Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Uanden ghesloten boeck gheopent door het Lam, 8. ende den lof dien hem de vier Dieren ende vierentwintich Ouderlingen gheuen voor hare verlossinghe: ende andere ghenaden door hem ontfanghen.

A.1

ENde ick sach in de rechterhant des ghenen die op den Throon sat, ^a eenen boeck geschreuen van buyten ende van binnen, ende verseghelt met seuen seghelen.

a Ezech. 2.b.10

2

Ende ick sach eenen stercken Enghel prediken met luyder stemme: Wie is weerdich den boeck open te doen, ende syne seghelen op te breken?

3

Ende niemant was machtich noch inden Hemel noch op der Aerden, noch onder der Aerden, den boeck open te doen, noch hem te besien.

4

Ende ick weende seer, dat niemant weerdich gheuonden was om dat boeck te openen ende te lesen, noch hem te besien.

5

Ende een van de Ouderlingen seyde tot my: Weent niet, siet, ^b de Leeuw wt den gheslachte Iuda ^c de wortel Dauids, heeft ^d ouerwonnen om den boeck open te doen, ende syne seuen seghelen op te breken.

b Gene. 49.a.9

c Esaie 11.b.10 Roman. 15.b.12 Apocal. 22 b.16

d Of, verkregen

6

Ende ick sach, ende siet, in het midden des Throons, ende der vier Dieren, ende in het midden der Ouderlinghen stont een ^e Lam, als gheslachtet, hebbende seuen hoornen, ende seuen oogen, de welcke zijn de seuen Gheesten Gods, in allen lande wtghesonden:

e Griecx, Lammeken

7

Dese quam, ende nam dat boeck wt der rechter hant des ghenen die op den Throone sat.

8

Ende als hy dat boeck ghenomen hadde, de vier Dieren, ende de vier ende twintich Ouderlinghen vielen voor dien Lamme, hebbende alle harpen, ende gouden Phiolen vol reuckwercx, welck zijn de ghebeden der Heylighen:

9

Ende sy songhen een nieuw liedt, segghende: ^f Du bist weerdich den boeck te nemen, ende syne seghelen te openen, want du bist gheslachtet, ^g ende hebst ons Gode weder gekocht met dynen bloede wt allen gheslachte ende tale, ende volcke, ende nacie:

f Apocal. 4.b.11

g Actuum 20.c.28 Ephe. 1.a.7 Colossen. 1.b.14 Hebr. 9.c.22 ende 10.b.10 1.Petri 1.b.19 1.Ioannis 1.a.7

B.10

^h Ende hebst ons ghemaect Gode tot Koninghen ende Priesters: ende wy sullen regneren op der Aerden.

h 1.Petri 2.a.9 Apoca. 1.a.6

11

Ende ick sach ende hoorde rondtomme den Throon, ende der Dieren, ende der Ouderlinghen, een stemme veler Enghelen, ende haer ghetal was ^{i k†} veel duysentichmael duysenden:

i Exodi 19.a.3 Danielis 7.b.10

k† Anders, duysentichmael hondert duyst, ende thienmael hondert duyst.

12

Segghende met luyder stemmen: ^l Het Lam dat gheslachtet is, is weerdich te ontfanghen de macht ende rijcdom, ende wijsheyt, ende kracht, ende eere, ende eerlickheyt, ende lof.

l Apocal. 4.b.11

13

Ende oock alle creatuere die inden Hemel is, ende op der Aerde, ende onder de Aerde, ende in der Zee, ende al wat daer in is, hoorde ick segghen: Hem die sit op den Throon, ende den Lamme zy lof, ende eere, ende eerlickheyt, ende kracht, van eewicheyt tot eewicheyt.

14

Ende de vier Dieren seyden: Amen. Ende de vier ende twintich Ouderlinghen vielen neder, ende aenbaden den Leuenden van eewicheyt tot eewicheyt.