Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

5. Hy bewijst de godloosheyt der bespotters der beloften Gods, 7. de maniere der eyndinghe der werelt, 11. ende van hem te bereyden, 16. ende wie sy zijn die de gheschriften Pauli ende andere misbruycken, 18. daer na danckt hy den Heere Iesum.

A.1

LIeue, ick schrijue v nu desen tweedden brief, waer in ick door vermaninghe uwe oprechte ^a herten verwecke,

a Griecx, sin ofte ghemoet

2

Dat ghy ghedachtich zijt der woorden die van de heylighe Propheten te voren ghesproken zijn, ende onse leere, die wy Apostelen zijn des Heeren ende Salichmakers:

3

^b Dat eerst wetende, dat in de laetste daghen sullen bespotters komen, die na hare eygen begheerlickheden sullen wandelen,

b 1.Timoth. 4.a.1 2.Timothei 3.a.1 Iude b.18

4

Ende segghen: Waer is de belofte syner toekoemste? want van dat de vaders ontslapen zijn, blijft alle dinck als vanden beghinne der scheppinghe aen.

5

Want willens en weten dese niet dat de Hemelen in langhe voorleden tijden waren door Gods woort: ende ^c de Aerde wt den water, ende in het water staende:

c Genes. 1.a.9

6

^d Waer door de werelt die doe was, oueruloeyt [zijnde] vanden water, vergaen is.

d Gene. 7.c.21

7

^e Ende de Hemelen die nu zijn, ende de Aerde zijn door zijn woort gheset, ^f ende worden behouden tot den vyere inden dach des oordeels ende verderuinghe der godloosen menschen.

e Psalm. 102.c.27 Esaie 40.a.8 ende 51.a.6 Hebre. 1.b.11 2.Petri 3.b.10

f 2.Thessal. 1.a.8

8

Maer weest niet onwetende van dit een dinc, lieue, dat eenen dach by den Heere is ghelijck duysent Iaren: ^g ende duysent Iaren ghelijck eenen dach.

g Psalm. 90.a.4 Syrach 18.a.8

9

De Heere en vertraecht de beloften niet, ghelijck sommighe meynen dat het traecheydt is: ^h maer hy is lanckmoedich ouer ons, ⁱ niet willende dat yemant vergae, maer [wilse] alle tot bekeeringhe ontfanghen.

h Esaie 30.b.15 Roman. 2.a.4

i Ezech. 18.c.22 1.Timothei 2.a.4

B.10

^k Maer de dach des Heeren sal komen als een Dief inder nacht, ^l in den welcken de Hemelen sullen met een sterck ghedruysch voorby gaen, ende de Elementen sullen branden ende vergaen: ende de Aerde ende de wercken die daer in zijn, sullen verbranden.

k Matth. 24.e.43 1.Thessal. 5.a.2 Apocal. 3.a.3 ende 16.b.15

l 2.Petri 3.a.7

11

De wijle dan dit al ^m vergaet, hoedanich behooren wy te zijn in heylighe wandelinghe ende godsuruchticheden,

m Gr. sal ontbonden werden,

12

Verwachtende ende hastighende tot den toekomenden dach Gods, ⁿ door den welcken de Hemelen ontsteken ende vergaen sullen, ende de Elementen branden ende smelten?

n Syrach 16.b.18

13

^o Maer wy verwachten nieuwe Hemelen, ende nieuwe Aerde na zijn belofte, waer in rechtueerdicheyt woont.

o Esaie 65.b.16 ende 66.c.22 Apoc. 21.a.1

14

Daerom lieue, die ghy sulcx verwacht, weest neerstich om onbesmet ende onstraffelick van hem beuonden te wesen in vrede:

15

^p Ende acht dat de lanckmoedicheyt onses Heeren salicheyt is, ghelijck oock onse lieue broeder Paulus na de wijsheyt die hem ghegheuen is, v gheschreuen heeft,

p Roman. 2.a.4

16

Ghelijck oock in alle Sendbrieuen, sprekende daer in van desen: In de welcke sommighe dinghen zijn swaer te verstaen, de welcke de ongheleerde ende onuaste, verdraeyen, ghelijck oock de andere Schriften tot haer eygen verderffenisse.

17

Ghy dan, lieue, dewijle ghy het te voren weet, so wacht v, dat ghy niet door der godlooser dwalinghe verleydt zijnde, van uwe vasticheyt af en valt.

18

Maer wast in de ghenade ende kennisse onses Heeren ende Salichmakers Iesu Christi. Hem zy de eerlickheyt, ende nu, ende ten eewighen daghe. Amen.