Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Hy prijst de roepinghe der Heydenen in zijn ampt, ende syne verdruckingen voor hen, 18. ende de kennisse Christi.

A.1

HIerom [ben] ick Paulus ^a die ^b gheuangen om Christus wille voor v Heydenen.

a Actuum 21.d.33 2.Timoth. 1.a.8

b Griecx, ghebonden Christi

2

So ghy oock ghehoort hebt van de bedieninghe der ghenaden Gods, ^c die my ghegheuen is aen v,

c Actuum 13.a.2 Ephes. 3.a.8

3

^d Dat hy my de verborghentheyt heeft door openbaringhe te kennen ghegheuen: (ghelijckerwijs ick in het korte voorschreuen hebbe,

d Galat. 1.b.12

4

Waer aen ghy moecht lesende, mercken mijn verstant in de verborghentheyt Christi.)

5

De welcke in andere tijden der menschen kin-

[fol. 73r]

deren niet en is te kennen ghegheuen, ^e ghelijck sy nu synen heylighen Apostelen ende Propheten gheopenbaert is door den Gheest,

e Actuum 10.c.28

6

[Namelick] dat de Heydenen zijn mede erfghenamen, ende vanden seluen lichame, ende mede deelachtich zijnder beloften in Christo door het Euangelium.

7

Waer af ick een Dienaer gheworden ben, na de gaue der ghenaden Gods die my ghegheuen is, ^f na de werckinghe zijnder moghentheyt.

f Ephes. 1.b.19 Coloss. 2.b.12

8

^g My [segghe ick] die de minste ben onder alle de Heylighen, is dese ghenade ghegheuen, dat ick ^h onder de Heydenen soude den ⁱ onwtsprekelicken rijckdom Christi verkondighen.

g 1.Corint. 15.a.9

h Actuum 9.b.15 ende 13.a.2 ende 22.c.21 Galat. 1.b.16 ende 2.a.8 1.Timoth. 2.a.7 2.Timoth. 1.b.11

i Griecx, onwtspuerlicken Roman. 16.c.25 Coloss. 1.c.26 Ephes. 1.a.9 2.Timoth. 1.b.10 Titi 1.a.2 1.Petri 1.c.20

9

Ende allen [menschen] verklaren wat ghemeynschap daer zij der verborghentheydt, die vander eewicheyt aen verborghen was in Gode, ^k die alle dinck gheschapen heeft door Iesum Christum.

k Gene. 1.a.1 Psalm. 33.a.6 Ioannis 1.a.3 Coloss. 1.a.6 Hebre. 1.a.2

B.10

^l Op dat nu den Ouersten ende Machten in den Hemel, door de Ghemeynte bekent worde de menigherley wijsheyt Gods:

l 1.Petri 1.b.12

11

Na het eewige voornemen, dat hy ghemaect heeft in Christo Iesu onsen Heere:

12

^m Inden welcken wy hebben de vrijmoedicheyt ende den toeganck met een vertrouwen door het ghelooue aen hem.

m Ioannis 10.a.9 ende 14.a.6 Roman. 5.a.2 Ephes. 2.b.17 Hebre. 10.b.19

13

ⁿ Daerom bidde ick dat ghy niet en verflaut door myne verdruckinghen [die ick lijde] ^o voor v, welck uwe eere is.

n Philip. 1.b.14 1.Thess. 3.a.3

o Coloss. 1.c.24

14

Hierom buyghe ick myne knyen tot den Vader onses Heeren Iesu Christi.

15

Wt welcken alle ^p maechschap in de Hemelen ende op der Aerden ghenaemt wort.

p Of, vaderschop

16

Dat hy v na synen ^q heerlicken rijckdom gheue, dat ghy met kracht versterckt wort door synen Gheest inden inwendighen mensche:

q Griecx, den rijckdom zijnder eerlicheyt

17

Dat Christus door het ghelooue in uwe herten woone: op dat ghy in de liefde inghewortelt ende ghefondeert zijnde,

18

Moecht begrijpen met alle Heyligen, welck de breedde [zy,] ende lengde, ende diepte, ende hoochde,

19

Ende bekennen ^r de wtnemende liefde der kennisse Christi: op dat ghy veruult wort tot alle de volheyt Gods.

r Ofte, de liefde Christi die de kennisse te bouen gaet.

C.20

Hem die bouen alle dat wy bidden of dencken, oueruloedichlicken doen kan, na de macht die in ons werckt,

21

[Zy] eere inder Ghemeynten door Christum Iesum ^s† te aller tijt, van eewicheyt tot eewicheyt. Amen.

s† Anders in allen gheslachten