Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Uan het officie der Pastooren, 5. ende der Iongheren, 8. beschrijuinghe des Duyuels, ende de middel om hem te wederstaen, 10. ghebet voor de gheloouighe, 13. groetenissen.

A.1

DE Ouderlinghen die onder v zijn, vermane ick die een mede Ouderlinc ben, ende ghetuyghe des lijdens Christi, ende oock deelachtich der eerlickheyt die gheopenbaert sal worden,

2

^a Weydt de kudde Gods ^b die onder v is, die besorghende niet als wt bedwanck, maer ghewillichlick: noch om vuyl ghewins wille, maer met een beweecht herte:

a Actuum. 20.c.28

b Of, so veel in v is,

3

^c Noch als heerschappie voerende ouer het volck dat v beuolen is, ^d maer als die der kudde een voorbeelt gheworden zijt.

c 2.Corint. 1.c.24

d 1.Timot. 4.b.12 Titi 2.a.7

4

Ende als de ^e Ouersteherder verschijnen sal, ^f dan sult ghy de onuerwelckerlicke kroone der glorien behalen.

e Esaie 40.b.11 Ezechie. 34.c.23 Ioannis 10.b.11 Hebr. 13.c.20

f 1.Corinth. 9.c.25 2.Timothei 4.a.8 Iacobi 1.b.12

5

Desghelijcx ghy Iongers, weest den ouderen onderdanich, ^g ende weest alle malcanderen onderdanich, weest met de ootmoedicheyt verciert, ^h want God wederstaet den hooueerdigen, maer den nederighen gheeft hy ghenade.

g Roman. 12.b.10 Philip. 2.a.3

h Prouerb. 3.d.34 Iacobi 4.a.6

6

ⁱ Vernedert v dan onder de krachtighe handt Gods, op dat hy v verhooghe te syner tijt.

i Iob 22.c.29 Prouerb. 29.c.23 Matthei 23.b.12 Luce 14.b.11 Iacobi 4.b.10

7

^k Worpt alle uwe sorchfuldicheyt op hem, ^l want hy draecht sorghe voor v.

k Psalm. 55.c.23 Matthei 6.c.25 1.Timoth. 6.a.8

l Sapient. 12.b.13

8

^m Weest nuchteren, waeckt, want uwe wederpartije de Duyuel gaet omme als een briesschende leeuw, soeckende wien hy verslinde:

m Iacobi 4.a.7 Luce 22.d.31

9

ⁿ Wederstaet hem, vast zijnde in het ghelooue, wetende dat het selue v lijden in uwe broederschap die in de werelt is, volbracht wort.

n Iacobi 4.a.7

B.10

De God aller ghenade, die ons die wy een weynich tijts bedruct zijn, gheroepen heeft tot syne eewige heerlickheyt in Christo Iesu, ^o die selue volmake, beuestighe, verstercke, ende sondere v.

o Hebr. 10.d.37 1.Petri 1.a.6

11

Hem zy de eerlickheyt ende macht van eewicheyt tot eewicheyt. Amen.

12

Door Siluanum uwen ghetrouwen broeder, also ick achte, hebbe ick een weynich gheschreuen, vermanende ende betuyghende, dat dit de ghenade Gods is, daer ghy in staet.

13

V groet de mede wtuerkoren [Ghemeynte] die in Babylonia is, ende Marcus mijn sone.

14

^p Groet malcanderen met den heylighen kusse. Vrede zy v allen die in Christo Iesu zijt. Amen.

p Roman. 16.b.16 1.Corinth. 16.c.20 2.Corinth. 13.b.12 1.Thess. 5.c.26