Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Hy vermaent de ghetroude van haer officie, 8. ende alle gheloouighe tot liefde, onnooselheyt, 14. ende lijdtsaemheyt, door het exempel ende de weldaet Christi.

A.1

DEsghelijcx ^a ghy vrouwen, weest uwen mannen onderdanich, op dat oock de ghene die den woorde niet ghehoorsaem en zijn, door de wandelinghe der vrouwen, sonder woort ghewonnen worden,

a Gene. 3.b.16 1.Corint. 14.d.34 Ephe. 5.c.22 Colos. 3.b.18 Titi 2.a.5

2

Als sy aenghemerct hebben uw goede wandelinghe in de vreese.

3

^b Der welcker vercieringhe zy, niet die wterlicke, in het hayrulechten, ende gout ommehanghen, of kleederen aendoen:

b 2.Timoth.2.a.9 Titi 2.a.3

4

Maer die verborghen mensche, [namelick,] des herten, [die ghelegen is] in de onuerderffelicke [vercieringhe] eens saechtmoedighen ende stillen gheests, de welcke kostelic is voor God.

5

Want also vercierden haer oock voortijden de heylige vrouwen, die op den Heere hoepten, ende waren haren mannen onderdanich:

6

Ghelijck Sara den Abraham ghehoorsaem was, ^c noemende hem heere: wiens dochters ghy gheworden zijt, als ghy wel doet, oock niet beureest zijnde met eenighe vreese.

c Gene. 18.b.12

7

Desghelijcx ghy mannen, ^d woont met haer met wijsheyt, gheuende haer eere als den krancsten vate, oock als medegenooten zijnde der ghenaden des leuens, op dat uwe gebeden niet verhindert en worden.

d 1.Corinth. 7.a.3

8

Ende eyndelick, ^e [weest] alle eens ghesint, hebt medelijden, hebt de broeders lief, weest barmhertich, vriendelick,

e Roman. 12.b.16 ende 15.a.5 1.Corint. 1.a.9 Philippen. 2.a.2 ende 3.b.16

9

^f Vergelt niet quaet met quaet, of versmaedtheyt met versmaedtheyt, maer seghent daer teghen, ende weet dat ghy daer toe gheroepen zijt, ^g om de segheninghe te beeruen.

f Leuitici 19.b.18 Prouer. 20.c.22 ende 24.c.29 Matthei 5.d.39 Roman. 12.b.17 1.Corint.6.a.7 1.Thess. 3.b.15

g Matthei 25.d.34

B.10

ⁱ Want wie het leuen wil lief hebben, ende goede dagen sien, ^k die stille zijn tonghe vanden quade, ende syne lippen dat sy gheen bedroch en spreken:

i Psalm.34.b.13

k Iacobi 1.c.26

11

^l Hy trede af vanden quade, ende doe goet, hy soecke vrede, ende iaghese na.

l Psalm. 37.c.27 Esaie 1.b.16 3.Ioannis b.11

12

Want de ooghen des Heeren [zijn] ouer de rechtueerdige, ende syne ooren tot haer ghebet: maer het aensichte des Heeren [is,] teghen de ghene die quaet doen.

13

Ende wie sal v quaet doen, ist dat ghy het goede nauolcht?

14

^m Maer ist dat ghy ooc yet lijdt om der rechtueerdicheyt, [so zijt ghy salich,] ⁿ ende vreest hare vreese niet, noch verschrickt niet:

m Matthei 5.b.10 1.Petri 2.c.20 ende 4.b.14

n Esaie 8.b.12 Ieremie 1.a.8 4.Esdre 15.a.3 Matthei 10.c.26

15

^o Maer heylicht den Heere in uwen herte, ^p ende weest altijts bereydt om te antwoorden

o Iob 1.c.21

p Psalm. 119.e.46 Actuum 4.a.8

[fol. 87v]

eenen yegelicken, die rekeschap van v begheert van de hope die in v is,

16

Met saechtmoedicheyt ende vreese, hebbende een goede consciencie: ^q op dat sy, daer in sy quaet van v segghen, als van quaetdoenders beschaemt worden, die uwe goede wandelinghe in Christo bedrucken.

q Titi 2.a.8 1.Petri 2.b.12.15

17

Want het is beter dat ghy weldoende lijdt, (ist dat de wille Gods wilt) dan quaetdoende.

18

^r Want Christus heeft oock eens gheleden voor de sonde, hy rechtueerdich voor de onrechtueerdighe: om dat hy ons tot God soude brenghen, ghestoruen na den vleessche, maer leuendich ghemaeckt na den Gheest.

r Roman. 5.a.6 Colossen. 2.b.13 Hebre. 9.b.15

19

In den welcken hy oock komende, heeft ghepredict den gheesten ^s die in de geuanckenisse [zijn,]

s 1.Petri 4.a.6

C.20

Als sy voortijden ^t onghehoorsaem waren, ^u doemen de lanckmoedicheyt Gods eenmael verwachtede in de daghen Noe, als de Arcke bereydt wert: ^x in de welcke weynighe, dat is, achte zielen behouden werden door het water:

t Gene. 6.a.5

u Gene. 6.b.14 Matthei 14.d.37 Luce 17.c.26 Roman. 2.a.4

x Genes. 8.b.18

21

^y Des welcken teghenbeelt de Doop, ons nu oock behoudt: ^z niet daer mede de vuylicheden des lichaems afghewischt worden, maer waerdoor de goede consciencie God vraecht, door de opstandinghe Christi,

y Ephes. 5.c.26

z Griecx, niet een aflegghinghe der vuylickheden des vleeschs, maer een beuraghinghe der goeder consciencien tot God.

22

^a De welcke is ter rechter hant Gods, opgheuaren zijnde ten Hemel, ende de Enghelen ende Machten ende krachten hem onderdaen zijnde.

a Ephe. 1.c.20