Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Hy vermaent datmen leere den Ouersten gehoorsaem zijn, 4. bewijsende hoe wy zijn door Christum verlost, 9. ende vermaent Titum wederom dwase vraghen te verworpen, 10. ende de Ketters te schuwen, 14. ende dat een yeghelic hemseluen oeffene in goede wercken.

A.1

VErmaentse ^a dat sy den Vorsten ende ^b Ouerheden onderdanich ende ghehoorsaem zijn, tot alle goede wercken bereyt zijn:

a Roman. 13.a.1 1.Petri 2.b.13

b Gr. Machten

2

Dat sy niemant en lasteren, niet en twisten, maer redelick zijn, alle saechtmoedicheyt bewijsen teghen alle menschen:

3

^c Want wy waren oock voortijden onwijs, onghehoorsaem, dwalende, ende dienende menigerley begeerlickheden ende wellusten, wandelende in boosheyt ende nijt, hatelick zijnde, ende malcanderen hatende.

c 1.Corint. 6.b.11 Ephes. 2.a.2 Colossen. 3.a.7

4

Maer na dat de goedertierenheyt Gods onses Salichmakers, ende de liefde tot de menschen gheopenbaert is: ^d heeft hy ons salich gemaect:

d Ephes. 1.a.4 2.Timothei 1.a.9

5

Niet wt die rechtueerdighe wercken die wy gedaen hadden, ^e maer na syne barmherticheyt, door ^f het Badt der wedergheboorte ende vernieuwinghe des heylighen Gheests:

e Actuum 15.b.11 Ephes. 2.a.4.7

f Ioannis 3.a.5 Ephe. 5.c.26

6

^g Den welcken hy rijckelick ouer ons heeft wtghegoten door Iesum Christum onsen Salichmaker:

g Ezech. 36.c.25

7

Op dat wy gherechtueerdicht, door zijn ghenade erfghenamen worden souden, na der hope des eeuwighen leuens.

8

Dat is een ghetrouwe woort: ende ick wil dat du dit ^h versterckst, op dat de ghene die aen God gheloouen, sorghe draghen om goede wercken voor te staen, want dese zijn eerlick ende profijtelick den menschen.

h Oft, sterckelick betuyghest,

9

ⁱ Maer wederstaet de dwase vragen, ende rekeninghen der gheslachten, ende twistinghen, ende strijden van der Wet: want sy zijn onprofijtelick ende ijdel.

i 1.Timoth. 1.a.4 ende 4.a.7 ende 6.c.20 2.Timoth. 2.b.16 Titi 1.b.14

B.10

^k Eenen ^l Ketterschen mensche vermijt na de eerste ende tweedde vermaninghe,

k Matth. 18.a.8 Roman. 16.b.16 2.Thess. 3.a.6 2.Timothei 3.a.5 2.Ioannis b.10

l Of, rotte makischen,

11

Wetende dat de sulcke verkeert is, ende sondicht, als die ^m by hemseluen verdoemt is.

m Of, als die hemseluen veroordeelt heeft,

12

Als ick Arteman of Thychicum tot dy sal senden, so doet neersticheyt om tot my te komen te Nicopolen: want ick hebbe voorghenomen daer te ouerwinteren.

13

Zenam den Wetgeleerden, ende ⁿ Apollo gheleyt neerstelick, op dat hen niet en ghebreke.

n Actu. 18.c.24 1.Corinth. 1.b.12

14

Laet oock de onse leeren goede wercken voorstaen tot nootsakelicken gebruycke, op dat sy niet onuruchtbaer en zijn.

15

Alle die met my zijn groeten dy: Groetse die ons lief hebben in den ghelooue. De ghenade zy met v allen. Amen.

Gheschreuen van Nicopolen in Macedonia.