Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Hy recommandeert den oorspronck ende reghel des rechten oordeels, ende aller goeder wercken, 14. namelick, het leuende ghelooue ende liefde.

A.1

MYne broeders, hebt het ghelooue onses Heeren Iesu Christi der eerlicheyt, niet ^a in wtneminghe der persoonen.

a Leuitici 19.b.15 Deut. 1.b.17 ende 16.b.19 Prouerb. 24.c.23 Syrach 42.a.1

2

Want ist dat in uwe vergaderinghe koemt een man met eenen gouden rinck in cierlicke kleedinghe: ende daer oock een arm man koemt met een vuyle kleedinghe,

3

Ende ghy siet op hem die het cierlicke kleedt draecht, ende segt tot hem: Sit du hier wel: ende segt tot den armen: Staet du daer: of sit hier onder myne voetbanck:

4

Hebt ghy niet onderscheydt ghemaeckt by v seluen, ende zijt oordeelders gheworden, verkeerdelick bedenckende?

5

^b Hoort myne liue broeders, heeft God niet de arme deser werelt verkoren om rijcke te zijn in het ghelooue, ende erfghenamen des Koninckrijcx, dat hy beloeft heeft den ghenen die hem lief hebben?

b Ioannis 7.e.49 1.Corint. 1.c.25

6

Maer ghy hebt den armen versmaedt. Verdrucken v niet de rijcke door ghewelt, ende trecken v tot de richtstoelen?

7

Lasteren die selue niet den goeden naem ^c die ouer v aengheroepen is?

c Of, daer ghy na ghenaemt zijt?

8

Nochtans ist dat ghy de Konincklicke Wet volbrengt na de Schrift: ^d Du salt dynen naesten lief hebben als dy seluen, so doet ghy wel.

d Leuitici 19.b.18 Matthei 22.d.38 Marci 12.d.31 Roman. 13.a.9 Gala. 5.b.14 Ephe. 5.a.2 1.Thess. 4.a.9

9

Maer ist dat ghy den persoon aensiet, so werct ghy sonde, ende wort van de Wet als ouertreders ghestraft.

B.10

^e Want so wie de gheheele Wet ghehouden heeft, ende in een [dinck] ^f mistreedt, die is in allen schuldich.

e Ezech. 18.c.28 Matthei 5.b.19

f Of, faelt,

11

Want die geseyt heeft: ^g Du salt gheen ouerspel doen, die heeft oock gheseyt: Du salt niet dootslaen. Ende of du gheen ouerspel ghedaen hebst, maer hebst ghedoot, so bistu een ouertreder der Wet gheworden.

g Exodi 20.b.14 Matthei 5.c.27

12

Spreeckt so, ende doet so, als die door de Wet der vrijheyt sult gheoordeelt worden.

13

^h Want een onbarmhertich oordeel [sal gaen] ouer hem die gheen barmherticheyt ghedaen en heeft: ende de barmherticheyt roemt teghen het oordeel.

h Matthei 6.b.15 ende 18.d.35 Marci 11.c.25 Luce 16.c.25

14

ⁱ Wat nutticheyt ist myne broeders, so yemant seyt dat hy het ghelooue heeft, ende en heeft de wercken niet? kan hem dat ghelooue salich maken?

i Matthei 7.c.26 Iacobi 1.c.23

15

^k Ist dat eenighe broeder ofte suster naeckt zijn, ende ghebreck hebben vanden dagelicxschen kost,

k Luce 3.b.11 1.Ioannis 3.b.17

16

Ende yemant van v tot hen seyt: Gaet in vrede, wort warm ende versaedt: ende hen des lijfs nootdruft niet en gheeft: wat helpt dat?

17

Also oock het ghelooue, ist dat het gheen wercken en heeft, so is het by hemseluen doot.

18

Maer men mach [oock] segghen: Du hebst het ghelooue, ende ick hebbe de wercken: bewijst my dijn ghelooue ^l wt dyne wercken: ende ick sal dy wt myne wercken mijn ghelooue bewijsen.

l Of, sonder dyne etcet.

19

Du gheloofst dat daer een God is: du doest wel, ^m de Duyuelen gheloouent oock, ende grouwelen.

m Marci 1.c.24

C.20

Maer wiltu weten O ijdel mensche, dat het ghelooue sonder de wercken doot is?

21

Is niet Abraham onse vader wt de wercken gherechtueerdicht ⁿ als hy Isaac synen sone op den Altaer gheoffert hadde?

n Gene.22.b.10

22

Siestu dat het ghelooue ^o syne wercken gheholpen heeft, ende dat wt de wercken het ghelooue volmaeckt was?

o Of, in de wercken krachtich was,

23

Ende de Schrift wort veruult die daer seyt: ^p Ende Abraham geloofde God, ende het wert hem gherekent tot rechtueerdicheyt, ende hy is een vrient Gods ghenaemt.

p Gene. 15.a.6 Roman. 4.a.1 Galat. 3.a.6

24

Siet ghy dan dat de mensche wt de wercken gherechtueerdicht wort, ende niet alleenlick wt den ghelooue?

25

Ende desghelijcx oock ^q Rahab de hoere, wert sy niet wt de wercken gherechtueerdicht, als sy de boden ontfanghen ende door eenen anderen wech ghesonden hadde?

q Iosue 2.a.1 ende 6.c.23 Hebr. 11.d.31

26

Want gelijck het lichaem sonder gheest doot is, also is oock het ghelooue sonder de wercken doot.

[fol. 86r]