Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

4. De vrientschap der werelt strijdt tegen de vrientschap Gods, 6. den welcken men moet ghehoorsaem zijn, ende den Duyuel wederstaen, 11. sonder van malcanderen quaet te spreken, 13. ende hemseluen in alle dinghen ghedraghen inden wille des Heeren.

A.1

VVaer van koemt den twist ende strijdt onder v? Ist niet hier van, wt uwe wellusten die in uwe leden strijden?

2

Ghy begheert ende hebt niet. Ghy ^a benijdt ende begheert vyerichlick, ende kondt niet ghekrijghen. Ghy vecht ende strijdt, ende ghy hebt niet, daerom, dat ghy niet en bidt.

a Of, doodet

3

Ghy bidt ende en ontfangt niet, ^b daerom dat ghy qualick bidt, om dat ghijt in uwe wellusten verdoen soudt.

b Matthei 20.c.22 Roman. 8.c.26

4

Ouerspeelders ende ouerspeelderssen, en weet ghy niet dat de vrientschap des werelts vyantschap Gods is? ^c So wie dan der werelt vrient wil zijn, die wort Gods vyant ghestelt.

c Ioannis 15.b.19 Gal. 3.b.10 1.Ioannis 2.b.15

5

Of meynt ghy dat de Schrift ijdelick seyt: ^d De Gheest die in v woont, is gheneycht tot nijdicheyt.

d Gene. 6.a ende 8.c

6

Maer sy gheeft meerder ghenade [daer in,] dat sy seyt: ^e God wederstaet den hooueerdigen, maer den nederighen gheeft hy ghenade.

e Prouer. 3.d.34 1.Petri 5.a.5

7

Daerom weest God onderdanich, ^f wederstaet den Duyuel, ende hy sal van v vlieden.

f Ephes. 4.c.27 1.Petri 5.a.9

8

Naket tot God, ende hy sal tot v naken, reynicht de handen [ghy] sondaers, suyuert de herten [ghy] ^g twijffelmoedighe.

g Of, dobbel van herten.

9

^h Weest bedruckt ende droeuich, ende weent, laet uwe lachen in droefheyt veranderen, ende uwe blijschap in droeflicheyt.

h Luce 6.c.25

B.10

ⁱ Vernedert v voor God, ende hy sal v verhooghen.

i Iob 22.c.29 Prouer. 29.c.23 Matthei 23.b.11 Luce 14.b.11 ende 18.b.14 1.Petri 5.a.5

11

Broeders, spreeckt niet qualick van malcanderen: wie van synen broeder qualick spreeckt, ende synen broeder oordeelt, die spreect qualick van de Wet, ende oordeelt de Wet. Ende ist dat du de Wet oordeelest, so bistu gheen dader der Wet, maer een oordeelder.

12

Daer is een Wetgheuer die kan behouden ende verderuen: ^k Wie bistu die eenen anderen oordeelest?

k Roman. 14.a.4

13

Wel aen nu ghy die segt: ^l Heden of morgen sullen wy gaen tot die stadt, ende daer een Iaer blijuen, ende koopmanschap doen, ende winninghe doen:

l Luce 12.b.18

14

(Die ghy niet en weet wat morghen [gheschieden sal.] ^m Want wat is v leuen? want het is een damp die weynich [tijts] ghesien wort, ende daer na vergaet:)

m Esaie 40.a.6 Syrach 14.b.18 1.Corinth. 7.d.31 Iacobi 1.b.11 1.Petri 1.c.24 1.Ioannis 2.b.17

15

Waer voor ghy segghen soudt: ⁿ Ist dat de Heere wil, ende [ist dat] wy leuen, so sullen wy dit oft dat doen.

n Actuum 18.c.21 1.Corint.4.b.19 Hebr. 6.a.4

16

Maer nu roemt ghy van uwe hooueerdicheden, alle sulcken roem is boos.

17

^o Wie dan weet goet te doen, ende niet en doet, die heeft sonde.

o Luce 12.e.47