Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Hy handelt van het officie der Christenen, 31. vanden lichamelicken houwelicke, 32. ende van het gheestelicke, Christi met zijnder Ghemeynte.

A.1

SO weest dan Gods nauolghers, als lieue kinderen:

2

^a Ende wandelt inder liefde ^b ghelijck Christus ons lief ghehadt heeft, ^c ende heeft hemseluen voor ons ghegheuen tot een offerhande ende slachtoffer voor ons, Gode tot een welrieckende reucke.

a Ioannis 13.d.34 ende 15.b.12 1.Thess. 4.a.9 1.Ioannis 3.c.23 ende 4.c.21

b Galat. 2.c.21 Titi 2.b.14 1.Petri 5.a.8

c Hebr. 8.a.3 ende 9.b.14

3

^d Maer hoererie, ende alle onreynicheyt, of giericheyt, laet die onder v oock niet ghenaemt worden, ghelijck het den Heylighen betaemt:

d Ephes. 4.c.29 Coloss. 3.a.5 Matthei 12.d.36

4

Noch ^e oneerlickheyt, noch sotten klap, noch gheckerie, de welcke niet en betamen: maer lieuer dancksegghinghe.

e Of, vuylicheyt,

5

^f Want ghy weet dit, dat gheen hoereerder, noch onreyne, noch gierighe, welcke is een Afgodendienaer, sal erfdeel hebben in het Konincrijcke Christi ende Gods.

f 1.Corint. 6.b.10 Galat. 5.c.21 Collos. 3.a.5 Apocal. 22.b.15

6

^g Laet v van niemande verleyden met ijdel worden, want om deser dingen wille, koemt de toorn Gods ouer de onghehoorsame kinderen.

g Ieremie 29.a.8 Matthei 24.a.4 Marci 13.a.5 Luce 21.a.8 Collos. 2.a.4.b.18 2.Thess. 2.a.2 1.Ioannis 4.a.2

7

Weest dan hare medeghesellen niet.

8

^h Want ghy waert voortijden duysternisse, maer nu zijt ghy licht inden Heere: wandelt als kinderen des lichts.

h 1.Thess. 5.a.4

9

ⁱ Want de vrucht des ^k† Gheests is in alle goedicheyt, ende rechtueerdicheyt, ende waerheyt,

i Galat. 5.c.22

k† Anders, lichts

B.10

Beproeuende wat den Heere behaghelick zy:

11

^l Ende en hebt gheen ghemeynschap met de onuruchtbare wercken der duysternisse, maer straftse lieuer.

l Matthei 18.b.17 1.Corinth. 5.a.8 ende 10.c.20 2.Corinth. 6.b.14 2.Thess. 3.b.14

12

Want dat bedecktelick van hen gheschiet, dat is oock schandelick om te segghen.

13

^m Maer al wat ⁿ gestraft wort, dat wort van den lichte gheopenbaert. Want al dat openbaer maect, dat is licht.

m Ioannis 3.c.21

n Of, vanden lichte ghestraft wordt: dat wordt openbaer

14

^o Daerom seyt hy: Ontwaeckt die du slaepst, ende staet op van de dooden, ende Christus sal dy lichten.

o Roman. 13.b.11 1.Thess. 5.a.6

15

^p Siet dan, hoe ghy ^q voorsichtichlick moecht wandelen, niet als onwijse, maer als wijse:

p Syrach 27.b.12 Coloss. 4.a.5

q Griecx, neerstichlick

16

^r Den bequamen tijt wtkoopende, want de daghen zijn boos.

r Roman. 12.b.11 Coloss. 4.a.5

17

Hierom en weest niet onuoorsichtich, ^s maer verstaet wat de wille des Heeren zy.

s Roman. 12.a.2 1.Thess. 4.a.3

18

^t Ende drinckt niet droncken in wijn, waer in ouerdaet is: maer wort vol des Gheests:

t Syrach 31.d.30

19

^u Sprekende tot malcanderen met psalmen ende lofsanghen, ende gheestelicke liedekens, singende ende psalmende den Heere in uwe herte:

u Coloss. 3.b.16

C.20

^x Alle tijt van alle dinghen danckende God, ende den Vader inden name onses Heeren Iesu Christi.

x Coloss. 3.b.17 1.Thess. 5.b.18

21

Malcanderen onderdanich [zijnde] in de vreese Gods.

22

^y Ghy vrouwen weest uwen mannen onderdanich, als den Heere.

y Gene. 3.b.16 1.Corint. 14.d.34 Coloss. 3.b.18 Titi 2.a.5 1.Petri 3.a.1

23

^z Want de man is het hooft des wijfs, ^a ghelijck oock Christus het Hooft der Ghemeynte is: ende hy is de ^b Behoeder des lichaems.

z 1.Corinth. 11.a.3

a Ephes. 1.c.22 ende 4.b.15 Coloss. 1.b.18

b Roman. 12.a.5 1.Corinth. 12.c.27 Ephe. 1.c.23 ende 4.b.12 Coloss. 1.c.24

24

Ghelijck dan de Ghemeynte Christo onderdanich is: also [moeten] oock de vrouwen haren mannen in allen dinghen [ghehoorsaem zijn.]

25

^c Ghy mannen, hebt uwe vrouwen lief, ghelijc oock Christus de Ghemeynte lief heeft gehadt, ^d ende heeft hemseluen voor haer ghegheuen:

c Coloss. 3.b.19

d Galat. 1.a.4 Ephes. 5.a.2

26

Om dat hyse heylighen soude, ^e die hy heeft ghereynicht met den waterbade in het woort:

e Titi 3.a.5 1.Petri 3.c.23

27

Om dat hyse voor hem setten soude, een Ghemeynte, die eerlick ware, ende noch vlecke noch rumpel en hadde, of yet desgelijcx: ^f maer dat sy soude heylich ende onstraffelick wesen.

f Coloss. 1.c.22

28

Also zijn de mannen schuldich hare wijuen lief te hebben, ghelijck hare eyghen lichamen. Wie zijn wijf lief heeft, die heeft hemseluen lief.

29

Want niemant en heeft oyt zijn eygen vleesch gehaet, maer hy voedt ende onderhoudt het: ghelijck oock de Heere de Ghemeynte:

D.30

^g Om dat wy leden zijn zijns lichaems, van synen vleessche, ende van syne beenen.

g Roman. 12.a.5 1.Corinth. 12.c.27

31

^h Hierom sal de mensche synen vader ende syne moeder verlaten, ende sal synen wijue aenhanghen, ⁱ ende sy sullen een vleesch wesen.

h Gene. 2.c.24 Matthei 19.a.5 Marci 10.a.7

i 1.Corint. 6.b.16

32

Dese verborghentheyt is groot: maer ick segghe, in Christum ende in de Ghemeynte.

33

Daerom so hebbe een yeghelick van v zijn eyghen wijf also lief, als hemseluen: ende dat het wijf den man vreese.