Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

2. Hy gaet voort, bewijsende synen goeden wille tot hen door het senden Timothei, 9. ende door zijn ghebeden voor hen.

A.1

DAerom als wy [dese begeerte] niet langher en konden verdraghen, so heuet ons goet ghedocht dat wy souden alleen te Athenen blijuen.

2

Ende hebben ^a Timotheum onsen broeder ende Dienaer Gods, ende onsen medearbeyder inden Euangelio Christi, ghesonden om v te verstercken ende te vertroosten in ^b† uwen ghelooue:

a Actuum 16.a.1 Roman. 16.c.20 Phil. 2.b.19

b† Anders, onse

3

^{c d} Op dat niemant beweecht en worde in dese verdruckinghen: want ghy weet selue, ^e dat wy hier toe ghestelt zijn.

c Ephes. 3.b.13 Philippen. 1.b.14

d Of, met

e Actuum 14.c.22 2.Timothei 3.b.12

[fol. 77r]

4

Want oock doe wy by v waren, voorseyden wy v dat wy souden verdruckt worden: ghelijck het oock gheschiet is, ende ghy wetet.

5

Hierom hebbe ick het niet langer konnen verdraghen, maer hebbe [hem] gesonden om uwe ghelooue te kennen: dat v niet eenichsins de Versoecker versocht en hadde, ende onse arbeydt ^* te vergheefs ware.

* Griecx, ijdel

6

Ende als Timotheus nu van v tot ons quam, ende ons uwen ghelooue, ende liefde verkondichde, ende dat ghy alle tijt goede ghedachtenisse van ons hebt, altijts begeerende ons te sien gelijck wy oock v:

7

Hier door, broeders, zijn wy van v in alle onse verdruckinghe ende noot ghetroost, door uwen ghelooue.

8

Want nu leuen wy, ist dat ghy staet inden Heere.

9

Want wat dancksegginge konnen wy Gode wedergheuen voor v, in alle onse blijschap waer mede wy ons verblijden voor onsen Gode om uwent wille?

B.10

^f Dach ende nacht ouerseer biddende om uwe aensichte te sien, ende ter veruullen dat aen uwen ghelooue ghebreeckt?

f Roman. 1.b.11 ende 15.c.23 2.Timoth. 1.b.10

11

Ende onse God, ende onse Heere Iesus Christus, schicke onsen wech tot v.

12

Ende de Heere veruulle v, ende make v oueruloedich in der liefde tot malcanderen, ende tot eenen yegelicken (ghelijck wy oock [zijn] tot v.)

13

^g Op dat hy uwe onstraffelicke herten verstercke tot heylicheyt voor onsen God, ende Vader, in de toekoemste onses Heeren Iesu Christi, met alle syne Heylighen.

g 1.Corinth. 1.a.8 1.Thessal. 5.c.23