Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE EERSTE Sendtbrief Pauli tot Timotheum.

Dat Eerste Capittel.

3 De onnutte vraghen zijn te schuwen, 12. hoedanich Paulus gheweest is, ende hoedanich hy is, 20. Hymeneus ende Alexander vyanden der reyner leere.

A.1

PAulus een Apostel Iesu Christi ^a na ^b het beuel Gods onses Salichmakers, ende des Heeren Iesu Christi, ^c die onse hope is:

a Actuum 9 b.15

b Of, de ordeninghe

c Coloss. 1.c.27

2

^d Timotheo [mynen] oprechten sone in den ghelooue: ^e Ghenade vrede ende barmherticheyt [zy v] van Gode onsen Vader, ende Christo Iesu onsen Heere.

d Actuum 16.a.1 1.Thess. 3.a.2

e Galat. 1.a.3 1.Petri 1.a.2

3

Ghelijck ick dy ghebeden hebbe, ^f als ick na Macedoniam ghinck dat du te Ephesen blijuen soudst, [also blijft daer,] om de sommighe te vermanen, dat sy gheen ander leere en leeren:

f Actuum 20.a.1

4

Noch acht hebben ^g op fabulen, ende oneyndelicke gheslachtrekeninghen: ^h de welcke meer vragingen voortbrengen dan stichtinge Gods, die in het ghelooue is.

g 1.Timot. 4.a.7 ende 6.c.20 2.Timoth. 2.b.16 Titi 1.b.14 ende 3.a.9

h 1.Timot. 6.a.4

5

ⁱ Maer het eynde des ghebots, is de liefde wt reynen herte, ende goeder consciencie, ende ongheueynsden ghelooue.

i Rom. 13.a.8.b.10 Gala 5.b.14

6

Van de welcke de sommighe zijn afgedwaelt, ende gheweken tot ijdel sprekinghe,

7

Willende Leeraers der Wet zijn, ende verstaen niet wat sy segghen, noch wat sy beuestighen.

8

Wy weten, ^k dat de Wet goet is, ist datse yemant wettelick ghebruyckt:

k Roman. 7.b.12

9

Wetende dit, [namelick,] ^l dat den rechtueerdighen de Wet niet gheset en is, maer den ongherechtighen ende onghereghelden, ongodlicken ende sondaren, den onheylighen ende onreynen, den vadermoorders ende moedermoorders, dootslaghers,

l Galat. 5.c.23

B.10

Hoereerders, die by mannen ligghen, menschendieuen, leugenaers, meyneedigen, ende so daer yet anders is teghen de ghesonde leere,

11

[De welcke is] na het Euangelium der eerlickheydt ^m des salighen Gods, het welcke my betrouwt is.

m 1.Timot. 6.b.15

12

Ende ick dancke hem die my krachtich ghemaeckt heeft, [namelick,] Christo Iesu onsen Heere: dat hy my ghetrouwe gheacht heeft, settende my inden dienst,

13

ⁿ Die ick te voren een lasteraer was, ende veruolgher, ende verdrucker: maer my is barmherticheyt geschiet, ^o om dat ick het onwetende gedaen hebbe ^p door ongheloouicheyt.

n Actuum 8.a.3 ende 9.a.1 ende 22.a.4 ende 26.a.9 1.Corinth. 15.a.9 Galat. 1.b.13

o Ioannis 9.d.39 Actuum 3.b.17

p Griecx, in Matt. 9.b.13.

14

Maer de ghenade onses Heeren Iesu Christi is seer oueruloedich, geweest met den ghelooue ende liefde in Christo Iesu.

15

Dit is een ghetrouwe woordt, ende aller aenneminghe weerdich, ^q dat Christus Iesus in de werelt gekomen is om de sondaren salich te maken: onder de welcke ick de ^r meeste ben.

q Marci 2.b.17 Luce 5.d.32 ende 19.b.10 1.Timot. 1.b.15 1.Ioannis 3.a.5

r Griecx, eerste

16

Maer daerom is my barmherticheydt gheschiedt, om dat Iesus Christus soude in my, die ick de meeste ben, alle syne lanckmoedicheyt bewijsen, tot een exempel den ghenen die in hem gheloouen souden ten eewighen leuen.

17

Den Koninck der eeuwen, den onuerganc-

[fol. 78v]

licken, onsienlicken, ende alleene wijsen Gode, zy eere ende prijs in der eewicheyt. Amen.

18

Dit gebot beuele ick dy mijn sone Timothee, [namelick,] ^s dat du na de voorgaende Prophecien ouer dy, in de selue eenen goeden strijdt strijdest:

s 1.Timot. 6.b.12

19

^t Behoudende het ghelooue, ende een goede consciencie: de welcke sommighe verworpende, hebben in het ghelooue schipbrekinge geleden.

t 1.Timoth. 3.a.9

20

Onder de welcke is ^u Hymeneus ende ^x Alexander, ^y die ick den Satan ouerghegheuen hebbe, op dat sy leeren niet lasteren.

u 2.Timot. 2.b.17

x 2.Timo. 4.b.14

y 1.Corinth. 5.a.3