Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Beschrijuinghe der boosheyt, ende verderuinghe der valscher Leeraers, ende hare Discipulen.

A.1

DAer hebben oock ^a valsche Propheten onder den volcke geweest: ghelijck oock onder v valsche Leeraers wesen sullen, die verderffelicke seckten inuoeren sullen, oock den Heere diese gekocht heeft, verloochenende, ende een haestighe verderuinghe ouer henseluen halende.

a Actuum 20.c.29 1.Timoth. 4.a.1

2

Ende vele sullen haer verderuinghen nauolghen, door de welcke de wech der waerheyt sal ghelastert worden.

3

Ende sy sullen door ghiericheyt met ghemaecte woorden ^b ghewin van v soecken, den welcken de verdoemenisse van ouer langhen tijt niet en vertoeft, ende haer verderffenisse en is niet slaperich.

b Of, koop handel van v doen,

4

Want ist dat God ^c de Enghelen, als sy ghesondicht hadden, niet ghespaert en heeft: maer heeftse met ketenen der duysternisse in de Helle gheworpen, ende ouerghegeuen tot het oordeel te bewaren:

c Iob 4.b.18 Iude a.6 Apoca. 2.a.2

5

Ende en heeft de oude werelt niet ghespaert, maer heeft ^d Noe den Prediker der rechtueerdicheyt zijn achster bewaert, brenghende de ^e diluuie ouer de werelt der ongherechtighen.

d Genes. 7.a.1

e Of, Suntuloet

6

Ende heeft ^f de steden Sodoma ende Gomorra tot asschen verbrandende ende ommekeerende, verdoemt, ende tot een exempel gheset den ghenen die namaels souden godlooslick leuen.

f Genes. 19.c.24 Deute. 29.c.23 Esaie 13.b.19 Ieremie 50.e.40 Ezechie. 16.e.49 Osee 11.a.8 Amos 4.b.11 Luce 17.c.29 Iude a.7

7

^g Ende heeft den rechtueerdighen Loth daer wt ghetoghen, die van de oncuyssche verkeeringhe der boosen vermoeyt was.

g Gene. 19.b.16 Sapient. 10.a.6

8

(Want die rechtueerdighe [man] woonende onder hen, ^{h i} heeft van daghe te daghe [zijn] rechtueerdighe ziele ghequelt, siende ende hoorende hare ongherechtighe wercken.)

h Psalm. 119.q.158

i Of, hebben sy gequelt

9

^k De Heere weet de godsalighe wt de versoeckinghe te verlossen: ende de onrechtueerdighe tot den dach des oordeels ter straffe te houden.

k 1.Corin. 10.b.13

B.10

Ende aldermeest de ghene die het vleesch volghende, in onreyne begheerlicheden wandelen, de heerschappie versmaden, [die] stout ende hardtneckichlick henseluen behagende, ende de heerlickheden niet en vreesen te lasteren:

11

Daer de Enghelen die meerder zijn van kracht ende macht, gheen lasterlick oordeel teghen hen en gheuen voor den Heere.

12

Maer dese, ^l als onredelicke beesten natuerlick beweecht, ghemaeckt om gheuanghen ende verdoruen te worden, ^m lasterende het ghene daer sy niet van en weten, sullen in haer eygen verderuinghe verdoruen worden:

l Ieremie 12.a.3

m Iude b.10

13

Ghekrijghende den loon der ongherechticheyt, als die de daghelicksche weelde voor ghe-

[fol. 88v]

noechte achten: vlecken ende smetten [zijnde] die in hare bedriegherien ghenoechte hebben, als sy met v brassen,

14

Hebbende de oogen vol ouerspels, onuerhinderlick van sonde, verlockende de wanckelbare zielen, ende hebbende het herte gheoeffent in giericheyt, kinderen der veruloeckinghe:

15

Die den rechten wech verlatende, zijn ghedwaelt, ⁿ volghende den wech Balaam des [soons] Bosor, de welcke den loon der ongherechticheyt lief ghehadt heeft:

n Numeri 22.c.21 Iude b.11

16

Maer hy heeft de straffinghe syner ongherechticheyt ghehadt, [want] dat stomme lastbaer Dier heeft met menschelicker stemme gesproken, ende des Propheten wtsinnicheyt verhindert.

17

^o Dese zijn Fonteynen sonder water, wolcken vanden stormwinde ghedreuen, den welcken de doncker duysternisse inder eewicheyt bewaert is.

o Iude b.12

18

Want sy seer opgheblasen ijdelheyt sprekende, verlocken door de begheerlicheden des vleeschs, ende wulpscheden, hen die ^p† recht ontuloden waren de ghene die in dwalinghe verkeeren,

p† Anders, een weynich

19

Belouende hen vrijheyt, daer sy selue dienstknechten der verderuinghe zijn: ^q want van wien yemant ouerwonnen is, diens dienstknecht is hy gheworden.

q Ioannis 8.d.34 Roman. 6.c.24

C.20

^r Want ist dat sy, na dien sy van de besmettinghe der werelt geuloden zijnde, door de kennisse des Heeren ende Salichmakers Iesu Christi, wederom in de selue verwerret zijnde, ouerwonnen worden, so is haer laetste ergher geworden dan het eerste.

r Matthei 12.e.45 Heb. 6.a.5.6 ende 10.c.26

21

Want het ware hen beter dat sy den wech der gherechticheyt niet gekent en hadden: dan dat sy hem bekennende, weder afkeeren van de heylighe ^s leere die hen ghegheuen is.

s Of, ghebot

22

Maer hen is gheschiet datmen met desen warachtighen spreecwoorde pleech te seggen: ^t De Hont is wedergekeert tot zijns selfs wtspousel, ^u ende de ghewasschen Seughe tot de wentelinghe in het slijck.

t Prouerb. 26.b.11

u Syrach 34.d.30