Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

1. Hy vermaentse tot heylicheyt, 4. onnooselheyt, 9. liefde, 11. arbeyt, 13. ende maticheyt in haer droefheyt ouer de dooden, 14. beschrijuende het eynde der opstandinghe der dooden.

A.1

VOort dan, broeders, wy bidden ende vermanen v inden Heere Iesu, ghelijck ghy van ons ontfangen hebt ^a hoe ghy moet wandelen ende Gode behaghen, dat ghy [daer in] meer oueruloedich zijt.

a 1.Thess. 2.b.12 Philippen. 1.c.27

2

Want ghy weet wat gheboden wy v ghegeuen hebben door den Heere Iesum.

3

^b Want dit is den wille Gods, [namelick,] uwe heylichmakinge, [dat is,] ^c dat ghy v onthoudt van hoererie:

b Roman. 12.a.2 Ephes. 5.b.17

c Actuum 15.c.20

4

Dat een yeghelick onder v wete zijn vat te besitten in heylicheyt ende eerlickheyt:

5

Ende niet in quade beweginghen der begeerlickheyt, ghelijck de Heydenen die God niet en kennen:

6

Dat niemant synen broeder verdrucke, noch en bedrieghe: want God is een wreker ouer alle desen, ghelijck wy v te voren gheseyt ende betuycht hebben.

7

Want God en heeft ons niet gheroepen tot onreynicheyt, ^d maer tot heylicheyt.

d Ioannis 17.b.19 1.Corinth. 1.a.2

8

^e So dan wie [sulcke gheboden] verworpt, die verworpt gheenen mensche, maer [verworpt] God, ^f die synen heylighen Gheest in v gheeft.

e Luce 10.b.16

f 1.Corint. 7.e.40

9

^g Voort van der broederlicker liefde en hebt ghy gheenen noot dat ick v schrijue: want ghy zijt selue van Gode gheleert malcanderen lief te hebben.

g Leuitici 19.b.18 Matthei 22.d.39 Ioannis 13.d.34 ende 15.b.12 Ephes. 5.a.2 1.Petri 4.a.8 1.Ioannis 3.d.33 ende 4.c.21

B.10

Want ghy doet dat oock allen den broederen die in gheheel Macedonia zijn: maer wy vermanen v broeders, dat ghy noch oueruloedigher wordt:

11

^h Ende neersticheydt doet om in stilheyt te leuen, ende het uwe te doen, ⁱ ende te wercken met uwe eyghen handen, ghelijck wy v beuolen hebben.

h 2.Thess. 3.a.8 b.12

i Actuum 20.d.35 Ephes. 4.c.28 2.Thess. 3.a.8.b.12

12

Op dat ghy moecht by de ghene die buyten zijn, eerlick wandelen, ende gheens dincks ghebreck hebben.

13

Ick en wil oock niet dat ghy onwetende zijt van de gene die ontslapen zijn, ^k op dat ghy niet bedroeft en zijt gelijck de andere ^l die gheen hope en hebben.

k Syrach 22.b.10 ende 38.b.17

l Sapient. 2.c.22

14

Want ist dat wy gheloouen dat Christus gestoruen is, ende opghestaen: also sal oock God de ghene die in Christo ontslapen zijn, met hem versamelen.

15

Want dat segghen wy v door het woordt des Heeren, ^m dat wy die leuen ende ouerblijuen tot de toekoemste des Heeren, sullen de ghene die ontslapen zijn niet voorgaen.

m 1.Corin. 15.c.23 f.51

16

ⁿ Want de Heere selue sal met eenen geschreye ende stemme des ^o Archanghels, ende basuyne Gods nederkomen vanden Hemel, ende die in Christo ghestoruen zijn, sullen eerst op staen:

n Matth. 24.d.31 1.Corinth. 15.f.51 2.Thess. 1.a.7

o Dat is, Ouerenghels,

17

Daer na wy die leuen ende ouerghebleuen zijn, sullen te samen met hen opghenomen worden in de wolcken, den Heere te ghemoete in de lucht: ende also sullen wy altijdt met den Heere wesen.

18

So dan vertroost malcanderen met dese woorden.