Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 76v]

DE EERSTE Sendbrief Pauli totten Thessalonicensen.

Dat Eerste Capittel.

1. Hy prijstse dat sy midden in de verdruckinghen so wel voortghegaen zijn in de kennisse des Euangeliums door hem verkondicht, 7. dat sy gheworden zijn exempelen den anderen.

A.1

PAulus ende Siluanus ende Timotheus: der Ghemeynte in Thessalonica, in God den Vader, ende den Heere Iesu Christo: ^a Ghenade ende vrede zy v van Gode onsen Vader, ende den Heere Iesu Christo.

a Roman. 1.a.7 Ephes. 1.a.2 1.Petri 1.a.2

2

^b Wy dancken God alletijt van v allen, ende ghedencken uwer in onse ghebeden:

b Ephes. 1.b.15 Philip. 1.a.3 Colossen. 1.a.3 2.Thess. 1.a.3

3

Sonder ophouden ghedachtich [zijnde] ws ^c wercks des geloofs, ende arbeyts der liefden, ende gheduersaemheyts in der hope onses Heeren Iesu Christi, voor onsen God ende Vader:

c Ioannis 6.c.29

4

Wetende beminde broeders, dat uwe verkiesinghe van Gode is:

5

^d Want onse Euangelium en heeft by v niet gheweest alleenlick inden woorde: maer oock in der macht, ende heylighen Gheeste, ende in vele versekertheyt: ^e ghelijck ghy weet, hoedanich wy onder v gheweest zijn om uwent wille.

d 1.Corinth. 2.a.4 ende 4.c.20 2.Petri 1.b.16

e 1.Thessal. 2.a.1

6

^f Ende ghy zijt onse nauolghers gheworden, ende des Heeren: ende hebt het woort aenghenomen in vele verdruckinghe, met blijschap des heylighen Gheests.

f 1.Corint. 4.b.16 ende 11.a.1 Philippen. 3.b.17 2.Thessal. 3.a.9

7

So dat ghy ^g exempelen gheworden zijt allen gheloouighen in Macedonia ende Achaia.

g Of, voorbeelden

8

Want van v is luydtbaer gheworden niet alleenlick het woordt Gods in Macedonia ende Achaia: maer oock tot alle plaetse is uwe gelooue aen God wtgekomen: so dattet niet noodich en is dat wy yet [daer van] segghen.

9

Want sy selue vercondighen van v hoedanighen inganck wy tot v ghehadt hebben: ende hoe ghy tot God bekeert zijt vanden Afgoden, om den leuendigen ende warachtigen God te dienen:

10

^h Ende synen Sone wt de Hemelen te verwachten, den welcken hy wt de dooden verwect heeft, [namelick] ⁱ Iesum, die ons vanden toekomenden toorn verlost.

h Actuum 1.b.11 2.Thessal. 1.b.10 Apoca. 1.a.7

i Dat is, Salichmaker