Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Hem recommenderende in de ghebeden der Thessalonicensen, vermaent hen te scheyden van de godloose, 10. ende te vlieden alle ledicheydt, 14. daer na bewijst hy hen hoe sy hen draghen sullen tot de ghene die onordentlick leuen.

A.1

VOort, broeders, ^a biddet voor ons, dat het woort des Heeren loope, ende ^b verklaert worde, ghelijck oock by v.

a Matthei 9.d.38 Ephes. 6.b.19 Colos. 4.a.3

b Of, ghepresen

2

^c Ende dat wy verlost worden van de onghereghelde ende boose menschen: ^d want het ghelooue en is niet aller [menschen.]

c Roman. 15.d.31

d Ioan. 6.e.44

3

Maer de Heere is ghetrouwe, die v sal verstercken ende bewaren van den Boosen.

4

Wy vertrouwen in den Heere van v, dat ghy doet ende doen sult dat wy v ghebieden.

5

De Heere beweghe uwe herten in de liefde Gods, ende verwachtinghe Christi.

6

^e Wy ghebieden v, broeders, in den name onses Heeren Iesu Christi, onttreckt v van allen broeder die ^f onbehoorlick wandelt, ende niet na de ^g leere die hy van ons ontfanghen heeft.

e Ieremie 16.b.11 Danielis 1.a.8 1.Corinth. 5.b.11 2.Thess. 3.b.14 Titi 3.b.10

f Of, ongeschicktelick

g Of, insettinghe

7

Want ghy weet ^h hoe men ons behoort na te volghen, want wy en zijn niet onbehoorlick onder v gheweest.

h 1.Corinth. 11.a.1 1.Thess. 1.a.6 ende 4.b.11

8

ⁱ Wy hebben oock geen broot voor niet gheeten by yemant, maer hebben met arbeydt ende moeyte nacht ende dach ghewrocht, om dat wy niemant van v beswaren en souden.

i Actuum 18.a.3 ende 20.d.33 1.Corinth. 4.b.12 2.Corinth. 11.a.9 ende 12.b.13 1.Thessal. 2.a.9

9

^k Niet dat wy die macht niet en hebben, maer ^l om dat wy onsseluen v [tot] een exempel gheuen souden, om dat ghy ons nauolghen soudt.

k 1.Corinth. 9.a.4 1.Thess. 2.a.7

l 1.Corint. 4.b.16. ende 11.a.1 Philippen. 3.b.17 1.Thess. 1.a.6

B.10

Want oock doe wy by v waren, geboden wy v dit, [namelick,] wilde yemant niet wercken, dat hy oock niet eten en soude.

11

Want wy hooren dat sommighe onder v onbehoorlic wandelen, ende niet en wercken, maer ^m ijdelheyt doen.

m Of, curieuselic leuen.

12

ⁿ Den sulcken gebieden ende ^o vermanen wy door onsen Heere Iesum Christum, ^p dat sy met stilheyt werckende, haer eyghen broot eten.

n 1.Thess. 4.b.11

o Oft, bidden

p Ephes. 4.c.28

13

^q Ende ghy broeders, en wordt niet traech in weldoen.

q Galat. 6.a.9

14

Ist dat yemandt onsen woorde niet ghehoorsaem en is, teeckent dien door eenen Sendbrief: ^r ende vermengt v niet met hem, op dat hy beschaemt worde:

r Matthei 18.b.17 1.Corinth.5.a.8 2.Thessal. 3.a.6

15

Ende en houdt hem niet als vyant: maer vermaent hem als eenen broeder.

16

De Heere des vredes gheue v alle tijt allesins vrede. De Heere zy met v allen.

17

^s De groetenisse met myne hant, Pauli, het welcke een teecken is in alle Sendtbrieuen: also schrijue ick,

s Coloss. 4.b.18

18

De genade onses Heeren Iesu Christi zy met v allen. Amen.

De tweedde Sendtbrief tot de Thessalonicensen, gheschreuen van Athenen.