Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 88r]

DE TVVEEDDE alghemeyne Sendtbrief Petri.

Dat Eerste Capittel.

3. Petrus de ghenade Christi ghepresen hebbende, 5. vermaent de gheloouighe tot een recht Christen leuen, 12. beloeft hen synen arbeyt, 16. bewijst de sekerheyt des Euangeliums, 19. ende den middel om in de Schrift profijt te doen.

A.1

^a† SYmeon Petrus een Dienstknecht ende Apostel Iesu Christi, den ghenen die euen dierbaren ghelooue met ons verkreghen hebben, ^b door de rechtueerdicheyt ons Gods ende Salichmakers Iesu Christi:

a† Anders, Simon

b Griecx, in

2

^c De ghenade ende vrede zy v vermenichfuldicht door de kennisse Gods, ende onses Heeren Iesu.

c Roman. 1.a.7 1.Petri 1.a.2

3

Ghelijck ons syne Godlicke macht alle dinck dat tot het leuen ende de godsalicheyt [noodich is] ghegeuen heeft, door de kennisse des ghenen die ons gheroepen heeft tot de eerlicheyt ende duecht:

4

Daer mede dat ons die seer groote ende eerlicke beloften ghegeuen zijn: ^d om dat ghy daer door soudt der Godlicker natuere deelachtich worden, de verderffelicheyt die in de werelt is door de begheerlicheyt, ontuloden zijnde.

d Esaie 56.a.4 Ioannis 1.b.12 Roman. 8.b.15 Galat. 3.b.16

5

Ende tot dit selue oock alle neersticheyt doende, bewijst hier toe duecht in uwen ghelooue: ende in de duecht wetenschap,

6

In de wetenschap, maticheyt: in maticheyt lijdsaemheyt: ende in lijdtsaemheyt goduruchticheyt:

7

Ende in de goduruchticheyt, broederlicke vriendelickheyt: ende in broederlicke vriendelicheyt, liefde.

8

Want als ghy dese [dinghen] hebt, ende daer in oueruloedich zijt, sy sullen v niet ledich noch onuruchtbaer laten tot de kennisse onses Heeren Iesu Christi.

9

Want die dese niet en heeft, ^e die is blindt, ende tastet met der hant na den wech, ende heeft de reyninghe syner ouder sonden vergheten.

e Esaie 59.b.10

B.10

Daerom, broeders, weest lieuer neerstich om uwe beroepinghe ende verkiesinghe vast te maken: want als ghy dat doet, sult ghy te gheenen tijde struyckelen.

11

Want also sal v rijckelick den inganck in het eewighe Konickrijcke onses Heeren ende Salichmakers Iesu Christi, toeghedient worden.

12

Daerom sal ick niet ^f ophouden v altijts sulcx te vermanen, hoewel ghy het weet, ende in de teghenwoordighe waerheyt versterckt zijt:

f Griecx, vergeten

13

Want ick achte het recht, so langhe als ick in desen ^g tabernakel ben, v met vermaninghe te verwecken,

g Dat is, lichame

14

^h Dewijle ick weet dat de aflegghinge mijns tabernakels haest koemt, ⁱ ghelijck onse Heere Iesus Christus my heeft te kennen ghegheuen.

h 2.Timot. 4.a.6

i Ioannis 21.b.18

15

Maer ick sal oock neersticheyt doen, dat ghy na mynen wtganck moecht altijts van sulcx gedachtenisse houden.

16

^k Want wy en zijn niet de konstighe fabulen na gheuolcht, als wy v onses Heeren Iesu Christi macht ende toekoemste, te kennen ghegeuen hebben, ^l maer wy hebben syner Maiesteyt aenschouwers gheweest.

k 1.Corint. 1.b.17 ende 2.a.1.4 ende 4.c.20 1.Thessal. 1.a.5

l Ioannis 1.b.14 Matthei 17.a.2 1.Ioannis 1.a.1

17

Want hy hadde van Gode den Vader eere ende eerlickheyt ontfanghen, dewijle dusdanige een stemme van de hoochweerdighe eerlickheyt tot hem gheschiedde: ^m Dese is mijn wel lieue Sone, inden welcken ick mijn welbehaghen ghenomen hebbe.

m Matthei 3.b.17 ende 17.a.5 Marci 1.b.11 ende 9.a.7 Luce 3.c.22 ende 9.d.35 Colossen. 1.b.13

18

Ende dese selue stemme hebben wy ghehoort als sy vanden Hemel quam, daer wy met hem waren op den heylighen berch.

19

Ende wy hebben dat ⁿ Prophetische woort, welck seer vast is, ende ghy doet wel als ghy daer acht op hebt, ^o als op een licht dat in een duyster plaetse schijnt, tot dat de dach aenlichte, ende de morghensterre opgae in uw herten.

n Of, vaste

o 2.Corint. 4.a.6

C.20

^p Dit eerst wetende, dat gheen Prophecie der Schriftuere, ^q wt eygener ingeuinge gheschiet.

p 2.Timot. 3.b.16

q Of, gheen eygen wtlegginghe toe behoort.

21

Want de Prophecie en is voortijden niet door menschen wille ghegheuen: maer de heylighe menschen Gods hebbense ghesproken, ghedreuen zijnde vanden Gheest Gods.