Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE SENDBRIEF Pauli tot de Philippensen.

Dat Eerste Capittel.

3. Paulus prijst hare volstandicheyt, om dat sy volstandich ghebleuen waren in de waerheyt, 12. ende handelende van hem ende zijn banden, bewijst dat de eerlickheyt des Euangeliums daer voor versterckt is. 28. Hy vermaentse oock tot eendrachticheyt ende lijdtsaemheyt.

A.1

PAulus ende Timotheus, Dienstknechten Iesu Christi, allen Heylighen in Christo Iesu die ^a te Philippis zijn, met de ^b Opsienders ende ^c Dienaers:

a Actuum 16.b.12

b Of, Bisschoppen

c Actuum 6.a.3

2

^d Ghenade zy v, ende vrede van Gode onsen Vader, ende den Heere Iesu Christo.

d Roman. 1.a.7 1.Petri 1.a.2

3

^e Ick dancke mynen God ^f alle tijt, als ick uwer ghedencke:

e Ephes. 1.b.15 Coloss. 1.a.3 1.Thess. 1.a.2 2.Thess. 1.a.3

f Griecx, in alle uwer ghedachtenisse

4

(Alle tijt in alle mynen ghebede voor v allen met blijschap biddende:)

5

Om uwe ghemeynschap in het Euangelium, van den eersten daghe af, tot nu toe:

6

Getrouwende dit selue, dat hy die in v begonnen heeft, ^g het goede werck, [dat] volbrengen sal tot op den dach Iesu Christi:

g Ioannis 6.c.29 1.Thess. 1.a.3

7

Ghelijck het my ^h toebehoort, dat van v allen te gheuoelen, daerom dat ick in mijn herte houde, dat ghy in myne geuanckenisse, ende in myne verantwoordinghe, ende versterckinghe des Euangelii, dat ghy [segghe ick] alle myner ghenaden mede deelachtich gheweest zijt.

h Griecx, recht is,

8

ⁱ Want God is mijn ghetuyghe, hoe seer ick v alle begheere met hertgrondelicke beweghinghen Christi.

i Roman. 1.a.9 ende 9.a.1 2.Corinth. 1.c.23 ende 11.d.31 Galat. 1.c.20 1.Thess. 2.a.5 1.Timoth. 5.c.21 2.Timoth. 4.a.1

9

^k Ende dit bidde ick, dat uwe liefde noch meer ende meer oueruloedich worde in kennisse ende allen ^l verstande:

k Ephe. 1.b.16 Coloss. 1.a.3 1.Thess. 1.a.2 2.Thess. 1.a.3

l Of, oordeele:

B.10

Op dat ghy moecht ^m de verscheyden dingen onderkennen, op dat ghy moecht wesen oprecht ende sonder erghernisse tot den dage Iesu Christi,

m Of, onderscheyden wat best is.

11

Vol vruchten der gherechticheyt, die door Iesum Christum [zijn,] tot eere ende prijs Gods.

12

Ende ick wil dat ghy weet, broeders, dat het ghene dat my [geschiet is,] is meer tot voordeel des Euangeliums ghekomen:

13

So dat mijn banden in Christo bekent gheworden zijn in gheheel den ⁿ Rechthuyse, ende alle den anderen [plaetsen:]

n Ofte, Palleyse des Keysers,

14

^o Ende dat vele broeders in den Heere, door myne banden vertrouwende, oueruloedigher derren onuertzaecht het woort spreken:

o Ephe. 3.b.13 1.Thess. 3.a.3

15

Ende sommighe door nijdt ende twist: ende sommighe prediken oock Christum door goetwillicheyt:

16

De sommighe [segghe ick] prediken Christum wt twist, niet suyuerlick, ende meynen ^p myne banden noch meer te bedrucken:

p Griecx, verdruckinghe tot myne banden te brenghen:

17

Ende de sommighe wt liefde, dewijle sy weten, dat ick tot verantwoordinghe des Euangeliums gheset ben.

18

Wat dan? nochtans wort Christus allesins het zy door een ^q deckel, het zy door de waerheyt, verkondicht: ende ick verblijde hier in, ende sal verblijden.

q Oft, voorwendinghe,

19

^r Want ick weet, dat dit my ter salicheyt dijen sal door uwe ghebet ende ^s hulpe des Gheests Iesu Christi,

r 2.Corinth. 1.b.11

s Griecx, toedieninghe

C.20

Na mijn ouer groot verlanghen ende hopen, dat ick in gheenen dinge sal beschaemt worden, maer Christus sal ghelijck alle tijt, also oock nu, met alle vrijmoedicheydt in mynen lichame groot ghemaeckt worden, het zy door leuen, het zy door steruen.

21

Want Christus is my ghewin [beyde] in leuen ende in steruen.

22

Maer of in den vleessche te leuen my oorbaerlick [zy,] ende wat ick verkiesen wil, en weet ick niet.

23

Want ick worde van dese twee benaut, begheerende te ^t verscheyden [vanden lichame] ende met Christo te syne: [want dat is] seer verre het beste.

t Of, verhuysen,

24

Maer inden vleessche te blijuen, [is] nootsakelicker om uwent wille.

25

Ende dit weet ick, vertrouwende dat ick sal blijuen, ende met v allen blijuen tot uwen voordeele, ende [tot] blijschap des gheloofs:

26

Op dat uwen roem in Christum van my, oueruloedich zy door myne koemste wederom tot v.

27

^u Alleenlick wandelt weerdichlick den Euangelio Christi, op dat ick, het zy dat ick kome ende v sie, het zy dat ick van v ben, mach van v hooren, dat ghy staet in eenen Gheest ^x eenmoedichlick mede strijdende met den ghelooue des Euangeliums.

u Genes. 17.a.1 1.Corinth. 7.c.20 Ephes. 4.a.1 Coloss. 1.b.10 1.Thess. 2.b.12 ende 4.a.1

x Griecx, in een ziele

28

Ende wordet in gheenen dinghe verschrickt vanden ghenen die hen teghenstellen, het welcke hen een bewijsinghe is der verderffenisse, maer v der salicheyt, ende dat van Gode.

29

Want v is ghegheuen in de sake Christi, niet alleenlick in hem te gheloouen, maer oock voor hem te lijden:

30

Den seluen strijdt hebbende, dien ghy aen my ghesien hebt, ende noch in my hoort.