Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Door de liefde ende ghenade Gods voor Christum, vermaent hy tot rechtueerdicheyt ende liefde.

A.1

SIet hoe groote liefde heeft ons de Vader ^a bewesen, [namelick,] dat wy kinderen Gods ghenaemt worden: daerom en kent ons de werelt niet, want sy en heeft hem niet ghekent.

a Gr. ghegheuen,

2

Alderliefste, ^b nu zijn wy kinderen Gods, ^c ende het en is noch niet gheopenbaert wat wy wesen sullen: ^d maer wy weten als hy sal gheopenbaert zijn, dat wy hem sullen ghelijck wesen, want wy sullen hem sien ghelijck hy is.

b Esaie 56.a.4 Luce 20.d.36 Ioannis 1.b.12 Roman. 8.b.15 Galat. 3.c.26 ende 4.a.6

c Matthei 5.b.12 Roman. 8.b.18 2.Corinth. 4 b.17

d Philip. 3.c.21 Colos. 3.a.4

3

Ende een yeghelick die dese hope op hem heeft, die reynicht hemseluen gelijck hy reyn is.

4

So wie sonde doet, die ^e doet oock ongherechticheyt, ende ^f de sonde is ongherechticheyt.

e Of, ouertreedt oock de Wet,

f 1.Ioan. 5.b.17

5

^g Ende ghy weet dat hy gheopenbaert is, om dat hy onse sonden soude wech nemen, ^h ende in hem en is gheen sonde.

g Esaie 53.b.12 1.Timothei 1.b.15

h Esaie 53.a.9 2.Corinth. 5.c.21 1.Petri 2.c.22

6

Een yeghelick die in hem blijft, die en sondicht niet: so wie sondicht, die en heeft hem niet ghesien noch ghekent.

[fol. 89v]

7

Kinderkens, dat v niemant en bedrieghe: ⁱ wie rechtueerdicheyt doet, die is rechtueerdich, ghelijck hy rechtueerdich is.

i Roman. 2.b.13

8

Die sonde doet, is wt den Duyuel, want de Duyuel sondicht vanden beghinne: hier toe is de Sone Gods verschenen, om dat hy de wercken des Duyuels verderuen soude,

9

^k So wie wt Gode gheboren is, die en doet gheen sonde, ^l want zijn zaet blijft in hem, ende hy en kan niet sondighen, want hy is wt God gheboren.

k 1.Ioan. 5.b.18

l 1.Petri 1.c.23

B.10

Hier in zijn de kinderen Gods ende de kinderen des Duyuels openbaer: so wie gheen rechtueerdicheyt en doet, die en is wt God niet, ende die synen broeder niet lief en heeft.

11

Want dat is de bootschap die ghy vanden beghinne ghehoort hebt, dat ^m wy malcanderen souden lief hebben.

m Ioan. 13.d.34 ende 15.b.12 1.Ioannis 3.c.23

12

Niet ghelijck ⁿ Cain [die] wt den boosen was, ende doodde synen broeder: ende om wat oorsake doodde hy hem? ^o om dat syne wercken boos waren, ende zijns broeders [wercken waren] gherechtich.

n Gene. 4.a.8

o Sapient. 2.c

13

^p Verwondert v niet, broeders, ist dat v de werelt haet:

p Ioannis 15.b.18

14

^q Wy weten dat wy doorgebracht zijn wt de doot in het leuen, want wy hebben de broederen lief: wie synen broeder niet lief en heeft, die blijft in de doot.

q 1.Ioan. 2.b.10

15

^r So wie synen broeder haet, die is een dootslagher: ende ghy weet ^s dat gheen dootslagher het eewich leuen heeft in hem blijuende.

r Leuit. 19.b.17 Iacobi 5.c.20

s Matthei 5.c.21

16

^t Hier in hebben wy de liefde ghekent, dat hy zijn ^u leuen voor ons gestelt heeft: ende wy zijn schuldich voor de broeders het leuen te stellen.

t Ioannis 15.b.13 Ephes. 5.a.2

u Griecx, ziele

17

^x Maer wie het goet der werelt heeft, ende siet synen broeder ghebreck hebben, ende sluyt zijn herte van hem, hoe blijft de liefde Gods in hem?

x Deuter. 15.a.7 Luce 3.b.11 Iacobi 2.b.15

18

Mijn kinderkens, en laet ons niet lief hebben met den woorde, noch met der tonghe [alleenlick,] maer met de wercken ende waerheyt.

19

Ende hier aen bekennen wy dat wy wt der waerheyt zijn, ende maken onse herten gherust voor hem.

C.20

Want ist dat ons onse herte ^y wroecht, God is meerder dan onse herte, ende weet alle dinck.

y Of, verdoemt

21

Alderliefste, ist dat ons onse herte niet en wroecht, so hebben my een vertrouwen op God.

22

^z Ende al wat wy bidden, dat ontfangen wy van hem, want wy houden zijn gheboden, ende doen dat voor hem behaghelick is.

z Ieremie 29.b.12 Matthei 7.a.8 ende 21.c.22 Marci 11.c.24 Luce 11.a.9 Ioannis 14.b.13 ende 15.a.7 ende 16.c.24 Iacobi 1.a.5 1.Ioannis 5.b.14

23

^a Ende dit is zijn ghebot, dat wy in den naem zijns Soons Iesu Christi gheloouen souden: ^b ende malcanderen lief hebben, ghelijck hy ons een ghebot ghegheuen heeft.

a Ioannis 6.c.29 ende 17.a.3

b Leuit. 19.b.18 Matthei 22.d.39 Ioannis 13.d.34 ende 15.b.13 Ephes. 5.a.2 1.Thessal. 4.a.9 1.Petri 4.a.8 1.Ioannis 4.c.21

24

^c Want wie syne gheboden houdt, die blijft in hem, ende hy in hem: ende hier aen bekennen wy dat hy in ons blijft, wt den Gheest dien hy ons ghegheuen heeft.

c Ioannis 14.c.23 ende 15.b.10 1.Ioannis 4.b.12