Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE AL GHEmeyne Sendtbrief Iacobi.

Dat Eerste Capittel.

2. De nutticheyt des cruyces, 17. ende de oorspronck alles goets, 21. de maniere van hem te onderworpen den woorde Gods, 26. ende de warachtighe religie.

A.1

IAcobus een dienstknecht Gods, ende des Heeren Iesu Christi: den twaelf gheslachten: ^a die in de verstroyinge zijn, Salicheyt.

a Actuum 8.a.1 1.Petri 1.a.1

2

^b Myne broeders, acht dat voor groote vruechde, als ghy in veelderhande versoeckingen koemt:

b Roman. 5.a.3 1.Petri 1.a.6

3

^c Wetende dat de beproeuinghe ws gheloofs lijdtsaemheyt werckt:

c Roman. 5.a.3 1.Petri 1.a.7

4

Maer de lijdsaemheyt hebbe een volmaeckt werck, op dat ghy volmaeckt zijt, ende gheheel in gheenen dinghe ghebreckelick.

5

^d Ende ist dat yemant van v wijsheyt gebreck heeft, dat hy die begheere van Gode, diese eenen yeghelicken mildelick gheeft, ende niet en verwijt: ende hem sal ghegheuen worden.

d Prouer. 2.a.3

6

^e Maer dat hy met ghelooue begheere, niet twijffelende: want die twijffelt, die is ghelijck de vloedt der zee, die door den windt ghewaecht ende ghedreuen wort.

e Ieremie 29.b.12 Matthei 7.a.7 ende 21.c.22 Marci 11.c.24 Luce 11.a.9 Ioannis 14.b.13 ende 16.c.24 1.Ioannis 3.c.22 ende 5.b.14

7

Want sulck een mensche, en dencke oock niet dat hy yet ontfanghen sal vanden Heere.

8

Een ^f wanckelmoedich man is onghestadich in alle syne weghen.

f Griecx, twee zielich

9

Maer een broeder die vernedert is, die roeme in syne hoocheyt,

[fol. 85v]

B.10

Ende die rijcke is, [die roeme] in syne vernederinghe, want hy sal als een bloeme des gras vergaen.

11

^g Want [ghelijck] de Sonne is opghegaen met hitte, ende heeft het gras verdweent, ende zijn bloeme is af gheuallen, ende de cierlickheyt zijns aensiens is vergaen: also sal oock de rijcke in syne ^h weghen verdwijnen.

g Esaie 40.a.6 Syrach 14.b.18 2.Corinth. 7.d.31 Iacobi 4.b.14 1.Petri 1.c.24 1.Ioannis 2.b.17

h Of, oueruloedicheden

12

ⁱ Salich is de man die versoeckinghe verdraecht, want als hy sal beproeft zijn, sal hy ^k de kroone der eerlickheyt ontfanghen, de welcke de Heere beloeft heeft, den ghenen die hem lief hebben.

i Iob 5.b.17

k 2.Timot. 4.a.8 1.Petri 5.a.4 Apoc. 2.b.10

13

Niemant die versocht wort, segghe ^l dat hy van Gode versocht wort: want God en kan met gheenen quade versocht worden, hy en versoect oock niemant.

l Griecx, ick worde van Gode versocht:

14

Maer een yeghelick wort versocht, als hy van syne eyghen begheerlickheyt afgetrocken ende verlockt wort.

15

Daer na als de begheerlickheyt ontfanghen heeft, baert sy de sonde, ende de sonde als sy volbracht is, brengt de doot voort.

16

Dwaelt niet myne lieue broeders,

17

^m Alle goede ghifte, ende alle volmaeckte gaue is van bouen komende, vanden Vader der lichten, by den welcken gheen veranderinghe, of veranderlicke beschaduwinghe en is.

m 1.Corint. 4.a.7 Prouerb. 2.a.6

18

ⁿ Na synen wille heeft hy ons ghegenereert, door het woort der waerheyt, om dat wy souden wesen eenighe eerstelinghen syner creatueren.

n 1.Corint. 4.b.15 Gal. 4.b.19 1.Petri 1.c.23

19

So dan myne lieue broeders, ^o een yeghelick mensche zy rasch om te hooren, traghe tot spreken, ende traghe tot toornicheyt:

o Prouer. 17.c.27 Syrach 5.b.13

C.20

Want de toornicheyt des mans, en werckt Gods gherechticheyt niet,

21

^p Daerom alle vuylicheyt ende oueruloet der boosheyt wechworpende, ontfangt met alle lieflicheyt het woort dat in [v] gheplant wort, het welck uwe zielen kan salich maken.

p Roman. 13.b.12 Coloss. 3.a.8

22

^q Ende weest daders des woorts, ende niet alleenlick hoorders, v seluen bedrieghende.

q Matthei 7.c.21 Rom. 2.b.13

23

^r Want ist dat yemant het woort hoort, ende niet en doet, dese is ghelijck eenen man die ^s zijn aengeboren aensichte bemerct in eenen spiegel.

r Luce 6.c.27

s Griecx, het aensichte syner gheboorten

24

Want hy heeft hemseluen bemerckt, ende is wechghegaen, ende heeft terstont vergheten hoedanich hy was.

25

^t Maer die de volmaecte Wet der vrijheyt insiet, ende in die geduerich blijft, dese, dewijle hy gheen vergetelick hoorder en is, maer een dader des wercks, sal salich wesen in zijn doen.

t Matthei 5.b.19

26

^u Ist dat yemant onder v denckt dat hy godsdienstich is, ende zijn tonghe niet en bedwingt: maer verleydt zijn herte: sulcker Godsdienst is ijdel.

u Psalm. 34.b.14 1.Petri 3.b.10 Iacobi 3.a.5

27

De suyuer ende onbeulecte Godsdienst voor God den Vader, is dese:

28

De weduwen ende weesen in hare verdruckinghe ^x besoecken, ende hemseluen onbeuleckt houden vander werelt.

x Griecx, opsien, of, toesien,