Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Door onsekerheyt des laetsten daechs, vermaent hyse tot verscheyden wercken des Christelicken leuens, 23. ende begheert ende beloeft hen alle goet.

A.1

MAer van de tijden ende stonden broeders, is niet van noode v te schrijuen:

2

Want ghy weet selue seer wel ^a dat de dach des Heeren komen sal ghelijck een dief inder nacht.

a Matth. 24.e.43 2.Petri 3.b.10 Apoca. 3.a.3 ende 16.b.15

3

Want als sy sullen segghen, [Het is] vrede ende sonder sorghe: dan sal hen een snelle verderuinge oueruallen, gelijck de wee ouer een beuruchte vrouwe: ende sy sullens niet ontulieden.

4

^b Maer ghy broeders, ghy en zijt niet in duysternisse, dat v dien dach soude als een dief beuanghen:

b Ephes. 5.a.8

5

Ghy zijt alle kinderen des lichts, ende kinderen des daechs: wy zijn niet van der nacht, noch duysternisse.

6

^c So en laet ons dan niet slapen, gelijck de andere: maer laet ons waken ende nuchteren zijn.

c Roma. 13.b.11.13 Ephes. 5.b.14

7

Want die slapen, slapen des nachts, ende die droncken zijn, zijn des nachts droncken.

8

Maer wy die des daechs zijn, laet ons nuchter zijn, becleet met de borstwapen des geloofs, ende liefde, ^d ende met den Helm der hope der salicheyt.

d Ephes. 6.b.17 Esaie 59.b.17

9

Want God en heeft ons niet gheset tot toorne, maer om salicheyt te ghekrijgen door onsen Heere Iesum Christum:

B.10

Die voor ons ghestoruen is, ^e om dat wy, of wy waken, of slapen, te samen met hem leuen souden.

e Roman. 14.a.7 2.Corinth. 5.b.15 Galat. 2.c.20 1.Petri 4.a.2

11

Daerom vermaent malcanderen, ende de een stichte den anderen, ghelijck ghy oock doet.

12

Ende wy bidden v broeders, ^f bekent de ghene die onder v arbeyden, ende v voorstaen inden Heere, ende v vermanen:

f Roman. 15.c.27 1.Corinth. 9.b.11 Galat. 6.a.6 Phil. 2.c.29 1.Timoth. 5.b.17 Hebre. 13.a.7.b.17

13

Ende houdtse in grooter eeren in de liefde, om haers wercks wille: weest vreedsaem met hen.

14

Ende wy bidden v broeders, vermaent de onghereghelde, vertroost de kleynmoedighe, helpt de krancke op: weest lanckmoedich tegen eenen yeghelicken.

15

^g Siet dat niemant yemande quaet voor quaet en verghelde: maer volghet alle tijdt dat goede na onder malcanderen, ende teghen een yeghelicken.

g Leuitici 19.b.18 Prouerb. 20.c.22 ende 24.c.29 Matthei 5.d.39 Roman. 12.b.17 1.Corinth. 6.a.7 1.Petri 3.a.9

[fol. 77v]

16

^h Weest alle tijt blijde.

h Matthei 5.b.12 Luce 10.c.20 Roman. 12.b.12 Philippen. 4.a.4

17

ⁱ Biddet sonder ophouden.

i Luce 18.a.1 Roman. 12.b.12 Coloss. 4.a.2

18

^k Weest danckbaer in alle dinghen: want dit is de wille Gods in Christo Iesu aen v.

k Ephes. 5.c.20

19

^l Bluscht den Gheest niet wt.

l 1.Corin. 14.d.30

C.20

Veracht de Prophecie niet.

21

Proeft alle dinck, [ende] behoudt het goede.

22

^m Onthoudt v van allen boosen schijn.

m 2.Mach. 6.c.24

23

ⁿ Ende de God des Vredes heylighe v gheheel volmaecktelick, ende uwen volmaeckten gheest, ende ziele, ende lichaem worde bewaert onstraffelick in de toekoemste onses Heeren Iesu Christi.

n 1.Corinth. 1.a.8 1.Thess. 3.b.13

24

^o Hy die v gheroepen heeft, is ghetrouwe, de welcke het oock doen sal.

o 1.Corinth. 1.a.8 ende 10.b.13 2.Corinth. 13.b.12 1.Petri 5.b.4

25

Broeders bidt voor ons.

26

^p Groet alle de broederen met eenen heylighen kusse.

p Roman. 16.b.15 1.Corinth. 16.c.20

27

Ick besweere v bij den Heere, dat dese Sendbrief allen den Heylighen broederen ghelesen worde.

28

De ghenade onses Heeren Iesu Christi, zy met v. Amen.

De eerste Sendbrief tot de Thessalonicensen, gheschreuen van Athenen.