Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 91r]

DE OPENBAringhe Ioannis Theologi.

Dat Eerste Capittel.

1. De Maiesteyt ende officie des Soons Gods, 12. ghesichte der Candelaren ende sterren, ende daer in des Auteurs deser openbaringhe, ende tot wat eynde sy gheschreuen is, 17. Ioannes neder gheuallen, ende weder opgheheuen.

A.1

EEn ^a openbaringhe Iesu Christi, die hem God ghegeuen heeft, om synen Dienstknechten te toonen wat korts gheschieden moet: ende hy heeft ghesonden ende door synen Engel synen Dienstknecht Ioanni te kennen ghegheuen:

a Griecx, ontdeckinghe

2

De welcke het woort Gods betuycht heeft, ende het ghetuyghenisse Iesu Christi, ende al wat hy ghesien heeft.

3

^b Salich is hy die leeft, ende [salich zijn sy] die hooren de woorden deser Prophecie, ende bewaren dat daer in gheschreuen is: want de tijt is na by.

b Apocal. 22.a.7

4

Ioannes den seuen Ghemeynten die in Asia zijn: Ghenade [zy] v, ende vrede van hem ^c die Is, ende die Was, ende die Komen sal, ende van de seuen Gheesten die voor synen Throon zijn:

c Exodi 3.b.14

5

Ende van Iesu Christo, welcke die ghetrouwe ghetuyghe is, ^d de Eerstgheboren wt de dooden, ende de Ouerste der Koninghen der Aerden: hem die ons heeft lief ghehadt, ende van de sonden ghewasschen ^e in synen bloede,

d 1.Corint. 15.c.20 Colossen. 1.b.18

e Actuum 20.c.28 Hebr. 9.b.12.14 1.Petri 1.b.19 Apoca. 5.a.9

6

Ende heeft ons ghemaeckt ^f Koninghen ende ^g Priesters Gode synen Vader: Hem [zy] de eerlickheyt ende macht, van eewicheyt tot eewicheyt. Amen.

f 1.Petri 2.a.9 Apocal. 5.b.10

g 1.Petri 2.a.5 Roman. 12.a.1 Hebr. 12.c.28 Esaie 3.b.13

7

^h Siet, hy koemt met de wolcken, ende alle ooghe sal hem sien, ⁱ oock die hem doorsteken hebben: ende alle gheslachten der Aerden sullen ouer hem rouwich wesen, Ia, Amen.

h Danielis 7.b.10 Matthei 24.d.30 Actuum 1.b.11 1.Thessal. 1.b.10 2.Thessal 1.b.10 Iude b.14

i Zacharie 12.b.10 Ioannis 19.d.37

8

^k Ick ben de α ende de ω, [dat is,] het Begin ende Eynde seyt de Heere, die Is, ende die Was, ende die Komen sal, de Almachtighe.

k Esaie 41.a.4 ende 44.a.6 Apocal. 21.a.6 ende 22.b.13

9

Ick Ioannes uwe broeder, ende medegenoot in de verdruckinghe, ende in het Koninckrijcke, ende in de lijdsaemheyt Iesu Christi, was in het eylant ghenaemt Patmos,om des woorts Gods wille, ende om het ghetuygenisse Iesu Christi wille.

B.10

Ende ick was inden gheest op ^l den Sondach, ende hoorde achter my een groote stemme als eender basuynen,

l Of, dach des Heeren

11

Segghende: Ick ben de α ende ω, [dat is,] de Eerste ende de Laetste: ende wat du siest, schrijft [het] in eenen boeck, ende sendet den seuen Ghemeynten die in Asia zijn, tot Ephesen, ende tot Smyrnen, ende tot Pergamen, ende tot Thyatiren, ende tot Sarden, ende tot Philadelphien, ende tot Laodiceen.

12

Ende ick keerde my omme om de stemme te sien die met my gesproken hadde: ende als ick omghekeert was, sach ick seuen gouden kandelaren:

13

Ende midden onder de seuen kandelaren, eenen die des menschen Sone ghelijck was, bekleedt met eenen kleede tot de voeten, ende ommegort aen de borsten met eenen gouden gordel.

14

Ende zijn hooft, ende hayr [was] wit, ghelijck witte wolle, ghelijck sneeu: ^m ende zijn ooghen als de vlamme des vyers:

m Apocal. 19.b.12

15

Ende syne voeten ghelijck metael, brandende ghelijck in eenen ouen, ende zijn stemme gelijck een gheluyt van vele wateren.

16

Ende hy hadde in syne rechter hant seuen sterren, ende wt synen mont ghinck ⁿ een scherp tweesnijdich sweert: ende zijn aengesichte [blinckte] ghelijck de Sonne schijnt in hare kracht.

n Esaie 49.a.2 Ephes. 6.b.17 Hebr. 4.b.12 Apocal. 2.b.16 ende 19.b.15

17

Ende als ick hem sach, viel ick aen syne voeten als doot: Ende hy leyde zijn rechter hant op my, segghende tot my: Vreest niet: ^o Ick ben de Eerste, ende de Laetste,

o Esaie 41.a.4 ende 44.a.6

18

^p Ende die leue, ende hebbe doot gheweest, ende siet, ick ben leuendich van eewicheyt tot eewicheyt: Amen. ^q Ende ick hebbe de sleutels der Hellen, ende des Doots.

p Roman. 6.a.9

q Iob 12.b.14 Esaie 22.c.22 Apocal. 3.a.7

19

Schrijft dat du gesien hebst, ende dat is, ende dat hier na gheschieden sal.

C.20

De verborghentheyt der seuen sterren die du ghesien hebst in myne rechter hant, ende de seuen gouden kandelaers. De seuen sterren zijn ^r de Enghelen der seuen Ghemeynten: ende de seuen kandelaers die du ghesien hebst, zijn de seuen Ghemeynten.

r Malachie 2.a.7