Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

1. Hy vermaentse tot de vruchten der wedergheboorte, 12. ende tot lijdtsaemheyt.

A.1

DEwijle dan Christus voor ons inden vleessche gheleden heeft, ^a so wapent ghy v vock met ^b dat selue gheuoelen, [namelick,] dat ^c wie inden vleessche gheleden heeft, die heeft ^d afghehouden van der sonde,

a Heb. 12.a.1

b Of, ghedachte

c Roman. 6.a.7

d Griecx, gherust

2

^e Om nu niet na menschelicke begheerlickheden, maer na Gods wille, den tijt die noch ouer is, te leuen.

e Roman. 14.a.7 2.Corint. 5.b.15 Gala. 2.c.20 Ephes. 4.c.24 1.Thessal. 5.b.10 Hebr. 9.b.14

3

^f Want het is ons ghenoech dat wy den voorgaenden tijt des leuens der Heydenen wille ghedaen hebben, wandelende in wellusten, begheerlickheden, dronckenschap, brasserie, suyperie, ende grouwelicke afgoderie.

f Ephes. 4.b.17

4

Het welcke hen vreemde is, ende lasteren dat ghy niet mede en loopt in de selue ^g onghebonden ouerdaet:

g Griecx, wederstortinghe der ouerdaet.

5

De welcke sullen rekenschap gheuen, hem, die bereydt is te oordelen de leuende ende doode.

6

^h Want daer toe is oock ⁱ den dooden het Euangelium gepredict, op dat sy gheoordeelt worden na den mensche [dat is, aengaende] het vleesch, ende leuen na God, [dat is, door] den Gheest.

h Ioannis 5.c.25

i 1.Petri 3.b.19

7

^k Ende aller dinghen eynde is na by. ^l Weest dan nuchteren, ende waeckt tot ghebeden.

k Ioannis 2.b.18

l Luce 21.d.34

8

Maer voor al, hebt tot malcanderen ^m stercke liefde, ⁿ want de liefde bedeckt vele sonden.

m Griecx, wtgereckte

n Prouer. 10.b.12

9

^o [Weest] herberghich aen malcanderen, ^p sonder murmureren.

o Roman. 12.b.13 Hebr. 13.a.2.

p Philip. 2.b.14

B.10

^q Dient malcanderen een yeghelick na dat hy gaue ontfanghen heeft, als goede ^r wtdeylders der menigherley ghenade Gods.

q Roman. 12.a.6 2.Corinth. 8.b.12 Prouerb. 3.c.28

r Griecx, huysregeerders

11

^s Ist dat yemant spreeckt, [dat hy spreke] als Gods woort. Ist dat yemant dient, [die diene] als wt de kracht die God gheeft: op dat God in allen gepresen worde door Iesum Christum, de welcke heeft de eerlickheyt ende macht van eewicheyt tot eewicheyt. Amen.

s Ieremie 23.c.22

12

^t Lieue, laet het v niet vreemde zijn, als ghy door het vyer versocht wort, tot uwer beproeuinghe, als of v wat vreemdts gheschiedde:

t Esaie 48.b.10 1.Corinth. 3.b.13 1.Petri 1.a.7

13

Maer verureucht v daer in, dat ghy des lijdens Christi deelachtich zijt, op dat ghy in de openbaringhe zijnder eerlickheyt moecht verblijden ende verheughen.

14

^u Ist dat ghy in Christi name versmaedt wort, so zijt ghy salich, want de Gheest der eerlicheyt, ende [de Gheest] Gods rust op v, [de welcke] so veel hen aengaet, ghelastert wort: maer so veel v aengaet, ghepresen wort.

u Matthei 5.b.10 1.Petri 2.c.20 ende 3.b.14

15

Maer dat niemant van v en lijde als een dootslagher, of dief, of quaetdoender, of als een ^x die na ander lieden dinghen siet.

x Of, in een vreemt ampt grijpt.

16

Maer ist dat [yemant lijdt] als een Christen, die en schame hem niet, maer prijse God in desen deele.

17

Want het is tijt ^y dat het oordeel vanden huyse Gods beghinne: Ende ist dat het eerst van ons [beghint,] ^z wat sal het eynde wesen der ghener die den Euangelio Gods niet gelooft en hebben?

y Ieremie 25.c.29 Luce 23.d.30

z Luce 10.b.12

18

^a Ende ist dat de rechtueerdighe nauwelick salich wort, waer sal de Goddeloose ende sondaer verschijnen?

a Prouerb. 11.d.31

19

So dan, de gene die lijden na den wille Gods, dat sy hare zielen den getrouwen Schepper beuelen ^b met weldoen.

b Griecx, in goedadicheyt.