Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Wercken des warachtighen Godsdienst teghen de ijdele onderwijsinghen der valscher Apostelen, 5. Uermaninghe tot doodinghen des vleeschs, ende nieuwicheyt des leuens, ende behoorlickheden der Christenen.

A.1

ISt dan dat ghy met Christo opgewect zijt, so soect het ghene dat bouen is, ^a daer Christus is sittende ter rechter hant Gods.

a Ephes. 3.c.20

2

Besorcht dat bouen is, niet dat op der Aerden is:

3

^b Want ghy zijt ghestoruen, ende uwe leuen is met Christo verborghen in Gode.

b 2.Corin. 4.b.11

4

^c Als Christus onse leuen sal gheopenbaert wesen, dan sult ghy oock met hem geopenbaert worden in eerlickheyt.

c Philip. 3.c.21 1.Ioannis 3.a.2

5

^d So doodt dan uwe aertsche leden, hoererie, onreynicheyt, quade beweghinghen, quade begheerten, ende ghiericheyt, de welcke is Afgodendienst:

d Ephe. 4.c.29 ende 5.a.3

6

^e Om de welcke den toorn Gods koemt ouer de kinderen der onghehoorsaemheyt.

e 1.Corint. 6.b.10 Galat. 5.c.21 Ephe. 5.a.5 Apocal. 22.b.15

7

^f In de welcke ghy oock voortijden wandeldet, als ghy daer in leefdet.

f 1.Corinth. 6.b.11 Ephes. 2.a.2 Titi 3.a.3

8

^g Maer nu legt ghy oock dit alle af, toorn, verbolghentheyt, qaetheyt, lasteringhe, vuylspreken wt uwen monde.

g Ephes. 4.c.22 Hebre. 12.a.1 1.Petri 2.a.1 Iacobi 1.c.21

9

Lieghet niet deen teghen den anderen, na dat ghy wtghedaen hebt den ouden mensche met syne wercken:

B.10

^h Ende hebbet aenghedaen den nieuwen, die welcke vernieut wort tot kennisse, na de ⁱ gelijckenisse des ghenen die hem gheschapen heeft.

h Roman 6.a.4

i Genes. 1.c.26.27 ende 5.a.1 ende 9.a.6 1.Corint. 11.a.7

11

^k Waer inne niet en is Grieck ende Iode, Besnijdinge ende Voorhuyt: ^l verre vreemde Scytha, dienstknecht, vrije: maer Chistus al ende in allen.

k Galat. 5.a.6 ende 6.b.15

l Of, Barbarisch

12

^m So weest dan bekleedt (als wtuerkoren Heylighe ende beminde Gods,) met de hertgrondelicke barmherticheyt, vriendelickhheyt, ootmoedicheyt, saechtmoedicheyt, lanckmoedicheyt:

m Ephes. 4.d.32 ende 6.b.11

13

Verdraghende malcanderen, ⁿ ende vergheuende ^o malcanderen, ist dat yemant tegen eenighen klachte heeft: ghelijck Christus v vergheuen heeft, [doet] ghy oock also.

n Syrach 28.a.2 Matthei 6.b.14 Marci 11.c.25 Ephes. 4.d.32

o Of, v seluen

14

^p Ende bouen al dit, [doet aen] de liefde, ^q de welcke is de bant der volcomenheyt.

p Ioannis 13.d.34 ende 15.b.12 Ephes. 5.a.2 1.Thessal. 4.a.9 1.Ioannis 3.c.23 ende 4.c.21

q 1.Cor. 13.a.1.2.3

15

Ende de vrede Gods hebbe de ouerhant in uwe herten, tot de welcke ghy oock gheroepen zijt in eenen lichame, ende weest ^r lieflick.

r Of, danckbaer

16

Het woort Chisti woone rijckelick in v met alle wijsheyt, ^s leert ende vermaent malcanderen: ende singt den Heere in uwe herten met psalmen ende lofsanghen, ende gheestelicke liedekens.

s Ephes. 5.b.19

17

^t Ende al wat ghy doet met woorden ofte met wercken, [doet het] al inden naem des Heeren Iesu, ^u danckende God ende den Vader door hem.

t 1.Corint. 10.d.31

u Ephes. 5.c.20 1.Thessal. 5.b.18

18

^x Ghy vrouwen, weest uwen mannen onderdanich ghelijck het betaemt inden Heere.

x Gene. 3.b.16 1.Corint. 14.d.34 Ephe. 5.c.22 Titi 2.a.5 1.Petri 3.a.1

19

^y Ghy mannen hebt uwe wijuen lief, ende en weest niet bitter teghen haer.

y Ephe. 5.c.25

C.20

^z Ghy kinders, weest uwen ouderen in allen ghehoorsaem: want dat is den Heere behagelick.

z Ephes. 6.a.1

21

Ghy vaders verbittert uwe kinderen niet, dat sy niet mismoedich en worden.

22

^a Ghy Dienstknechten, weest in allen ghehoorsaem den ghenen die na den vleessche heeren zijn, niet met dienste na der ooghe, als die den menschen soecken te behaghen: maer met eenuoudicheyt des herten ^b door de vreese Gods:

a Ephes. 6.a.5 1.Timothei 6.a.1 Titi 2.a.9 1.Petri 2.b.18

b Griecx, vreesende God:

23

Ende al wat ghy doet, dat doet van herten, als den Heere, ende niet den menschen.

24

De wijle ghy weet dat ghy vanden Heere de vergheldinghe der erffenisse ontfanghen sult: want ghy dient den Heere Christo.

25

Maer wie onrecht doet, die sal dat onrecht draghen dat hy ghedaen sal hebben, ^c ende daer en is gheen wtneminghe der persoonen.

c Deuter. 10.b.17 2.Para. 19.a.7 Iob 34.b.19 Sapient. 6.a.8 Syrach 35.c.21 Actuum 10.d.34 Roman. 2.b.11 Galat. 2.a.6 Ephe. 6.a.9 1.Petri 1.b.17