Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

2. Hy bewijst hoe de oude ende de ionghe, ende de dienstknechten henseluen moeten Christelick draghen, 11. fonderende zijn vermaninghe op de ghenade ende goedicheydt Gods, die gheopenbaert is door Iesum Christum.

A.1

MAer du, spreeckt dat der ghesonder leere betaemt.

2

De oude mannen, dat sy sober zijn, ghestadich, voorsichtich, ghesont in den ghelooue, liefde, lijdtsaemheyt.

3

De oude vrouwen desghelijcx, ^a dat sy haerseluen draghen, ghelijck den Heyligen betaemt, ^b dat sy gheene lasterssen zijn, niet tot veel wijns begheuen: [maer] leererssen der eerlicheyt,

a 1.Timoth. 2.a.9 1.Petri 3.a.3

b 1.Timot. 3.b.13

4

Op dat sy de ionghe vrouwen onderwijsen, hare mannen lief te hebben, hare kinderen lief te hebben.

5

Voorsichtich te [zijn,] suyuer, het huys te verwaren, goet, ^c haren mannen onderdanich: op dat het woort Gods niet ghelastert en worde.

c Gene. 3.b.16 1.Corint. 14.d.34 Ephe. 5.c.22 Colossen. 3.b.18 1.Petri 3.a.1

6

Desghelijcx, vermaent de ionghe mannen, dat sy matich zijn,

7

^d Dy seluen bewijsende in allen een exempel van goede wercken: in der leere, geheelheyt, gestadicheydt.

d 1.Timot. 4.b.12 1.Petri 5.a.3

8

In woorden ghesont, onstraffelick: ^e op dat de ghene die teghenstaet, beschaemt worde, niet quaets hebbende van v te segghen.

e 1.Petri 2.b.12.15 ende 3.b.16

9

^f De dienstknechten [vermaent] dat sy haren heeren onderdanich zijn, in allen dinghen welbehaghelick, niet teghensprekers,

f Ephes. 6.a.5 Colossen. 3.c.22 1.Timothei 6.a.1 1.Petri 2.b.18

B.10

Niet ^g ontreckende, maer alle goede trouwe bewijsende, op dat sy de leeringhe Gods onses Salichmakers vercieren in allen dinghen.

g Of, wechstekende,

[fol. 81r]

11

Want de ^h salichmakende ghenade Gods, is verschenen allen menschen.

h Of, de ghenade die salich is allen menschen, is verschenen.

12

Ende onderwijst ons, ⁱ op dat wy de godloosheydt, ende ^k wereltlicke begheerlickheden versakende, matichlick ende rechtueerdichlick ende Godsalichlick leuen in dese teghenwoordighe werelt:

i Ephes. 1.a.4 Colossen. 1.c.22 2.Timothei 1.a.9

k 1.Ioan. 2.b.16

13

^l Verwachtende de salighe hope ende verschijninghe der eerlickheyt des grooten Gods, ende onses Salichmakers Iesu Christi:

l 1.Corint. 1.a.6 Phil. 3.c.20

14

^m Die hemseluen voor ons ghegheuen heeft, om dat hy ons soude verlossen van alle ongherechticheyt, ende hemseluen een eyghen volck reynigen, ⁿ dat vyerich ware tot goede wercken.

m Galat. 1.a.4 ende 2.c.21 Ephes. 5.a.2 Heb. 9.b.14

n Ephes. 2.a.9

15

Spreeckt dit, ende vermaent ende straft met alle ^o ernst: ^p dat dy niemant en verachte.

o Of, macht

p 1.Timot. 4.b.12