Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Hy vermaentse bouen al tot vernederinge, de welcke is de verwaerster der reyner leere, 19. beloeft hen dat Timotheus sal korts weder komen, 24. ende oock hy, 25. ontschuldicht dat vertoeuen Epaphroditi.

[fol. 74v]

A.1

SO dan, is daer eenighe vermaninghe in Christo, is daer eenighe vertroostinge der liefde, is daer eenighe ghemeynschap des Gheests, zijn daer eenighe hertgrondelicke beweghinghen ende ontferminghen:

2

So veruult mijn blijschap, ^a dat ghy eens gesint zijt, eenderley liefde hebbende, eenmoedich, ende eenderley gheuoelende.

a Roman. 12.b.16 ende 15.a.5 1.Corinth. 1.b.10 Philip. 3.b.16 1.Petri 3.a.8

3

[Doet] niet door twistinghe oft ijdel eere: ^b maer door ootmoedicheyt achte een yeghelick den anderen beter dan hemseluen.

b Roman. 12.b.10 1.Petri 5.a.5

4

^c Ende een yeghelick sie niet op het syne: maer oock een yeghelick [sie] op dat des anderen is.

c 1.Corin. 10.c.14 ende 13.a.5

5

^d Dat gheuoelen zy in v, het welcke oock in Christo Iesu was:

d 1.Petri 2.c.21

6

^e De welcke in de ghedaente Gods zijnde, en heuet voor gheenen roof gheacht Gode euen ghelijck te zijn:

e 2.Corint. 4.a.4 Coloss. 1.b.15 Hebre. 1.a.3

7

^f Maer heeft hemseluen vernieticht, ^g de ghedaente eens Dienstknechts aenghenomen hebbende, ^h den menschen ghelijck geworden, ende in het ghelaet gheuonden als een mensche.

f Psalm 8.a.6

g Matth. 20.c.28 Ioannis 13.b.14

h Hebre. 2.b.14.17 ende 4.b.15

8

ⁱ Ende heeft hemseluen vernedert, ghehoorsaem zijnde totter doot, Ia de doot des cruyces.

i Hebr. 2.a.9 ende 12.a.2

9

^k Daerom heeft hem oock God hoochlick verhoocht, ende heeft hem ^l eenen naem ghegheuen welcke is bouen alle namen:

k Actuum 2.d.33

l Hebr. 1.a.4

B.10

^m Dat inden name Iesu buyghe alle knye der ghener die inden Hemel, op der Aerden, ende onder der Aerde zijn:

m Esaie 45.c.23 Roman. 14.b.11

11

ⁿ Ende dat alle tonge belijde, dat Iesus Christus de Heere [zy,] ter eeren Gods des Vaders.

n Ioannis 13.b.13 1.Corinth. 8.a.6 ende 12.a.3

12

So dan, myne lieue, ghelijck ghy alle tijt ghehoorsaem gheweest zijt, niet alleene in myne teghenwoordicheyt, maer veel meer nu in mijn afwesen, wercket uwes selfe salicheyt in vreese ende beuen.

13

^o Want het is God die in v werckt, het willen ende het volbrenghen, na [zijn] welbehaghen.

o Deuter. 8.b.18 2.Corinth. 3.a.5

14

^p Doet alle dinck ^q sonder ^r† murmureren ende teghenspreken:

p Roman. 12.b.17 1.Petri 2.b.12

q 1.Petri 4.a.9

r† Anders, toorn,

15

Op dat ghy onbeschuldichlick zijt, ende eenuoudich, [ende] onstraffelicke kinderen Gods midden in dit kromme ende verdraeyde geslachte: ^s onder welcke ^t schijnt als lichten der werelt,

s Prouerb. 4.b.18 Matthei 5.b.14

t Of, ghy schijnt

16

Het woort des leuens voorhoudende, ^u my tot eenen roem ten daghe Christi, dat ick niet te vergheefs gheloopen, noch te vergheefs ghearbeyt en hebbe.

u 2.Corin. 1.b.14 1.Thess. 2.b.19

17

Ende of ick geoffert worde ouer de offerhande ende ^x bedieninghe ws gheloofs, ^y so ben ick blijde, ende verblijde my met v allen.

x Of, offeringhe

y 2.Corint. 7.a.4

18

Ende om dat selue ^z zijt ghy oock blijde, ende ghy verblijdt v met my.

z Of, weest ghy oock blijde, ende verblijdt v met my

19

Ende ick hope inden Heere Iesu, ^a Timotheum korts [tot] v te senden, op dat ick oock goets moets zy, als ick weet hoe het met v is:

a Actuum 16.a.1 Roman. 16.c.20 1.Thess. 2.a.3

C.20

Want ick en hebbe niemant also ghemoet, die eenuoudelick voor v sorghen soude:

21

^b Want sy soecken alle dat hare is, niet dat Christi Iesu [is.]

b 1.Corin. 10.c.24 ende 13.a.5

22

Ende ghy weet syne beproeuinghe, dat hy als een kint met synen vader, met my ghedient heeft in het Euangelium.

23

So hope ick dan desen te senden, terstont als ick myne dinghen ouersien hebbe.

24

Ende ick betrouwe inden Heere, dat ick oock korts komen sal.

25

Maer ick hebbet nootsakelick gheacht, Epaphroditum mynen broeder ende medehulper ende medekamper, ende uwen ^c Apostel, ende myner nootdruft dienaer tot v senden:

c Dat is, ghesonden bode

26

Want hy na v allen verlangde, ende was swaerlick benaut, daeromme dat ghy ghehoort hebt dat hy kranck gheweest is.

27

Ende hy heeft voorwaer by doot kranck gheweest: maer God heeft syner ontfermt: ende niet alleen syner, maer oock myner, om dat ick niet ^d de een droeffenisse op de ander hebben soude.

d Griecx, droeffenisse op droeffenisse.

28

So hebbe ick hem dan te neerstelicker ghesonden, om dat ghy hem weder siende, v soudt verblijden: ende ick te min droefheyt hebben.

29

Ontfangt hem dan inden Heere met alle blijschap, ende houdt ^e de sulcke in weerden,

e 1.Corint. 9.b.11 Galat. 6.a.6 1.Thess. 5.b.12 1.Timoth. 5.b.17 Heb. 13.b.17

30

Want om des wercks Christi wille was hy tot by der doodt ghekomen, ende waechde zijn ^f leuen, om dat hy het ghebreck ws diensts aen my veruullen soude.

f Griecx, ziele