Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

2. Wat ongheluck de vier peerden van verscheyden coleuren aenbrenghen, in het openen der vier seghelen des boecks, 9. het gheschrey der Martelaren, ende haer ruste, in de openinghe des vijfsten seghels, 12. de teeckenen ghesien in den Hemel, ende op der Aerden, in de openinghe des sesten seghels.

A.1

ENde ick sach, als het Lam een van de seghelen open ghedaen hadde, ende ick hoorde een van de vier Dieren spreken als de stemme eens donderslachs: Koemt, ende siet:

2

Ende ick sach, ende siet, een wit peert: ende die daer op sat, hadde eenen boghe: ende hem is een kroone ghegheuen, ende hy ghinck wt ouerwinnende, ende om dat hy ouerwinnen soude.

3

Ende als het den tweedden seghel gheopent hadde, hoorde ick het tweedde Dier spreken, Koemt, ende siet.

4

Ende daer ghinck een ander peert wt dat root was: ende den ghenen die daer op sat, is ghegheuen den vrede wech te nemen vander Aerden, ende dat sy malcanderen dooden souden, ende hem is een groot sweert ghegheuen.

5

Ende als het den derden segel gheopent hadde, hoorde ick het derde Dier segghen: Koemt ende siet, ende ick sach, ende siet, een swart peert, ende die daer op sat, hadde een waghe in syne hant.

6

Ende ick hoorde een groote stemme in het midden der vier Dieren, segghende: Een ^a mate tarwe voor eenen penninck, ende dry maten gherste voor eenen penninck, ende en doet der olye ende den wijn gheen schade.

a Griecx, Chenix

7

Ende als het den vierden seghel gheopent hadde, hoorde ick de stemme des vierden Diers segghen: Koemt, ende siet.

8

Ende ick sach, ende siet, een vael peert: ende die

[fol. 92v]

daer op sat, synen Naem was de Doot: ende de Helle volcht met ^b hem na: ende hen wert macht ghegheuen te dooden tot het vierde deel der Aerden, met den sweerde, met hongher, ende met de doot, ende door de Dieren der Aerden.

b Of, haer

9

Ende als het den vijfsten seghel gheopent hadde, sach ick onder den Altaer de zielen der verslaghenen om des woorts Gods wille, ende om het ghetuyghenisse dat sy hielden.

B.10

Ende sy riepen met luyder stemme, segghende: Hoe langhe ^c O heylighe ende warachtighe Heere, oordeelstu noch wreeckstu onse bloet niet van de inwoonders der Aerden.

c 3.Esdre 15.c.21 Apoc. 19.a.2

11

Ende eenen yeghelicken zijn witte kleederen ghegheuen, ende hen is gheseyt, dat sy noch eenen kleynen tijt rusten souden, tot dat oock hare mededienaers ende hare broeders veruult worden, die oock souden ghedoot worden, ghelijck al sy.

12

Ende ick sach als het den sesten seghel gheopent hadde, ende siet, daer is een groote Aertbeuinge gheworden: ende de Sonne is swart gheworden ghelijck eenen hayren sack, ende de Mane gheheel, is ghelijck bloet gheworden.

13

Ende de Sterren des Hemels zijn gheuallen op der Aerden, ghelijck de vijgheboom syne onrijpe vijghen af worpt, als hy van grooten winde gheschudt wort:

14

Ende de Hemel is wech gheweken ghelijck eenen brief die toegherolt wort, ende alle berch ende eylanden zijn verroert wt hare plaetsen.

15

Ende de Koninghen der Aerden, ende de Ouerste, ende de Rijcke, ende de Hooftmannen, ende de Machtighe, ende alle dienstbare, ende alle vrije verberchden henseluen in de speloncken, ende in de steenrotsen der berghen,

16

Ende seyden tot de berghen ende tot de steenrotsen: ^d Valt op ons, ende verbercht ons vanden aensichte des genen die op den Throon sit, ende vanden toorn des Lams:

d Esaie 2.b.19 Osee 10.a.8 Luce 23.c.29 Apocal. 9.a.6

17

Want de groote dach syner gramschap is ghekomen: ende wie kan staen?