Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Hy verbiet de begheerte van anderen te oordeelen, 5. ende beschrijft so wel de eyghenschap der tonghe, 13. als der valscher ende warachtigher wijsheyt.

A.1

MYne broeders, ^a weest niet vele meesters, wetende ^b dat wy te swaerder oordeel sullen hebben.

a Matthei 23.a.6

b Ezech. 3.b.18 ende 33.a.6 Heb. 13.b.17

2

Want wy struyckelen alle in velen: ^c ist dat yemant in woorden niet en struyckelt, die is volmaeckt, ende kan oock gheheel zijn lichaem dwinghen.

c Syrach 14.a.1 ende 19.b.16 ende 25.b.11

3

Siet, wy steken den peerden toomen inden muyl, om dat wyse ons souden ghehoorsaem maken, ende wy buyghen het gheheele lichaem.

4

Siet oock de schepen hoewel sy so groot zijn, ende van harde winden ghedreuen: sy worden met eenen seer kleynen roere ommegheuoert, waer de beweghinghe des stierders wil.

5

^d Also oock de tonghe is een kleyn lidt, ende roemt groote dinghen, siet een kleyn vyer hoe ^e grooten bosch het ontsteeckt?

d Syrach 28.b.13

e Of, veel materie

6

De tonghe is oock een vyer, een werelt ^f vol ongherechticheyts. Also wort de tonghe in onse leden ghestelt, besmettende het gheheele lichaem, ontstekende ^g de gheschapen werelt, ende is ontsteken vander Helle.

f Griecx, der

g Of, den loop des leuens, Griecx, loop der gheboorten

7

Want de natuere aller Dieren ende vogelen, ende der kruypende beesten ende der Zeedieren, wort ghetemt, ende is ghetemt van der menschelicker natuere:

8

Maer de tonghe en kan gheen mensche temmen, [sy is] een onbedwingelick quaet, vol van dootlicken fenijne.

9

Door haer louen wy God ende den Vader: ende door haer veruloecken wy de menschen, ^h die na de ghelijckenisse Gods ghemaeckt zijn.

h Genes. 1.c.27 Sapient. 2.c.23

B.10

Wt eenen monde koemt segheninghe ende vloeck. Mijne broeders, het en betaemt niet dat het also gheschiede.

11

Gheeft oock een fonteyne wt eenen gate soet ende suer?

12

Mijne broeders, kan oock een vijgheboom Olijuen draghen, oft een wijnstock vijgen? Also kan oock gheen Fonteyne sout ende soet water gheuen.

13

Wie is daer wijs ende verstandich onder v? ⁱ die bewijse wt syne goede wandelinghe zijn wercken in saechtmoedighe wijsheyt.

i Ephe. 5.a.8.9

14

^k Ist dat ghy bitteren nijdt ende tweedracht hebt in v herte, wilt niet roemen, ende der waerheyt lieghen.

k Roman. 13.b.13

15

^l [Want] dat en is de wijsheyt niet die van bouen koemt, maer [is] Aertsch, vleesschelick, [ende] duyuelsch.

l 1.Corinth.2.a.6

16

^m Want waer nijdt ende tweedracht is, daer is oproer ende alle boose wercken.

m 1.Corinth. 3.a.3 Gala. 5.b.19

17

Maer de wijsheyt die van bouen is, die is ten eersten suyuer, daer na vreedsaem, redelick, ghesegghelick, vol barmherticheyt ende goede vruchten, sonder ⁿ wtneminghe, niet gheueynst.

n Of, onderscheydinghe,

18

Ende de vrucht der rechtueerdicheyt wort in vrede ghesaeyt den ghenen die vrede maken.