ende hielden de vier winden der Aerden, om dat gheen wint waeyen en soude op der Aerden, noch op der Zee, noch op eenighen boom.

2

Ende ick sach eenen anderen Enghel op komen vanden opganck der Sonnen, ende hadde den seghel des leuendigen Gods, ende riep met luyder stemme tot de vier Enghelen, den welcken de macht ghegheuen was der Aerden ende der Zee te schadighen,

3

Ende seyde: ^a Schadet der Aerden niet, noch der Zee, noch den boomen, ^b tot dat wy de Dienaren onses Gods ^c gheteeckent hebben aen hare voorhoofden.

a Apocal. 9.a.4

b Ezech. 9.a.4

c Of, verseghelt

4

Ende ick hoorde het getal der ghener die gheteeckent waren, vier hondert ende veertich duysent gheteeckende wt allen gheslachte der kinderen Israels.

5

Wt den gheslachte Iuda, twaelf duysent gheteeckent: wt den gheslachte Ruben, twaelf duysent gheteeckent: wt den geslachte Gad, twaelf duysent gheteeckent.

6

Wt den gheslachte Aser, twaelf duysent gheteeckent: wt den gheslachte Nepthali, twaelf duysent gheteeckent: wt des gheslachte Manasse, twaelf duysen gheteeckent.

7

Wt den gheslachte Simeon, twaelf duysent gheteeckent: wt den gheslachte Leui, twaelf duysent gheteeckent: wt den gheslachte Issachar twaelf duysent gheteeckent:

8

Wt den gheslachte Zabulon, twaelf duysent gheteeckent: wt den gheslachte Ioseph, twaelf duysent gheteeckent: wt den gheslachte BenIamin, twaelf duysent gheteeckent.

9

^d Na desen sach ick, ende siet, een groote schare die niemant tellen en konde, wt aller nacie ende gheslachte, ende volcke, ende tonge, die stonden voor den Throon, ende voor het Lam, bekleedt met langhe witte kleederen, ende [hadden] palmen in hare handen:

d 4. Esdre 2.e.42

B.10

Ende riepen met luyder stemme, segghende: De salicheyt [is van] ^e† onsen God, die op den Throon sit, ende [van] den Lamme.

e† Anders, hem die sit op den Throon onses Gods,

11

Ende alle de Enghelen stonden rontom den Throon, ende der Ouderlingen, ende der vier Dieren: ende zijn neder geuallen voor den Throon, op hare aensichten, ende hebben God aenghebeden,

12

Segghende: Amen: Segheninghe, ende eerlickheyt, ende wijsheyt, ende dancksegghinghe, ende eere, ende macht, ende kracht, [zy] onsen Gode van eewicheyt tot eewicheyt. Amen.

13

Ende een van de Ouderlingen seyde tot my: Wie zijn dese, die met langhe witte kleederen bekleedt zijn, ende van waer zijn sy ghekomen?

14

Ende ick seyde hem: Heere, du weetst het: Ende hy seyde my: Dese zijn de ghene die ghekomen zijn wt groote verdruckinghe: ende hebben hare kleederen ^f† ghewasschen, ende sy hebben hare kleederen wit ghemaect in het bloet des Lams.

f† Anders, ghebreedt

15

Hierom zijn sy voor den Throon Gods, ende dienen hem nacht ende dach in synen Tempel: ende die op den Throon sit, sal met hen woonen.

16

^g Sy sullen niet meer hongher lijden, noch sy sullen niet meer dorst lijden, noch de Sonne sal op hen niet vallen, noch eenighe hitte:

g Esaie 49.b.10

17

Want het Lam dat midden inden Throon is, salse hoeden, ende salse bewegen tot de leuende fonteyen der wateren, ^h ende God sal alle tranen van hare ooghen afwasschen.

h Esaie 25.a.8 Apocal. 21.a.4