Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Hy vermaent tot sterckheyt des geloofs, 3. bewijsende dat voor den dach des Heeren de Antichrist moet gheopenbaert worden, de welcke na dat hy vele sal verleydt hebben, 8. sal ten eynde ter neder geworpen worden door de koemste Christi.

A.1

VOort wy bidden v, broeders, door de toekoemste onses Heeren Iesu Christi, ende onser vergaderinghe tot hem,

2

^a Dat ghy niet hastelic beweecht en wort van den sinne, noch beroert en wort, noch door geest, noch door woort, noch door Sendtbrief, als van ons [gheschreuen,] ghelijck of de dach Christi voorhanden ware.

a Ieremie 29.a.8 Matthei 24.a.4 Ephes. 5.a.6 Coloss. 2.b.18 1.Ioannis 4.a.1

3

Dat v niemandt en bedrieghe in gheener maniere: want [hy en koemt niet] ten zy dat eerst ^b den afual kome, ende de mensche der sonde, [namelick,] die sone der verderffenisse gheopenbaert worde,

b Danielis 9.c.27 Matthei 24.b.15 1.Timothei 4.a.2 1.Ioannis 2.b.18

4

Hemseluen settende ende verheffende, bouen al wat ghenaemt wort, God of ^c Godsdienst: so dat hy als of hy God ware, sit inden Tempel Gods, ^d hemseluen wtgheuende voor God.

c Of, als God gedient wort:

d Danie. 11.d.36

5

Ghedenckt ghy niet dat ick v dit gheseyt hebbe, doe ick noch by v was?

6

Ende nu wat [hem] verhindert, dat weet ghy, ^e op dat hy gheopenbaert worde te syner eyghener tijdt:

e 1.Ioan. 2.b.19

7

Want hy werckt nu de verborghentheyt der ongherechticheydt: alleenlick die [hem] nu verhindert, [sal hem verhinderen,] tot dat hy wt den midden wechghenomen worde,

8

Ende dan sal die ongherechtighe gheopenbaert worden: ^f den welcken de Heere met den ^g adem zijns monts sal verdoen, ende met de verschijninghe syner toekoemste te niete maken.

f Esaie 11.a.4

g Of, gheest

9

[Te weten dien,] wiens toekoemste is ^h na de werckinghe des Satans, ⁱ in alle macht, ende teeckenen, ende wonderheden der leughen.

h Ioannis 8.e.48

i Deuter. 13.a.1 Apoc. 13.b.13

B.10

Ende in alle ^k verleydinghe der ongherechticheyt, in de ghene die verloren gaen, daerom dat sy de liefde der waerheyt niet aenghenomen en hebben om salich te worden.

k Oft, bedroch

11

^l Ende daerom sal hen God senden ^m de werckinghe der dwalinghe, op dat sy de leugen gheloouen:

l Roman. 1.c.25

m Of, krachtighe dwalinghe,

12

Op dat sy alle ⁿ gheoordeelt worden die de waerheydt niet ghelooft en hebben: maer hebben een welbehaghen ghehadt in der ongherechticheyt.

n Of, verdoemt

13

Maer wy moeten God altijdt dancken voor v, lieue broeders in den Heere, dat v God van den beginne verkoren heeft tot salicheyt, ^o door de heylichmakinghe des Gheests, ende ghelooue der waerheyt:

o Griecx, in

14

Waertoe hy v gheroepen heeft, door onse Euangelium, om te verkrijghen de eerlickheydt onses Heeren Iesu Christi.

15

So dan, broeders, staet ende houdt de insettinghen die v gheleert zijn, het zy door onse woordt oft Sendbrief.

16

Ende onse Heere Iesus Christus, ende onse

[fol. 78r]

God ende Vader die ons heeft lief gehadt, ende ghegheuen eenen eewighen troost, ende goede hope, ^p door de ghenade,

p Griecx, in

17

Die vertrooste uwe herten, ende verstercke v in allen goeden woorde ende wercke.