Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Hy vermaent de gheloouighe dat sy worden kinderen in het quade, 11. tot de vruchten der wedergeboorte, 13. tot ghehoorsaemheyt der Ouerheden, ende tot lijdtsaemheyt, 21. schilderende hen den Heere Iesum leuendichlick voor ooghen.

A.1

SO legt dan af alle boosheyt ende bedriegherie, ende gheueynstheden, ende nijdt, ende alle achterklappinghen:

2

^a Ende begeert die redelicke ende onuerualschte melck als kinderkens, die maer nu gheboren zijt, op dat ghy daer door opwasset,

a Roman. 6.a.4 1.Corint. 14.c.20 Ephe. 4.c.23 Colossen. 3.a.8 Hebr. 12.a.2 Matthei 18.a.3

3

^b So ghy anders ghesmaect hebt dat de Heere goedertieren is:

b Psalm. 34.a.9

4

^c Tot den welcken komende, die eenen leuendigen Steen is, vanden menschen wel verworpen, maer by Gode wtuerkoren ende dierbaer:

c Ephe. 2.c.20

5

Wort oock ghy selue als leuende steenen ghetimmert ^d tot een gheestelick huys, ^e ende heylich Priesterdom, ^f om gheestelicke offerhanden te doen, die Gode behaghen door Iesum Christum.

d Heb. 3.a.6

e Apocal. 1.a.6 ende 5.b.10

f Roman. 12.a.1 Hebr. 12.c.28

6

Daerom staet oock in de Schrift: ^g Siet, ick legghe in Sion eenen kostelicken ende dierbaren wtersten Hoecksteen, ende wie in hem gelooft, die en sal niet beschaemt worden.

g Esaie 28.b.16 Roman. 9.d.33

7

V dan die ghy ghelooft, is [hy] eerlick, maer den ongheloouighen is ^h de steen dien de timmerlieden verworpen hebben, het Hooft des hoecx gheworden,

h Psalm. 118.c.22 Matthei 21.e.42 Actuum 4.b.11.

8

ⁱ Ende een steen der aenstootinghe, ende een steenrotse der erghernisse, [namelick,] den ghenen die aen het woort stooten, onghehorsaem zijnde, daer sy oock ^k opgheset waren.

i Esaie 8.b.14 Roman. 9.d.33

k Of, toe

9

^l Maer ghy zijt een wtuerkoren gheslachte, ^m een Konincklick Priesterdom, een heylich volc, een verkreghen volck, om dat ghy soudt verkondighen de duechden, des genen die v wt der duysternisse geroepen heeft tot synen wonderlicken lichte.

l Exodi 19.a.5 Deuter. 7.a.6 ende 14.a.2 ende 26.b.18 Ephe. 1.b.15

m Apocal. 1.a.6 ende 5.b.11

B.10

ⁿ Die voortijden gheen volck en [waert] maer nu Gods volck [zijt:] die voortijden niet ontfermt en waert, maer nu ontfermt zijt.

n Osee 1.b.10 ende 2.c.23 Roman. 9.c.26

11

Lieue, ick vermane v als ^* wtlanders ende vreemdelinghen, ^o onthoudt v van vleesschelicke begheerlicheden die teghen de ziele strijden.

* Of als wreemde inwoonners ende landreysers,

o Roman. 13.b.14 Gala. 5.b.16

12

^p Ende houdt uwe wandelinghe eerlick onder de Heydenen: ^q op dat sy in het ghene dat sy van v segghen, als van quaetdoenders, ^r wt de goede wercken aenmerckende, God prijsen inden dach der besoeckinghe.

p Roman. 12.b.17 2.Corint. 8.c.21 Philip. 2.b.15

q Titi 2.a.8 2.Petri 3.b.16

r Matthei 5.b.16

13

^s So weest dan aller menschelicker ^t ordinancie onderdanich, om des Heeren wille, het zy den Koninck, als den Ouersten,

s Roman 13.a.1 Titi 3.a.1

t Griecx, creature

14

Het zy den Stadthouderen, als den ghenen die van hem ghesonden worden, tot wrake der quaetdoenders, ende tot prijs der goetdoenders.

15

^u Want also is de wille Gods, dat ghy met weldoen stopt de onwetenheyt der dwasen menschen.

u Titi 2.a.8

16

^x Als vrije, ende niet als de vrijheyt hebbende tot een decksel der boosheyt: maer als Dienstknechten Gods.

x Ioannis 8.d.32 Roman. 6.b.18 Galat. 5.a.1

17

^y Eert eenen yeghelicken. ^z Hebt het broederschap lief. Vreest God. ^a Eert den Koninck.

y Roman. 12.b.10 2.Petri 5.a.5

z Roman. 12.b.10 Ephe. 4.a.3 Heb. 13.a.1 1.Petri.1.c.22

a Matthei 22.c.21

18

^b Ghy huysknechten, weest met aller vreese den heeren onderdanich, niet alleenlick den goeden ende redelicken, maer oock den harden.

b Ephes. 6.a.5 Colossen. 3.c.22 1.Timothei 6.a.1 Titi 2.a.9

19

^c Want dat is ghenade, ist dat yemant om der ^d Godlicker consciencien wille swaricheyt verdraecht, lijdende tonrechte.

c 2.Corint. 7.b.10

d Griecx, consciencie Gods.

C.20

Want wat eere ist, ist dat ghy verdraecht als ghy ghesondicht hebbende, gheslaghen wordt? ^e Maer ist dat ghy verdraecht als ghy wel doet, ende nochtans te lijden hebt, dat is genade by God.

e Matthei 5.b.10 1.Petri 3.b.14 ende 4.b.14

21

Want hier toe zijt ghy geroepen, want Christus heeft oock gheleden voor ons: ^f ons een exempel achterlatende, om dat ghy syne voetstappen soudt nauolghen.

f Ioannis 13.b.14 Philippen. 2.a.5 1.Ioannis 2.a.6

22

^g Die gheen sonde gedaen en heeft, noch daer en is gheen bedroch in synen mont gheuonden:

g Esaie 53.a.9 2.Corinth. 5.c.22 1.Ioannis 3.a.5

23

^h Die als hy versmaedt was, heeft niet wederom gesmadicht: ende en dreychde niet als hy leedt, maer gaf het hem ouer, die recht oordeelt.

h Matthei 27.d.39 Ioannis 8.e.48.49

24

ⁱ Die onse sonden selue in synen lichame ghedraghen heeft op het hout, ^k om dat wy van der sonde ghescheyden, der rechtueerdicheyt leuen souden: door wiens wonden ghy ghenesen zijt.

i Esaie 53.a.4 Matthei 8.b.17

k Roman. 6.b.10

25

Want ghy waert ^l als dwalende schapen, maer ghy zijt nu bekeert tot den Herder ende ^m Toesiener uwer zielen.

l Esaie 53.a.6 Ezechielis 34.a.6 Luce 15.a.4

m of, Opsiender, Bisschop