Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat viij. Capittel.

1. Hy bewyst door de gheestelicke ende eewighe offeringhe Christi in het nieuwe Testament, dat de Leuitische offeringhe des ouden Wets te niete ghemaeckt is.

A.1

DE ^a somma van dat wy seggen, [is dit, namelick] dat wy hebben sodanighen ^b Hooghepriester, ^c die gheseten is ter rechter hant des throons der Maiesteydt in de Hemelen,

a Of, het hooftstuck

b Hebr. 3.a.1 ende 4.b.14 ende 6.c.20 ende 9.b.11

c Ephes. 1.c.20 Coloss. 3.a.1 Hebr. 12.a.2

2

Een bediener van het heylighe, ende [van] dien warachtigen Tabernakel, welcken de Heere heeft opgherecht, ende gheen mensche.

3

Want een yeghelick Hoogepriester wort gestelt om gauen ende slachtoffer te offeren: ^d waer wt het noot was, dat dese oock wat hadde, dat hy offeren soude.

d Ephes. 5.a.2

4

Want ware hy op der Aerden, so en ware hy gheen Priester, dewijle daer Priesters zijn die na de Wet gauen offeren,

5

^e De welcke dienen den exempel ende schaduwe der Hemelschen [dingen,] ghelijck Moses van Gode vermaent was, ^f als hy den Tabernakel volmaken soude: Want siet (seyde hy) dat du het al makest na den voorbeelde die dy op den berch ghetoont is.

e Colossen. 2.b.17 Hebr. 10.a.1

f Exodi 25.e.40 Actuum 7.e.44

6

^g Maer nu heeft [dese onse Hooghepriester so veel] beter bedieninghe ghekreghen als hy eens beters ^h Verbonts Middelaer is, dat in betere beloften beuesticht is.

g 2.Corint. 3.a.6

h Of, Testaments

7

Want hadde dat eerste onstraffelick gheweest, so en hadde geen plaetse voor het ander gesocht gheweest.

8

Want hy straftse, ende seyt tot hen: ⁱ Siet de daghen sullen komen, spreeckt de Heere, ende ick sal ouer het huys Israels, ende ouer het huys Iuda een nieu ^k Verbont volmaken:

i Ier. 31.d.32.33.34

k Of, Testament

9

Niet na dat Verbont dat ick met haren vaderen gemaeckt hebbe ten daghe als ick hare hant nam, ende hen wt Egypten leydde: Want sy en zijn in dien mynen Verbonde niet gebleuen, ende ick hebse veracht, seyt de Heere:

B.10

Want dit is het Verbont dat ick den huyse Israel maken sal na die daghen spreect de Heere: ^l Ick sal myne Wetten in haer verstant gheuen, ende ick salse inschrijuen in haer herte: ^m ende ick sal hen tot een God wesen, ende sy sullen my tot een volck wesen:

l Ieremie 31.d.33

m Zacharie 8.a.8

11

ⁿ Ende sy en sullen niet een yeghelick synen naesten, ende een yegelick synen broeder leeren, segghende: Kent den Heere: want sy sullen my alle kennen vanden minsten onder hen, totten meesten onder hen.

n 1.Ioannis. 2.c.27

12

^o Want ick sal hare onrechtueerdicheyt ^p ghenadich wesen, ende hare sonde ende hare ongherechticheyt en sal ick niet meer ghedencken.

o Matthei 3.b.17 ende 17.a.5

p Of, versoent zijn ouer haren etcet.

13

Daer in dat hy seyt: Een nieuw, heeft hy het eerste oudt ghemaeckt: ende dat oudt ende veroudt wort, dat ^q vergaet korts.

q Griecx, is na by het vergaen.