Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

2. Uermaninghen tot waken ende ghebeden, waer van hy begheert deelachtich te wesen, 7. ende sendt hen Tychicum ende Onesimum, 14. groetenissen tot velen.

A.1

GHy ^a heeren, doet uwen dienstknechten recht ende ghelijck, de wijle ghy weet dat ghy oock eenen Heere in de Hemelen hebt.

a Syrach 7.c.22 ende 33.c.29 Ephe. 6.a.9

2

^b Weest gheduerich inden ghebede, ende waeckt daer in met dancksegghinghe.

b Luce 18.a.1 Roman. 12.b.12 Ephes. 6.b.18 1.Thessal. 5.b.17

3

^c Ende bidt ooc mede voor ons, dat ons God de deure des woorts open doe, op dat wy de verborghentheyt Christi spreken, waerom ick oock ^d gheuanghen ben:

c Ephes. 6.b.19 2.Thessa. 3.a.1

d Griecx, gebonden

4

Op dat ick die openbare, ghelijck het my betaemt te spreken.

5

^e Wandelt ^f met wijsheyt by de ghene die buyten zijn, ende ^g koopt de bequaemheyt des tijts wt.

e Syrach 27.b.12 Ephe. 5.b.15

f Griecx, in

g Roman. 12.b.11 Ephe. 5.b.16

6

^h Vwe woort [zy] alle tijt lieflick met soute ghemengt, dat ghy weet hoe ghy eenen yeghelicken antwoorden moet.

h Marci 9.f.50

7

Alle myne saken, sal v te kennen gheuen ⁱ Tychicus die lieue broeder, ende ghetrouwe Dienaer ende ^k medehulper inden Heere:

i Actuum 20.a.4 2.Timoth. 4.b.12

k Griecx, mededienstknecht

8

Den welcken ick daer toe ghesonden hebbe, op dat hy uwe saken wete, ende uwe herten trooste:

9

Met ^l Onesimo den ghetrouwen ende lieuen broeder, de welcke vanden uwen is: sy sullen [dan] v alle dinghen te kennen gheuen die hier gheschieden.

l Philem. b.10

B.10

V groet ^m Aristarchus mijn medegheuangen ende ⁿ Marcus de neue Barnabe, (vanden welcken ghy hebt gheboden ontfanghen: ist dat hy tot v koemt, ontfangt hem.)

m Actuum 27.a.2

n Actuum 15.d.37 2.Timoth. 4.b.11

11

Ende Iesus ghenaemt Iustus: de welcke wt de Besnijdinghe zijn, alleene dese mede arbeyders aen het Koninckrijcke Gods, zijn my een vertroostinghe gheweest.

12

V groet ^o Epaphras die wt v is een Dienstknecht Christi, alle tijt voor v strijdende in ghebeden, op dat ghy moecht staen volmaeckt ende volcomen in alle den wille Gods.

o Colossen. 1.a.7 Philem. c.23

13

Want ick gheue hem ghetuyghenisse, dat hy groote vyericheyt heeft ouer v, ende de ghene die in Laodicea zijn, ende de ghene die te Hierapolen zijn.

14

V groet ^p Lucas de Medecijnmeester, die beminde, ende ^q Demas.

p 2.Timot. 4.b.11

q 2 Timot. 4.b.10

15

Groet de broederen die in Laodicea zijn, ende Nympham, ende de Ghemeynte die in zijn huys is.

16

Ende als de Sendtbrief sal van v ghelesen wesen, maeckt dat hy oock in de Ghemeynte te Laodiceen ghelesen worde: ende dat ghy oock dien [Sendbrief] van Laodicea leest.

17

Ende segt Archippo: Siet toe, dat du den dienst veruullest, dien du aenghenomen hebst inden Heere.

18

^r De groetenisse met mijnder hant, Pauli. ^s Ghedenckt myne banden. De ghenade zy met v. Amen.

r 2.Thess. 3.b.17

s Hebre. 13.a.3

Tot de Colossensen gheschreuen van Roomen, [ghesonden] door Tychicum ende Onesimum.