Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

1. hy vermaentse tot alle goede wercken, 10. bekent hare weldadicheyt, 21. ende set daer by sommige groetenissen.

A.1

SO dan, myne lieue ende ghewenschte broeders, mijn blijschap ende kroone, staet also inden Heere, beminde.

2

Ick bidde Euodiam, ende ick bidde Syntichen, dat sy eens ghesint zijn inden Heere.

3

Ia ick bidde dy oock mijn ^a trouwe gheselle, helpt de [vrouwen] de welcke met my inden Euangelio ghestreden hebben, met Clemens ende de andere myne medehulpers: wiens namen gheschreuen zijn in ^b den boecke des leuens.

a Ofte, oprecht Iockghenoot,

b Exodi 32.d.32 Psalm. 69.c.29 Apoca. 3.a.5 ende 20.b.12 ende 21.c.27

4

^c Verblijt v inden Heere alle tijt, wederom segghe ick, Verblijdt v.

c 1.Thess. 5.a.6

5

Vwe vriendelijckheyt zy allen menschen bekent. De Heere is na by.

6

^d Weest in gheenen dinge sorchfuldig: maer laet in alle dinghen uwe begheerten by Gode bekent worden door biddinghe ende smeeckinghe met dancksegghinghe.

d Psalm. 55.c.23 Matthei 6.c.25 2.Timothei 6.a.8 2.Petri 5.a.7

7

^e Ende de vrede Gods die alle verstant te bouen gaet, ^f sal uwe herten ende sinnen bewaren in Christo Iesu.

e Ioannis 14.c.27 Roman. 5.a.1 Ephe. 2.b.13

f Oft, beware

8

Voort, broeders, wat warachtich [is,] wat eerlick [is,] wat gherechtich [is,] wat reyn [is,] wat lieflick [is,] wat wel luydt: is daer eenighe duecht, is daer eenighen lof, dat bedenckt.

9

Het welcke ghy oock gheleert, ende ontfanghen, ende ghehoort, ende gesien hebt aen my. Doet [segghe ick] dit: ^g ende de God des vreden sal met v wesen.

g Esaie 9.a.6

B.10

Ick ben seer verblijdt in den Heere, dat ghy nu eens wederom wacker geworden zijt om op my te dencken: waer op ghy oock gedacht hebt, maer ghy en hebt gheen ghelegentheyt gehadt.

11

^h Ick en spreke niet ⁱ om des ghebrecx wille, want ick hebbe gheleert te vreden te syne in het ghene daer ick ben.

h 1.Timoth. 6.a.8

i Griecx, na den gebreke

12

Ick weet vernedert te syne, ick weet oock oueruloedich te syne, allesins ende in allen ben ick gheleert, beyde versadicht te wesen, ende hongher te lijden: beyde oueruloedich te hebben ende ghebreck te lijden.

13

Ick vermach alle dinck, door Christum die my machtich maeckt.

14

Nochtans ghy hebt wel ghedaen, dat ^k ghy myne bedruckinghe mede ghedeylt hebt.

k Of, ghy v myner verdruckinge aengenomen hebt.

15

^l Ende ghy Philippensen, weet, dat inden beghinne des Euangeliums, als ick van Macedonia ghinck, gheen Ghemeynte my ghedeylt en heeft ter rekenschap des wtgheuens ende ontfanghens, dan ghy alleen.

l 2.Corinth. 11.a.9

16

Want in Thessalonica hebt ghy eenmael ende andermael ghesonden tot mynen nootdruft.

17

Niet dat ick de gaue soecke: maer ick soecke de oueruloedighe vrucht tot uwer rekenschap.

18

Maer ick hebbe het al ontfanghen, ende ick hebbe oueruloedich. Ick ben [segghe ick] veruult na dat ick van Epaphrodito ontfanghen hebbe dat van v [ghesonden was als] een welrieckende reucke, ^m een aenghename offerhande, ende Gode behaghelick.

m Hebre. 13.b.19

19

Mijn God sal veruullen al wat v van noode is, na synen rijckdom, ⁿ eerlick in Christo Iesu.

n Griecx, in eerlickheydt

C.20

Ende onsen God ende Vader [zy] eere van eewicheyt tot eewicheyt. Amen.

21

Groet alle Heylighen in Christo Iesu. De broeders die by my zijn, groeten v.

22

Alle de Heyligen groeten v, ende aldermeest sy die van des Keysers huysghesin zijn.

23

De ghenade ons Heeren Iesu Christi, zy met v allen. Amen.

Tot de Philippensen gheschreuen van Roomen, [ghesonden] door Epaphroditum.