Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

1. Hy vermaent de kinderen ende Dienstknechten tot ghehoorsaemheyt, 7. ende berooft alle Christenen int ghemeyne van alle vleesschelicke vertrouwen, 10. ende wapentse met gheestelicke wapenen om den vijandt te wederstaen, 18. ende in het eynde beueelt hy hemseluen in hare ghebeden.

A.1

GHy ^a kinderen weest uwen ouderen ghehoorsaem inden Heere: want dit is recht.

a Coloss. 3.c.20

2

^b Eert dynen vader ende dyne moeder: (het welcke het eerste ghebot is dat een belofte heeft:)

b Exodi 20.b.12 Deut. 15.b.16 Syrach 3.a.9 ende 7.c.27 Tobie 4.a.3 Matthei 15.a.4 Marci 7.b.10

3

Op dat het dy wel gae, ende dat du langhe leuest op der Aerden.

4

Ende ghy vaders, en verweckt uwe kinderen niet tot gramschap: ^c maer voedtse op door de leere ende vermaninghe des Heeren.

c Deuter. 6.c.20 Psalm. 78.a.4 Prouerb. 19.b.18 ende 29.b.17 Syrach 7.c.25 ende 30.a.1

5

^d Ghy Dienstknechten weest ghehoorsaem uwen heeren na den vleessche, met vreesen ende beuen, met eenuoudicheyt ws herten, ghelijck als Christo:

d Coloss. 3.c.23 1.Timoth. 6.a.1 Titi 2.a.9 1.Petri 2.b.18

6

Niet na der ooghe dienende, ende soeckende den mensche te behagen: maer als Dienstknechten Christi, van herten doende den wille Gods:

7

Dienende met goetwillicheyt den Heere, ende niet den menschen:

8

Wetende dat een yeghelick vanden Heere, ^e ontfanghen sal, wat hy goets ghedaen sal hebben, hy zy Dienstknecht oft vrije.

e Griecx, draghen

9

^f Ende ghy heeren, doet het selue by hen, verlaet de dreyghingen, wetende dat oock ws selfs Heere in de Hemelen is, ^g ende by hem en is gheen wtneminghe der persoonen.

f Syrach 7.c.22 ende 33.c.29 Coloss. 4.a.1

g Deuter. 10.b.17 2.Para. 19.a.7 Iob 34.b.19 Sapient. 6.a.8 Syrach 35.b.16 Actuum 10.d.34 Roman. 2.b.11 Galat. 2.a.6 Coloss. 3.c.25 1.Petri 1.b.17

B.10

Ten laetsten myne broeders, wordet machtich inden Heere, ende in de sterckte zijnder cracht.

11

^h Doet aen alle wapenen Gods, op dat ghy moecht staen teghen de listen des Duyuels.

h Coloss. 3.b.12

12

Want wy en hebben den strijdt niet teghen vleesch ende bloet, maer ⁱ teghen de Ouerste, teghen de Machten, teghen de Gheweldighe der werelt, der duysternisse deser eeuwen, teghen de gheestelicke ^k boosheden inder locht.

i Ephes. 2.a.2

k Griecx, der boosheyt in de hemelsche.

13

Hieromme neemt aen ^l de gheheele wapen Gods, op dat ghy moecht inden boosen dach teghenstaen, al volbracht hebbende, ende blijuen staende.

l 2.Corint.10.a.4

14

^m So staet dan uwe lenden ommegort hebbende met der waerheyt, ⁿ ende de borst bedeckt met de rechtueerdicheyt:

m Luce 12.d.35 1.Petri 1.b.13

n Sapient. 5.b.19

15

Ende de voeten gheschoeyt met veerdicheyt des Euandelij des vredes.

16

Bouen al neemt aen den Schilt des geloofs, waer mede ghy moecht alle de vyerighe pijlen des boosen wt blusschen.

[fol. 74r]

17

^o Ende neemt den Helm der salicheyt, ende ^p het Sweert des Gheests, het welc is Gods woort.

o 1.Thess. 5.a.8 Esaie 59.b.17

p Hebre. 4.b.12 Apocal. 2.b.16

18

Met aller biddinghe ^q ende smeeckinghe biddende te aller tijt inden Gheest: ende in dat selue wakende met alle gheduericheyt, ende biddinge voor alle de Heylighen:

q Luce 18.a.1 Roman. 12.b.12 Coloss. 4.a.2 2.Thess. 5.b.17

19

^r Ende voor my, dat my sprake ghegheuen worde tot de openinghe mijns monts, om met vrijmoedicheyt de verborghentheyt des Euangelij te kennen te gheuen,

r Actuum 4.c.29 2.Thess. 3.a.1

C.20

Waer van ick de bootschap doe in ketenen, op dat ick daer in vrijmoedelick handele, gelijck ick behoore te spreken.

21

Voort, op dat ghy oock moecht weten, dat my aengaet, [ende] wat ick doe: dat sal v Tichicus mijn lieue broeder ende ghetrouwe Dienaer inden Heere, te kennen gheuen:

22

Den welcken ick om dat selue tot v gesonden hebbe, om dat ghy soudt weten, hoe het met my staet: ende [om dat] hy uwe herten vertroosten soude.

23

Vrede [zy] den broederen, ende liefde, met ghelooue, van Gode den Vader, ende den Heere Iesu Christo.

24

De ghenade zy met allen den ghenen die onsen Heere Iesum Christum oprechtelick lief hebben. Amen.

Tot de Ephesien gheschreuen van Roomen, [ghesonden] door Tichicum.