Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE SENDBRIEF Pauli tot Titum.

Dat Eerste Capittel.

5. De Apostel vermaent Titum achte te hebben op den staet der Ghemeynte, beschrijuende hoedanich een Bisschop zijn moet, 10. daer na straft hy de gene die de Cretensen bedroghen met Iodischen fabulen, ende menschen leeringhen.

A.1

PAulus een dienstknecht Gods, ende Apostel Iesu Christi, na den ghelooue der wtuercorenen Gods, ende kennisse der waerheydt die na de Godsalicheyt is.

2

Tot de hope des eewigen leuens, welck God die niet lieghen en kan beloeft heeft ^a voor de ^b tijden der werelt.

a Roman. 16.c.24 Colossen. 1.c.26 Ephes. 1.a.9 ende 3.a.9 2.Timoth. 1.b.10 1.Petri 1.c.28

b Griecx, eewige tijden.

3

Maer heeft zijn woort te synen tijde geopenbaert door de predikinge, ^c die my betrout is, na het beuel Gods onses Salichmakers:

c Actuum 20.c.24 Galat. 1.a.1

4

^d Tito mynen oprechten sone na den gemeynen ghelooue: ^e Ghenade ende barmherticheyt, ende vrede [zy] v van Gode den Vader, ende den Heere Iesu Christo onsen Salichmaker.

d Actuum 16.a.3 Galat. 2.a.3 2.Corint. 8.b.16

e Ephe. 1.a.2 Coloss. 1.a.2 1.Petri 1.a.2

5

Daerom hebbe ick dy in Creta ghelaten, om dat du het ghene dat ghebreckelick is, voort soudest te rechte brenghen, ^f ende in allen steden Ouderlingen setten, gelijck ick verordent hadde.

f 2.Timoth. 2.a.2

6

^g Ist dat yemant is onstraffelick, eener vrouwen man, die gheloouighe kinderen heeft, niet beulect met ouerdadicheyt, of onghehoorsaem.

g 1.Timoth. 3.a.2

7

Want een ^h Toesiender moet onstraffelic zijn, ⁱ als een Huyshouder Gods, niet hardtneckichlick hemseluen behaghende, niet toornich, ^k niet wijnghierich, gheen slagher, gheen vuyl ghewinsoecker,

h Of, Bisschop

i Matth. 24.e.45 1.Corinth. 4.a.1

k Leuitici 10.a.9 Ephe. 5.b.18

8

Maer die gheerne herbercht, ^l die goede lief heeft, voorsichtich, rechtueerdich, heylich, matich,

l Of, het

9

Die aen dat ghetrouwe woort dat na der leere is, vast houdt, op dat hy machtich zy oock te vermanen door de ghesonde leere, ende de gene die teghen staen te ouerwinnen.

B.10

^m Want daer zijn vele ijdelheydt sprekers, hardtneckich, ende oock verleyders der sinnen, voornemelick, die wt de Besnijdinghe zijn.

m Actuum 15.a.1

11

ⁿ Den welcken men moet den mont toestoppen, de welcke gheheele ^o huysgesinnen ommekeeren, ende leeren dat niet en betaemt, om des vuylghewins wille.

n 2.Timot. 3.a.6 Matthei 23.b.13

o Griecx, huysen

12

Een van hen haer eygen Propheet, heeft geseyt: ^p De Cretensen [zijn] altijdts leughenachtich, quade beesten, luye buycken.

p Epimenedes

13

Dit ghetuyghenisse is warachtich: om welcker oorsaken wille straftse dapperlick, op dat sy ghesont worden in het ghelooue,

14

Ende niet achten op ^q Iodische fabulen, ende gheboden der menschen, die van der waerheydt afkeeren.

q Esaie 29.b.13 Matthei 15.a.9 Colossen. 2.c.22 1.Timoth. 1.a.4 ende 4.a.7 ende 6.c.20 2.Timoth. 2.b.16

15

^r Alle dingen zijn den reynen reyn: maer ^s den onreynen ende ongheloouighen is gheen dinck reyn, maer oock haer ghemoet ende consciencie is onreyn.

r Matthei 15.b.11 Actuum 10.b.15 Roman. 14.c.20

s Matthei 23.c.24 Roman. 14.c.25

16

Sy segghen dat sy God kennen, maer verloochenen hem met de wercken: dewijle sy grouwelick zijn, ende ongheloouich, ende tot allen goeden wercke ^t ondeughende.

t Of, onbequaem