Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Uermaninghe tot de rijcke, ende tot de arme verdruckte, 13. hoemen hem dragen moet, so wel in tegenspoet als in voorspoet, 14. van de saluinge der siecken, 16. biechte, gebet, 19. de dwalende te rechte te brengen.

A.1

VVel aen ^a nu ghy rijcke, weent ende huylt ouer uwe ellendicheden, die v ouerkomen sullen.

a Prouerb. 11.c.28 Amos 6.a.1 Luce 6.c.24 1.Timot. 6.a.9

2

Vwe rijckdom is verrot, ende uwe kleederen zijn vol motten gheworden.

3

Vwe gout ende siluer is verroest, ende haren roest sal [teghen] v tot ghetuyghenisse wesen, ende als vyer uwe vleesch verteeren. ^b Ghy hebt in de laetste daghen schat vergadert.

b Roman. 2.a.5

4

Siet, de ^c loon der wercklieden die uwe ackers ghemaeyt hebben, den welcken ghy verkort hebt, roept: ende de stemmen des maeyers zijn ghekomen tot in de ooren des Heeren Sabaoth.

c Leuitici 19.b.13 Deut. 24.b.14 Iob 4.b.15

5

^d Ghy hebt leckerlick gheleeft op der Aerden, ende wellusten ghehadt, ghy hebt uwe herten gheuoedt als in eenen ^e feestdaghe.

d Iob 21.b.13 Luce 16.b.19.c.25

e Griecx, dage der slachtinghe.

6

Ghy hebt den rechtueerdighen veroordeelt, ende ghedoodt, die v niet en wederstaet.

7

So weest dan lanckmoedich, broeders, tot de toekoemste des Heeren. Siet, de Landtman verwacht de kostelicke vrucht des lants, ende is

[fol. 86v]

lanckmoedich daerouer, tot datse den vroeghen ende spadighen reghen ontfanghen heeft.

8

Weest ghy oock lanckmoedich, versterct uwe herten, want de toekoemst des Heeren naerdert.

9

Sucht niet teghen malcanderen, broeders, op dat ghy niet ^f gheoordeelt en wort. Siet, de Richter staet voor de deure.

f Of, verdoemt

B.10

Mijne broeders, neemt de Propheten tot een exempel des lijdens ende lanckmoedicheyt, de welcke [in] den naem des Heeren gesproken hebben.

11

Siet, ^g wy achtense geluckich die verdragen. Ghy hebt de ^h verdraechsaemheyt Iobs ghehoort: ende ghy hebt ghesien het eynde des Heeren, ^{i k} want de Heere is seer barmhertich ende medelijdich.

g Matthei 5.b.11

h Iob 1.c.21.22

i Numeri 14.b.18 Psalm. 103.a.8

k Of, dat

12

Voor alle dinghen myne broeders, ^l sweert niet, noch by den Hemel, noch by der Aerden, noch eenigen anderen eedt: maer uwe Ia, zy ia, ende [uwe] Neen, neen, op dat ghy niet en valt in gheueynstheyt.

l Matthei 5.d.34 2.Corinth. 1.b.18

13

Is daer yemant onder v in lijden? dat hy bidde: Is daer yemant goets moets? dat hy singhe.

14

Is daer yemant onder v kranck? dat hy de Ouderlinghen der Ghemeynte ontbiede, ende dat sy ouer hem bidden, ^m ende hem saluen met Olye inden naem des Heeren.

m Marci 6.b.13

15

Ende het ghebet des gheloofs sal den siecken helpen, ende de Heere sal hem op helpen: ende ist dat hy ghesondicht heeft, het sal hem vergheuen worden.

16

Belijdt malcanderen de misdaden, ende bidt voor malcanderen, op dat ghy ghesont wordet: want een krachtich ghebet des rechtueerdigen, vermach vele.

17

ⁿ Elias was een mensche sulcker beweghinghen onderworpen als wy, ende hy badt een ghebet dat het niet reghenen en soude: ende het reghende niet op der Aerden, dry Iaren ende ses maenden lanck.

n 1.Regum 17.a.1 Luce 4.c.25

18

^o Ende hy badt wederom, ende de Hemel gaf reghen, ende de Aerde bracht haer vrucht voort.

o 1.Reg. 18.e.45

19

Broeders, ^p ist dat yemandt onder v van der waerheyt gedwaelt is, ende hem yemant bekeert:

p Matthei 18.b.15

20

Die wete, dat de ghene die den sondaer van dwalinge zijns weechs bekeert, de ziele vander doot behoeden sal, ende ^q vele sonden bedecken.

q Of, veelheyt der etcet.