Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE SENDBRIEF Pauli tot Philemon.

Paulus den wechgeloopen ende ongetrouwen Dienstknecht wederom sendende tot synen heere, bidt voor hem. Een leuendich bewijs der ootmoedicheyt ende lieflickheyt Pauli.

A.1

PAulus de ^a gheuangen Iesu Christi, ende de broeder Timotheus, Philemoni den beminden ende onsen medehulper:

a Griecx, gebonden

2

Ende der lieuer Appie, ende Archippo onsen medekamper, ende der Ghemeynte die in dynen huyse is.

3

^b Ghenade [zy] v ende vrede van Gode onsen Vader, ende den Heere Iesu Christo.

b Roman. 1.a 7 Galat. 1.a.3 1.Petri 1.a.2

4

^c Ick dancke mynen God, dyner altijdts ghedenckende in myne ghebeden,

c Colossen. 1.a.3 1.Thessal. 1.a.2 2.Thes. 1.a.3

5

Dewijle ick dyne liefde ende ghelooue hoore, die du hebst totten Heere Iesum, ende tot alle de Heylighen:

6

Op dat de gemeynschap dijns gheloofs krachtich worde door de kennisse alles goets dat in v is, in Christum Iesum.

7

Want wy hebben groote vreucht ende troost in dyne liefde, dat de ^d herten der Heyligen vermaeckt zijn door dy, broeder.

d Griecx, innerlicke leden

8

Waerom, hoewel ick groote ^e vrijmoedicheyt in Christo hebbe, dy te ghebieden dat [dy] betaemt.

e Of, vrijheyt

9

So bidde ick nochtans lieuer om der liefden wille, dewijle ick sodanich ben, als Paulus een oudt man, ende nu oock een ^f gheuanghen Iesu Christi.

f Griecx, ghebonden

A.10

Ick bidde dy voor mynen sone ^g Onesimo, den welcken ick in myne banden ^h ghebaert hebbe:

g Coloss. 4.a.9

h 1.Corint. 4.b.15 Galat. 4.b.19 Iacobi 1.b.18

11

Welcke dy voortijden onnut was, maer nu dy ende my wel nut.

12

Den welcken ick weder gesonden hebbe: ende du ontfangt hem, dat is, myne ⁱ innerlicke leden.

i Of, mijn herte

13

Den welcken ick begeerde by my te houden, om dat hy my voor dy dienen soude in de banden des Euangeliums:

14

Maer buyten dijn goetduncken hebbe ick niet willen doen, om dat dijn goet niet en soude wesen als wt bedwanck, maer ghewillich.

15

Mogelick is hy voor eenen tijt geweken, om dat du hem eewelick soudest ontfanghen,

16

Niet meer als een dienstknecht, maer bouen [eenen] dienstknecht, [namelick,] eenen lieuen broeder, voornemelic my, hoeveel meer dy, beyde in den vleessche ende in den Heere.

17

So dan, ist dat du my houdest voor medegheselle, ontfangt hem als my.

18

Ende ist dat hy dy eenich onghelijck ghedaen heeft, of yet schuldich is, rekent dat my toe.

19

Ick Paulus hebbe het geschreuen met myne hant, ick sal het betalen: op dat ick dy niet en segghe, dat du oock dy seluen my schuldich bist.

C.20

Ia broeder, laet my ^k dy ghebruycken in den Heere, vermaeckt myne innerlicke leden in den Heere.

k Of, dese nutticheyt van dy hebben

21

Ick hebbe tot dy gheschreuen met een betrouwen op dyne ghehoorsaemheyt, wetende dat du doen salt oock bouen dat ick segghe.

22

Bereydt my oock mede een herberghe: want ick hope dat ick door uwe ghebeden v sal gheschoncken worden.

[fol. 81v]

23

Dy groeten ^l Epaphras mijn medegheuanghen in Christo Iesu,

l Colossen. 1.a.7 ende 4.b.12

24

^m Marcus, ⁿ Aristarchus, ^o Demas, ^p Lucas myne medehulpers.

m Coloss. 4.b.10 2.Timot. 4.b.11

n Actuum 27.a.2 Coloss. 4.b.10

o Coloss. 4.b.14 2.Timoth. 4.b.10

p Coloss. 4.b.14 2.Timoth. 4.b.11

25

De ghenade onses Heeren Iesu Christi, [zy] met dynen gheeste. Amen.

Ghesonden van Roomen door Onesimum den Dienstknecht.