Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Hy beschrijft de laetste tijden, 9. Het eynde ende voortgaen der valscher Leeraers, ende gheleghentheydt aller gheloouighen, 14. daer na wijst hy middel om te ontgaen, 16. ende de nutticheyt der heyligher Schriftuere.

A.1

ENde ^a weet dit, dat in de laetste daghen sullen komen sware tijden:

a 1.Timoth. 4.a.1 2.Petri 3.a.3 Iude b.18

2

Want daer sullen menschen wesen, hen seluen lief hebbende, gheltgierich, vermetelick, hooueerdich, lasteraers, den ouderen ongehoorsaem, ondanckbaer, onheylich,

3

Sonder natuerlicke liefde, sonder verbondt, valsche beschuldigers, ^b onmatich, ^c hardt, sonder liefde tot de goede.

b Of, onghetempert,

c Of, wildt,

4

Verraders, roeckeloos, opgheblasen, die de wulpscheyt lieuer hebben dan God:

5

Hebbende een ^d gedaente der ^e Godsalicheyt, maer de kracht daer van hebben sy verloochent: ^f wendt dy oock af van sulcken.

d Of, ghebaer

e Oft, Godlicken dienst,

f Matthei 18.a.8 Roman. 16.b.17 2.Thessal. 3.a.6 Titi 3.b.10

6

^g Want van desen zijn sy, die in de huysen insluypen, ende nemen de vroukens gheuangen, die met sonden beladen zijn, ende met menigherley begheerlickheden ghedreuen worden:

g Titi 1.b.11 2.Ioannis b.10 Matthei 23.b.13

7

Die altijts leeren, maer nemmermeer ter kennisse der waerheyt komen konnen.

8

^h Ende ghelijck Iannes ende Iambres tegen Mosen stonden, also staen dese oock teghen de waerheyt: menschen met verdoruen sinnen, onbequaem totten ghelooue.

h Exodi 7.b.11

9

Maer sy en sullen niet meer voortganck hebben: want hare wtsinnicheyt sal eenen yeghelicken openbaer worden, ghelijck oock der ghener werdt.

B.10

Maer du hebst ^{i k} doorsien mijn leere, maniere van leuen, voornemen, ghelooue, lanckmoedicheyt, liefde, lijdsaemheyt,

i Oft, bekent

k Ofte, achternolcht,

11

Veruolghinghen, verdruckinghen, die my geschiet zijn ^l te Antiochia, ^m Iconien, ⁿ Lystren: wat veruolghinghe ick gheleden hebbe: ^o ende de Heere heeft my wt allen verlost.

l Actuum 13.f.50

m Actuum 14.a.2

n Actuum 14.b.19

o 2.Corint. 1.b.10 Psalm. 34.c.20

12

^p Ende oock alle die Godsalichlick willen leuen in Christo Iesu, sullen veruolcht worden:

p Syrach 2.a.1 Luce 24.c.25 Actuum 14.c.22 1.Thessal. 3.a.3

13

Maer de boose menschen, ende ^q bedriegers, sullen totten quade voortgaen, verleydende, ende verleydt wordende:

q Of, Uerdoouers,

14

^r Maer blijft du in het ghene dat du gheleert hebst, ^s ende dat dy betrout is, wetende van wien du het gheleert hebst,

r 2.Timoth. 1.b.13

s Oft, waerin du gheloouich gheworden bist

15

Ende dat du van dyne kintscheyt af de heylighe Schriften geweten hebst, de welcke dy mogen ^t wijs maken ter salicheyt, door het ghelooue dat in Christo Iesu is.

t Of, gheleert

16

^u Alle de Schrift [is] van Gode ingegeuen ende oorbaerlick tot leeringhe, tot straffinghe, tot verbeteringhe, tot onderwijsinghe die in de rechtueerdicheyt is:

u 2.Petri 1.c.20

17

Op dat de mensche Gods gheheel zy, tot alle goede wercken volmaecktelick onderwesen.