Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Hy betuycht zijn liefde tot hen, 6. datmen moet alleen op Christum rusten, 16. verworpinghe der valscher diensten ende Ceremonien die te niete ghemaeckt zijn door Christum.

A.1

VVant ick wil dat ghy weet, hoe swaren strijdt ick hebbe voor v, ende voor deghene die in Laodicea zijn, ende [voor] allen die mijn aensichte inden vleessche niet ghesien en hebben:

2

Op dat hare herten vertroost worden, te samen gheuoecht in de liefde, ende tot allen rijckdom des ontwijffelicken verstants, [namelick,] ^a tot de bekenninge der verborgentheyt Gods, beyde des Vaders ende Christi:

a Esaie 53.b.11 Ieremie 9.c.23 Ioannis 17.a.3 Philip. 3.a.8

3

^b In den welcken zijn alle de schatten der wijsheyt ende kennisse verborghen.

b 1.Corint. 1.c.22

4

Ende dit segghe ick, ^c op dat v niemant en bedrieghe door valsche redenen, met woorden die eenen schijn hebben.

c Ephes. 5.a.6 Coloss. 2.b.18

5

^d Want hoe wel ick na den vleessche van v ben, so ben ick nochtans na den Gheest by v, verblijde my, ende sie uwe ordeninghe, ende de vasticheyt ws gheloofs in Christum.

d 1.Corinth. 5.a.3

6

Ghelijck ghy dan Christum Iesum den Heere hebt aenghenomen, [also] wandelt in hem:

7

Ghewortelt ende opghetimmert in hem, ende versterckt inden ghelooue, ghelijck ghy geleert zijt: ^e ende weest oueruloedich daer in, ^f met dancksegghinghe.

e 1.Corinth. 1.a.5

f Griecx, in

8

^g Siet toe dat daer niemant zy die v rooue door ^h menschelicke wijsheyt, ende ijdel verleydinge, [leerende] na insettinghe der menschen, na de ⁱ ordeningen der werelt, ende niet na Chistum:

g Roman. 16.b.16 Hebre. 13.a.9

h Griecx, Philosophie,

i Of, beghinselen

9

^k Want in hem woont de geheele volheyt der Godheyt lichamelick:

k Ioannis 1.b.14 Colossen. 1.b.19 2.Corinth. 5.b.19

B.10

^l Ende ghy zijt in hem volmaect, die het Hooft is aller Ouerheyt ende Macht:

l Ioannis 1.b.16

11

^m Door den welcken ghy oock besneden zijt met der besnijdinghe die sonder handen geschiet, in de wttreckinghe des lichaems der sonden des vleeschs, door de besnijdinghe Christi,

m Roman. 2.c.29 Phil. 3.a.3 Deuter. 10.b.16 ende .30.a.6 Ieremie 4.a.4

12

ⁿ Ende zijt met hem begrauen door den Doop, waer door ghy oock met hem opgheweckt zijt, ^o door het gelooue Gods die krachtelick werct, de welcke hem vanden dooden opghewect heeft.

n Roman. 6.a.4 Galat. 3.c.27

o Ephes. 1.b.19 ende 3.a.7

13

^p Ende heeft v die ghy doodt waert door de sonde, ende [door] de Voorhuydt ws vleeschs, mede leuendih ghemaeckt met hem, ende heeft v alle de misdaden vergheuen,

p Ephe. 2.a.1

14

Ende heeft wtghewischt het hantschrift der insettinghen dat teghen ons was: het welcke [segghe ick] ons teghen was, maer hy heeft dat wt den midden wech ghenomen, ende aen het cruyce ghehecht:

15

^q Ende heeft de Ouerheden ende Machten berooft, ende ^r† in dat [cruyce] openbaerlic gheuoert ten toone, ende ouer hen ghetriumpheert.

q Genes. 3.b.15 Matthei 12.c.29 Luce 11.c.22 Ioannis 12.d.31 ende 16.b.11 Ephes. 6.b.12

r† Anders, in hetseluen

16

^s Dat v dan niemant en oordele in eten of in drincken, of in ^t den deele des Feestdachs, of Nieumaents, of der Sabbathen:

s Leuitici 11.a.2 Roman. 14.a.3

t Leuitici 23.a.2

17

^u De welcke zijn de schaduwe der toekomenden dinghen: maer het lichaem [is] Christi.

u Heb. 8.a.5 ende 10.a.1

18

^x Dat v dan niemant qualick ^y regere eyghenwillich door ootmoedicheyt ende dienst der Enghelen, hemseluen instekende in het ghene dat hy niet ghesien en heeft: ende sonder reden opgeblasen door den sin zijns vleeschs:

x Ieremie 29.a.8 Matthei 24.a.4 Ephe. 5.a.6 2.Thess. 2.a.2 1.Ioannis 4.a.1

y Oft, oordeele

19

Ende het Hooft niet en behoudt waer wt het gheheele lichaem door aenuoeghinghen ende tsamenbindinghen toeghedient ende te samen gheuoecht, opwast met ^z Godlicken wasdomme.

z Griecx, den wasdom Gods.

C.20

Ist dan dat ghy met Christo ghestoruen zijt, [ende vrij] van de ordeningen der werelt: ^a waerom wort ghy gelijck die in de werelt leuen, met insettinghen belast?

a Galat. 4.a.9

21

[Als] genaket niet, smaket niet, handelet niet:

22

De welcke alle [inghebracht] ^b na insettingen ende leeringhen der menschen, vergaen met den ghebruycke.

b Esaie 29.b.13 Matthei 15.a.9 Titi 1.b.14

23

^c De welcke hebben wel eenen ^d waen der wijsheyt in ghewillighen dienste, ende ootmoedicheyt, ^e ende in het lichaem niet te sparen: [maer zijn] van gheender weerden, [ende dienen] tot de dinghen, ^f daer het vleesch mede veruult wort.

c 1.Timoth. 4.a.8

d Of, schijn

e Of, ende onuerschooninghe des lijfs, niet in eenigher eeren ter versadinghe des vleeschs, siet 1.1.Timothei 5.a.3

f 1.Timoth. 3.a.3

[fol. 76r]