Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxij. Capittel.

1. De eerlickheyt der gheloouighen. 14. bewijsinge van haer officie, 15. de straffe der boosen, 16. de weerdicheyt deser Prophecie, 8. aenbiddinghe gheweygert vanden Enghel, ende waerom, 17. vyerighe begheerte der gheloouighen van de toekoemste des Heeren.

A.1

ENde hy thoonde my eenen ^a suyueren stroom leuenden waters, klaer als Crystal, komende wt den Throon Gods ende des Lams.

a Ezech. 47.a.1 Zach. 14.a.8

2

In den midden van hare ^b strate, ende op beyde zijden des strooms [was] de boom des leuens, draghende twaelf vruchten, alle maenden geuende synde vrucht, ende de bladeren des booms [waren] tot ghesontheyt der Heydenen.

b Of, marckt,

3

Ende daer en sal gheen veruloeckinghe meer wesen: maer de Throon Gods ende des Lams sal in haer wesen, ende syne Dienstknechten sullen hem dienen:

4

Ende sullen zijn aensichte sien, ende synen naem [sal wesen] op hare voorhoofden.

5

^c Ende daer en sal gheenen nacht wesen, ende en sullen noch licht der keerssen noch der Sonne ghebreck hebben, want de Heere God licht hen: ende sy sullen regneeren van eewicheyt tot eewicheydt.

c Esaie 60.b.19 Zacharie 14.a.7 Apocal. 21.c.23

6

Ende hy seyde my: Dese woorden [zijn] ghetrouwe ende warachtich: ende God de Heere der heyligher Propheten, heeft synen Enghel ghesonden om synen Dienstknechten te toonen wat korts gheschieden moet.

7

Siet ick kome hastelick: ^d Salich [is hy] die de woorden der Prophecie deses boecx bewaert.

d Apocal. 1.a.3

8

Ende ick Ioannes [ben de ghene] die dit ghesien ende ghehoort hebbe: ende doe ickt gehoort ende ghesien hadde, viel ick neder om te aenbidden voor de voeten des Engels die my dit toonde.

9

Ende hy seyde tot my: ^e Siet dat du het niet en doest, want ick ben dijn mededienstknecht, ende dyner broederen der Propheten, ende der gener die de woorden dees boecx bewaren: Aenbidt God.

e Actuum 10.c.26 ende 14.b.14 Apocal. 19.b.10

B.10

Ende hy seyde tot my: Verseghelt de woorden der Prophecien deses boecx niet: want de tijdt is na by.

11

Wie onrecht doet, dat hy noch onrecht doe: ende wie beuleckt is, dat hy noch beuleckt worde: ende wie rechtueerdich is, dat hy noch rechtueerdich worde: ende die heylich is, dat hy noch heylich worde.

12

Siet ick kome haestelick, ende mijn loon [is] met my om ^f eenen yeghelicken te verghelden, ghelijck zijn werck wesen sal.

f Psalm. 62.b.13 Ieremie 17.b.10 ende 32.b.19 Matthei 16.c.27 Roman. 2.a.6 ende 14.b.12 1.Corinth. 3.a.8 2.Corint. 5.b.10 Galat. 6.a.5 Apocal. 2.c.23

13

^g Ick ben de α ende de ω, het Beghin ende het Eynde, ^h de Eerste ende de Laetste.

g Apocal 1.a.8 ende 21.a.6

h Esaie 41.a.4 ende 44.a.6

14

Salich zijn sy die zijn geboden houden: op dat hare macht zy aen den boom des leuens, ende [dat sy] ter poorten ingaen in de Stadt.

15

ⁱ Maer buyten [sullen wesen] de honden ende de toouenaers, ende hoereerders, ende de moorders, ende de Afgodendienaers, ende alle die leughen lief hebben ende doen.

i 1.Corint. 6.b.10 Galat. 5.c.21 Ephe 5.a.5 Coloss. 3.a.6

16

Ick Iesus hebbe mynen Enghel ghesonden om v dit in de Ghemeynten te betuyghen. ^k Ick ben de Wortel ende dat gheslachte Dauids, die luchtighe morghensterre.

k Esaie 11.b.10 Roman. 15.b.12 Apocal. 5.a.5

17

Ende de Gheest ende de Bruyt seggen, koemt. Ende wie het hoort, die segghe, Koemt. ^l Ende wie dorst heeft, die kome: ende wie wil, die neme dat water des leuens om niet.

l Esaie 55.a.1 Ioannis 7.d.37

18

Want ick betuyghe eenen yeghelicken die de woorden der Prophecie deses boecks hoort, ist dat yemant toe doet tot desen: God sal toe doen op hem de plaghen die in desen boecke geschreuen zijn.

19

^m Ende ist dat yemant af doet van de woorden des boecks deser Prophecie, God sal zijn deel af doen van den boecke des leuens, ende van de heylighe Stadt, ende van dat in desen boeck geschreuen is.

m Deuter. 4.a.2 ende 12.d.32 Prouer. 30.a.6

C.20

Hy seyt die dit betuycht: Ia ick kome haestelick: Amen. Ia, Koemt Heere Iesu.

21

De ghenade onses Heeren Iesu Christi [zy] met v allen. Amen.

Eynde des Nieuwen Testaments.