Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Hy bewijst hen wat sy waren eer sy gheroepen waren tot Iesum Christum, 4. ende dat om zijn ghenade groot te maken, 8. de welcke is alleenlick de oorsake haerder salicheyt.

A.1

ENde ^a v [heeft hy mede leuendich ghemaeckt] als ghy doot waert door de misdaden ende sonden,

a Roman. 5.a.6 Coloss. 2.b.13

2

^b Daer ghy voortijden in wandeldet na ^c den loop deser werelt, na ^d den Ouersten der macht des luchts [ende] des Gheests die nu werckt in de kinderen der onghehoorsaemheyt,

b 1.Corinth. 6.b.11 Coloss. 3.a.7 Titi 3.a.3

c Griecx, de eewe

d Ephe. 6.b.12

3

Onder de welcke wy oock alle voortijden ghewandelt hebben in de begeerten onses vleeschs, doende den wille des vleeschs, ende der ^e ghedachten: ende waren van natuere kinderen des toorns, ghelijck de andere.

e Of, verstants

4

Maer God die rijck is in barmherticheden, heeft ons door syne groote liefde daer mede hy ons lief ghehadt heeft,

5

Oock doe wy doot waren door de misdaden, mede leuendich ghemaeckt met Christo: ^f door [wiens] ghenade ghy zijt salich gheworden:

f Actuum 15.b.11 Titi 3.a.5

6

Ende heeft ons mede opghewect, ende mede gheset in de ^g Hemelen in Christo Iesu:

g Griecx, hemelsche

7

Om dat hy den toecomenden eeuwen soude bewijsen den wtnemenden rijckdom zijnder ghenade in de vriendelickheyt tot ons ^h door Christum Iesum.

h Griecx, in

8

Want wt ghenade zijt ghy salich gheworden door het ghelooue, ende dat niet wt v: het is Gods gaue.

9

Niet wt wercken: op dat niemant en roeme.

B.10

Want wy zijn zijn maecksel ⁱ gheschapen in Christo Iesu tot goede wercken, die ons God te voren bereyt heeft, om dat wy daer in wandelen souden.

i Titi 2.b.14 Ephe. 1.a.4

11

Daerom ghedenckt dat ghy voortijden Heydenen inden vleessche, die Voorhuyt ghenaemt waert van de ghene die ghenaemt zijn Besnijdinghe inden vleessche die met handen gheschiet:

12

Dat ghy [segghe ick] te dier tijt buyten Christum waert, verureemt van het burgerschap Israels: ende vreemde ^k van de ^l Testamenten der beloften, gheen hope hebbende, ende ^m sonder God [zijnde] in de werelt.

k Roman. 9.a.4

l Of, verbonden

m Of, goddeloos

13

Maer nu in Christo Iesu, ghy die voortijden verre waert, zijt na by gheworden door het bloet Christi.

14

ⁿ Want hy is onse vrede, die wt beyde een ghemaect heeft, ende heeft het afschutsel des middelmuers ghebroken:

n Esaie 9.a.6 Ioannis 16.d.33 Actuum 10.c.29 Roma. 5.a.1 Coloss. 1.c.20

15

De vyantschap in synen vleessche [namelick] de Wet der gheboden in insettingen [ghelegen,] door zijn vleesch te niete ghemaect hebbende: om dat hy die twee soude in hemseluen tot eenen nieuwen mensche scheppen, vrede makende:

16

Ende om dat hy die beyde soude in een lichaem Gode versoenen door het cruyce, de vyantschap ^o daer aen ghedoot hebbende.

o Of, in hemseluen

17

^p Ende hy is ghecomen vrede vercondigende v die ghy verre waert, ende den ghenen die by waren.

p Esaie 57.b.17 Ephe. 3.b.12

18

^q Want door hem hebben wy beyde den toeganck door eenen Gheest tot den Vader.

q Ioannis 10.a.9 ende 14.a.6 Roman. 5.a.2 Ephe. 3.b.12 Heb. 10.b.19

19

So zijt ghy dan niet meer gasten ende vreemde inwooners: maer medeburgers der Heyligen ende huysghenooten Gods,

C.20

^r Ghetimmert op het ^s fundament der Apostelen ende Propheten, ^t [namelick,] Iesu Christo, den wtersten Hoecksteen:

r 1.Corinth. 3.a.9

s Esaie 28.b.16 Matthei 16.b.18 Apocal. 21.b.14.

t 1.Petri 2.a.4

21

^u Waer op gheheel de timmeringe gheuoecht [wort,] ende wast tot eenen heylighen Tempel inden Heere:

u Ephes. 4.b.16

22

Waer op ghy oock mede ghetimmert wort tot een woonstede Gods, inden Gheest.