Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Op dat sy niet en beswijcken onder het cruyce, so prijst hy zijn neersticheyt int prediken, 3. ende hare neersticheyt in ghehoorsaemheyt, 16. daer na ontschuldicht hy hem dat hy tegenwoordichlick zijn herte tot hen niet en heeft konnen ontdecken.

A.1

VVant ^a ghy weet selue broeders, onsen inganck tot v, dat hy niet ijdel geweest en is:

a 1.Thess. 1.a.5.9

2

Maer hoewel wy te voren gheleden hadden, ende besmadicht gheweest hadden ^b te Philippis, ghelijck ghy weet, so waren wy vrijmoedich in onsen God, om het Euangelium Gods ^c tot v te spreken met veel strijdts.

b Actuum 16.c.22

c Actuum 17.a.2

3

Want onse vermaninghe en was niet wt verleydinghe, noch wt onreynicheyt, noch met bedroch:

4

Maer ghelijck wy ^d Gode behaecht hebben, dat hy ons het Euangelium betrout heeft, also spreken wy, ^e niet als den menschen behaghende, maer Gode die onse herten ^f beproeft.

d Oft, van Gode gheacht zijn,

e Galat. 1.b.10

f Ofte, goet acht.

5

Want wy en hebben noyt met flatterende woorden omme ghegaen, ghelijck ghy weet, noch met een bedecksel der ghiericheyt, ^g God is des ghetuyghe:

g Roman. 1.a.9 ende 9.a.1 2.Corinth. 1.c.23 ende 11.d.31 Gala. 1.c.20 Philip. 1.a.8 1.Timothei 5.c.21 2.Timothei 4.a.1

6

Noch eere van menschen soeckende, noch van v, noch van andere.

7

Hoe wel wy hadden mogen ^h lastich zijn, als Apostelen Christi, ⁱ maer wy zijn ^k† vriendelick gheweest midden onder v, gelijck of een voester haer kinderen voedde.

h Of, in eere zijn,

i 1.Corinth. 9.a.4 2.Thessal. 3.a.9

k† Anders, kleyne

8

Also [segghe ick] ouer v beweecht [zijnde,] begheerden wy v te geuen niet alleene het Euangelium Gods, maer oock onse eyghen ^l leuen, daerom dat wy v lief hadden.

l Griecx, zielen,

9

^m Want ghy zijt indachtich, broeders, onser moeyte ende arbeyts: want wy hebben v het Euangelium ghepredict, werckende nacht ende dach, om dat wy niemanden van v en souden lastich zijn.

m Actuum 18.a.3 ende 20.d.33 1.Corinth. 4.b.12 2.Corinth. 11.a.9 ende 12.b.13 2.Thessal. 3.a.8

B.10

Ghy zijt ghetuygen ende God, hoe heylichlick, ende rechtueerdichlick, ende onstraffelick wy v die ghy ghelooft, gheweest zijn:

11

Ghelijck ghy weet, hoe wy eenen yeghelicken onder v, ghelijck een vader zijn kint,

12

Vermaenden, ende troosteden: wy betuychden ⁿ dat ghy soudt wandelen weerdichlick Gode die v gheroepen heeft tot zijn Koninckrijcke ende eerlickheyt.

n Genes. 17.a.1 1.Corinth. 7.c.20 Ephes. 4.a.1 Philippen. 1.c.27 Coloss. 1.b.10

13

Hierom dancken wy oock God sonder ophouden, dat ghy, als ghy het woort ^o der predikinghe Gods van ons aennaemt, dat niet [als] der menschen woort ontfanghen hebt, maer (ghelijck het in der waerheyt is) [als] Gods woort, ^p het welcke oock werckt in v, die ghy gheloouet.

o Griecx, des gehoors

p Of, de

14

Want ghy broeders, zijt nauolghers gheworden der Ghemeynten Gods die in Iudea zijn, in Christo Iesu, dewijle ghy oock het selue gheleden hebt van uwe eyghen gheslachte, ^q ghelijck oock sy vanden Ioden:

q Actuum 17.b.13

15

^r De welcke den Heere Iesum ghedoodt hebben, ende ^s hare eyghen Propheten, ende hebben ^t ons ^u veruolcht, ende en behaghen Gode niet, ende staen teghen alle menschen,

r Actuum 7.f.52

s Matthei 23.d.37 Luce 13.d.34

t Of, v

u Of, wtghedreuen,

16

^x Ende verbieden ons te spreken tot de Heydenen, op dat sy salich worden: op dat sy alle tijt hare sonden veruullen: maer den toorn Gods is ouer hen tot den eynde.

x Actuum 17.b.13

17

Ende wy, broeders, die een kleyne wijle tijts van v berooft zijn, na den aensichte, niet na het herte, wy hebben met grooter begheerte oueruloedelicke neersticheyt ghedaen uwe aensichte te sien.

18

^y Daeromme hebben wy willen tot v komen, (Ick Paulus) ^z tweemael: ende de Satanas heeft ons verhindert.

y Roman. 1.b.13 ende 15.c.22

z Griecx, eens ende oock andermael:

19

^a Want wat is onse hope, of blijschap, of kroone des roems? Zijt ghy het oock niet voor onsen Heere Iesu Christo in syne toecoemste?

a 2.Corint. 1.b.14 Philippen. 2.b.16

20

Want ghy zijt onse eerlicheyt ende blijschap.