Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Hy vermaentse tot gheestelicke blijschap, 2. ende hen te wachten van de valsche Apostelen, 8. teghen de welcke hy set Christum ende zijn leere, 20. ende de Christelicke wandelinge.

A.1

VOort, myne broeders, verblijt v inden Heere. Het selue [wederom] te schrijuen en verueelt my niet, ende het maeckt v seker.

2

Siet op ^a de honden, siet op de boose arbeyders, siet op de versnijdinghe.

a Esaie 56.b.10

3

Want my zijn de ^b Besnijdinge, die wy ^c God met den Gheest dienen, ende in Christo Iesu roemen: ende niet op het vleesch vertrouwen:

b Roman. 2.c.29 Coloss. 2.b.11 Deute. 10.b.16 ende 30.a.6 Ieremie 4.a.4

c Ioannis 4.c.23

4

Hoewel ick betrouwinghe hebbe oock op het vleesch: ist dat yemant anders ^d denct te vertrouwen op het vleesch: ^e ick veel meer:

d Ofte, schijnt

e 2.Corint. 11.c.23

5

Besneden ten achtsten daghe: wt de afkoemste Israels: wt den gheslachte ^f BenIamin: een Hebreeusch wt den Hebreen: ^g na de ^h Insettinghe een Phariseus:

f Gene. 49.c.27

g Actuum 23.a.6

h Griecx, Wet

6

Na de vyericheyt ⁱ een veruolgher der Ghemeynte, na de rechtueerdicheyt die in de Wet is, onstraffelick.

i Actuum 8.a.3 1.Corint. 15.a.9 Galat. 1.b.13 1.Timoth. 1.b.13

7

^k Maer dat my ghewin was, dat hebbe ick om Christi wille schade gheacht.

k Matth. 13.e.44

8

Ia oock achte ick alle dinghen schade te syne om de weerdicheyt ^l der kennisse Christi Iesu mijns Heeren, om wiens wille ick alle dinghen voor schade gherekent hebbe, ende achte dat het dreck zy, op dat ick Christum winne,

l Esaie 53.b.11 Ieremie 9.c.23 Ioannis 17.a.3 Coloss. 2.a.2

9

Ende in hem beuonden worde, also niet hebbende mijn eyghen rechtueerdicheyt, die wt de Wet is: maer die door het ghelooue Christi is: [namelick,] ^m die rechtueerdicheyt die wt Gode is in het ghelooue:

m Roman. 1.b.17 ende 3.c.21

B.10

Dat ick hem kenne, ende de macht syner opstandinghe, ende de ghemeynschap zijns lijdens, ⁿ dewijle ick syner doot ghelijckformich worde,

n Roman. 6.a.4

11

[Besoeckende] ^o of ick eenichsins tot de opstandinghe der dooden quame.

o Of, hoe ick

12

Niet dat ick nu [den voorghesetten prijs] ghekreghen hebbe, of nu volmaeckt ben: maer ick iaghe daer na, of ick het eenichsins grepe, daer toe ick ghegrepen ben van Christo Iesu.

13

Broeders, ick achte my seluen niet, dat ick [het voorghesette] ghegrepen hebbe: maer een [dinck doe ick,] vergetende wat achter rugghe is, ende streckende my na het ghene dat voren is,

14

Ick iaghe na het voorghesteken merck, tot den prijs der Hemelscher roepinghe Gods in Christo Iesu.

15

So vele dan als onser volmaeckt zijn, ^p† laet ons dit gheuoelen hebben: ende ist dat ghy yet andersins gheuoelt, dat sal v God oock ontdecken.

p† Anders, die hebben dit geuoelen:

16

Maer daer wy toeghekomen zijn, laet ons na den seluen reghel voortgaen, ^q ende het selue gheuoelen hebben.

q Roman. 12.b.16. ende 15.a.5 1.Corinth. 1.b.10 Philippen. 2.a.8 1.Petri 3.a.8

[fol. 75r]

17

^r Weest myne nauolghers, broeders: ende siet op de ghene die also wandelen, gelijck ghy ons voor een exempel hebt.

r 1.Corint. 4.b.16 ende 11.a.1 1.Thess. 1.a.6 2.Thess. 3.a.9

18

^s Want daer wandelen vele, daer ick v dickmael van gheseyt hebbe, ende segge het nu met weenen, [dat sy zijn] vyanden des cruyces Christi,

s Roman. 16.b.17

19

Wiens eynde [is] de verdoemenisse, wiens God de buyck is, ende de eere in haer schande, de welcke aertsch ghesint zijn.

C.20

^t Maer ^u onse burgherschap is in de Hemelen: ^x van waer wy den Salichmaker verwachten, den Heere Christum Iesum:

t Griecx, want

u Hebr. 13.b.14

x 1.Corinth. 1.a.6 Titi 2.b.13

21

^y De welcke onse vernederde lichaem veranderen sal, dat het ghelijckformich worde synen eerlicken lichame, na de krachtighe werckinghe daer mede hy alle dinghen hemseluen onderworpen kan.

y 1.Corint. 15.f.51 Coloss. 3.a.4 1.Ioannis 3.a.2