Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE AL GHEmeyne Sendtbrief Iude.

4. Waerschuwinghe aengaende die verachtelick van God dencken ofte spreken, 8. haer ongemaniert leuen ende grouwelicke straffe, 20. ende vanden middel om hemseluen, ende andere te bewaren, 24. dancksegghinge.

A.1

IVdas een Dienstknecht Iesu Christi, ende Iacobi broeder: den gheroepenen die ^a door God gheheylicht, ende door Iesum Christum bewaert zijn:

a Griecx, in

2

Barmherticheyt, ende vrede, ende liefde worde v vermenichfuldicht.

3

Liefste, dewijle ick alle neersticheyt doe om tot v te schrijuen van [onse] gemeyne salicheyt, so heeft het my noodich gheweest tot v te schrijuen, om v te vermanen, dat ghy kampt voor het ghelooue dat eenmael den Heylighen ghegheuen is.

4

^b Want daer zijn sommighe Godloose menschen inghekropen, die in voortijden tot dit selue oordeel voorschreuen zijn, die de ghenade onses Heeren Iesu Christi misbruycken tot ^c wulpscheyt: ende God den eenighen Heere, ende onsen Heere Iesum Christum, verloochenen.

b 2.Petri 2.a.1

c Of, gheylheyt

5

Maer ick wil v vermanen die ghy dit eenmael weet, ^d dat de Heere, als hy het volck wt Egypten verlost hadde, wederom de ghene die niet en gheloofden verdarf:

d Numeri 14.b.17 Psalm. 106.c.25 Sapient. 1.b.11 1.Corinth. 10.b.10 Hebr. 3.b.17

6

^e Ende de Enghelen die haer beghin niet gehouden en hadden, maer hare woonstede verlaten hadden, met eewighe banden onder de duysternisse, ^f tot den oordeele des grooten daechs bewaert heeft:

e 2.Petri 2.a.4

f 2.Thessal. 1.a.5

7

^g Ghelijck Sodoma ende Gomorra ende de steden daer ontrent, die in ghelijcker wijse als sy ghehoereert hebben, ende ander vleesch na ghegaen zijn, tot een exempel ghestelt zijn, lijdende de straffe des eewighen vyers.

g Gene. 19.c.24 Deuter. 29.c.23 Esaie 13.b.19 Ieremie 50.e.40 Ezech. 16.e.49 Osee 11.a.8 Amos 4.b.11 Luce 17.c.29 2.Petri. 2.a.6

8

Desghelijcx nochtans dese [als] slapende, ontreynighen het vleesch, verachten de heerschappie, ende lasteren de eerlickheden.

9

Michael de Archangel, als hy teghen den Duyuel streedt, ende handelde van het lichaem Mosi, en derfte hem de schult der lasteringe niet oplegghen, maer seyde: ^h De Heere straffe dy.

h Zacharie 3.a.2

B.10

ⁱ Maer dese lasteren dat sy niet en weten, ende dat sy natuerlick weten, als de onredelicke beesten, daer in verderuen sy.

i 2.Petri 2.b.12

11

Wee hen, want sy zijn ^k Cains wech gegaen, ende ^l door ^m de verleydinge des loons Balaam henen ghestort: ende door de ⁿ teghensprekinghe Chore vergaen.

k Gene. 4.a.8 1.Ioannis 3.b.12

l Numeri 22.c.21 2.Petri 2.b.15

m Of, den verleydenden loon etcet.

n Num. 16.a.1

12

Dese zijn [als] smetten in uwe ghemeyne maeltijden mede ter maeltijt gaende, voedende henseluen, sonder vreese, ^o waterloose wolcken vanden wint ommeghedreuen, boomen die dorre, onuruchtbaer, tweemael verstoruen, ende ontwortelt zijn.

o 2.Petri 2.b.17

13

Wilde baren der Zee, hare eyghen schande opschuymende, dwalende sterren, den welcken de donckerheyt der duysternisse, inder eewicheyt bewaert wort.

14

Ende Enoch de seuende na Adam, heeft van hen te voren ghepropheteert, ende gheseyt: ^p Siet, de Heere is ghekomen met syne Heylighe legioenen,

p Danielis 7.b.10 Actuum 1.b.11 1.Thess. 1.b.10 2.Thessal. 1.b.10 Apoca. 1.a.7

15

Recht te doen tegen allen, ende om te straffen alle die onder hen godloos zijn, van alle hare godloose wercken die sy ongoddelick ghedaen hebben, ende van alle de wreetheyt die de godloose sondaers teghen hem ghesproken hebben.

16

Dese zijn murmureerders, klaghers, na hare begheerlickheden wandelende, ende ^q haren mont spreeckt hooueerdicheyt, sy ^r verheffen de persoonen om des profijts wille.

q Psalm. 17.b.10.

r Greecx, verwonderen

17

Maer ghy liefste, ghedenct der woorden die te voren gheseyt zijn van de Apostelen onses Heeren Iesu Christi:

18

Dat sy v gheseyt hebben: ^s Daer sullen inden laetsten tijt wesen bespotters, die na haer godloose begheerlickheden wandelen sullen.

s 1.Timot. 4.a.1 2.Timoth. 3.a.1 2.Petri 3.a.3

19

Dese zijn die ^t† afscheyden, vleesschelicke, gheenen Gheest hebbende.

t† Anders, hemseluen afscheyden

C.20

Maer ghy, lieue, timmerende v seluen op uwe alderheylichste ghelooue, biddende ^u door den heylighen Gheest,

u Griecx, in

21

Houdt ^x v seluen in de liefde Gods, verwacht de barmherticheyt onses Heeren Iesu Christi ten eewighen leuen:

x Of, malcanderen

22

Ende ontfermt v sommigher met onderscheyt:

23

Ende behoudt de sommighe ^y met vreese, ende grijptse wt den vyere: [nochtans] oock hatende den rock die vanden vleessche beuleckt is.

y Griecx, in

24

Hem die ^z† v machtich is van sonde te bewaren, ende onstraffelick voor syne eerlickheyt te stellen in vreuchden,

z† Anders, hen

25

[Namelick,] Gode onsen Salichmaker, die alleen wijs is, zy eerlickheyt ende hoocheyt, ende heerschappie, ende moghentheyt, nu, ende tot alder eewicheyt. Amen.