Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE TVVEEDDE Sendtbrief Pauli tot Timotheum.

Dat Eerste Capittel.

3. Hy prijst het ghelooue Timothei, 6. ende vermaent hem ghetrouwelick te blijuen in de leere ende in zijn beroepinghe, 8. daer na vermaent hy van zijn banden, ende van synen bereydden loon, 15. Ten eynde beklaecht hy hem van hen, die van hem waren afgeweken, 16. prijst Onesiphorum.

A.1

PAulus een Apostel Iesu Christi door den wille Gods, na de belofte des leuens, dat in Christo Iesu is:

2

Mynen lieuen sone Timotheo: ^a Ghenade, barmherticheyt ende vrede [zy v] van Gode den Vader, ende onsen Heere Iesu Christo.

a Galat. 1.a.3 1.Timothei 1.a.2 1.Petri 1.a.2

3

Ick dancke God ^b dien ick diene van myne voorouderen aen met reynder consciencien, ^c gelijck ick sonder ophouden dyner ghedencke in myne ghebeden nacht ende dach:

b Actuum 22.a.3 Roma. 1.a.9

c 1.Thessal. 3.b.10

4

Ende verlanghe v te sien, ghedenckende dyne tranen: om met blijschap veruult te worden,

5

Indachtich ghemaeckt van het ongheueynsde ghelooue dat in dy is: het welcke eerst ^d gheweest is in dyne grootemoeder Loide, ende dyne moeder Eunica, ende ben versekert dat het oock in [dy is.]

d Griecx, inghewoont heeft

6

Om welcke oorsake ick dy vermane, verwect de gaue Gods die in dy is, door ^e de oplegginge mijnder handen.

e Actuum 6.a.6 ende 8.b.17 ende 13.a.3 ende 19.a.6 1.Timoth. 4.b.14 ende 5.c.22

7

^f Want God en heeft ons niet ghegheuen eenen gheest der vreese: maer der kracht, ende liefde, ende maticheyt.

f Roman. 8.b.15

8

^g So dan en schaemt dy niet van het ghetuyghenisse onses Heeren, noch van my ^h die ick ⁱ zijn gheuanghen ben: maer weest deelachtich der verdruckinghen des Euangelij, na de kracht Gods:

g Roman. 1.b.16

h Actuum 21.d.33 Ephes. 3.a.1

i Dat is, om synent wille:

9

^k Die ons heeft salich ghemaeckt: ende heeft ons gheroepen met een heylighe roepinge: niet na onse wercken: maer na zijn voornemen ende ghenade, die ons ghegheuen is in Christo Iesu voor de ^l tijden der werelt:

k Ephes. 1.a.4 Titi 3.a.4

l Griecx, eewighe tijden:

B.10

^m Ende nu gheopenbaert door de verschijninghe onses Salichmakers Iesu Christi: ⁿ die de doot heeft te niete ghemaeckt, ende het leuen in het licht ghebracht, ende de onsterffelickheydt door het Euangelium:

m Roma. 16.c.24 Ephes. 1.a.9 ende 3.a.9 Coloss. 1.c.26 Titi 1.a.2 1.Petri 1.c.20

n Esaie 25.a.8 Hebr. 2.b.14

11

^o Waer toe ick gheset ben een prediker ende Apostel, ende Leeraer der Heydenen.

o Actuum 9.b.15 ende 13.a.2 ende 22.c.21 Gala. 1.b.16 ende 2.a.8 Ephes. 3.a.8 1.Timothei 2.a.7

12

Om welcker oorsaken wille ick dit oock lijde, ende en worde niet beschaemt: want ick weet wien ick ghelooft hebbe, ende ben versekert dat hy is machtich, dat ick by hem hebbe, te bewaren tot dien dach.

13

^p Houdt een exempel der ghesonder woorden die du van my gheleert hebst, in den ghelooue ende liefde die in Christo Iesu is.

p 2.Timot. 3.b.14

14

Bewaert den goeden [pant] die dy betrout is, door den heylighen Gheest die in ons woont.

15

Du wetest dat, ^q dat alle die in Asia zijn, hen van my afgewent hebben, onder de welcke zijn Phigellus ende Hermogenes.

q Actuum 19.b.10

16

De Heere geue den huyse ^r Onesiphori barmherticheydt: ^s want hy heeft my dickmael vermaeckt, ende en heeft hem mijnder keten niet gheschaemt:

r 2.Timot. 4.b.19

s Matthei 25.d.37

17

Maer als hy te Roomen was, socht hy my seer neerstelick, ende vant [my].

18

De Heere gheue hem dat hy barmhertichheyt vinde by den Heere in dien daghe: ende hoe vele hy my te Ephesen bedient heeft, dat weetstu seer wel.