Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE SENDBRIEF Pauli tot de Ephesien.

Dat Eerste Capittel.

1. Paulus na de groetinge, 4. bewijst dat de salicheyt der menschen koemt van de onuerdiende aenneminghe, 16. hy bidt oock God dat hy de Ephesien, verlichte tot de volle kennisse in Christo Iesu, 22. de welcke een hooft gheordineert is ouer de gheheele Ghemeynte.

A.1

PAulus een Apostel Iesu Christi door den wille Gods: ^a den Heylighen die te Ephesen zijn, ende den gheloouighen in Christo Iesu.

a Roman. 1.a.7 1.Corinth. 1.a.2

2

^b Ghenade ende vrede [zy] v, van Gode onsen Vader, ende den Heere Iesu Christo.

b Galat. 1.a.3 1.Petri 1.a.2

3

^c Gheloeft zy de God, ende Vader onses Heeren Iesu Christi, die ons gheseghent heeft ^d met allerley gheestelicken seghen in de Hemelsche [goeden in] Christo.

c 2.Corinth. 1.a.3 1.Petri 2.a.3

d Griecx, in

4

^e Ghelijck hy ons in hem wtuercoren heeft, eer des werelts gront gheleyt was, ^f om dat wy souden wesen, heylich ende onstraffelick voor hem inder liefde:

e Ioannis 15.b.16 2.Timoth. 1.a.9

f Luce 1.h.75 Coloss. 1.c.22 2.Timoth. 1.a.9 Titi 2.b.12

5

Die ons heeft van te voren gheschickt tot de aenneminge der kinderen, door Iesum Christum in hemseluen, na het welbehagen zijns willen,

6

Tot prijse syner eerlicker ghenaden, in de

[fol. 72v]

welcke hy ons aenghename ghemaeckt heeft, ^g inden beminden:

g Matthei 3.b.17

7

^h Inden welcken wy de verlossinghe hebben door zijn bloet, [namelick,] de vergheuinge der misdaden, na den rijckdom zijnder ghenaden:

h Actuum 20.c.28 Coloss. 1.b.14 Hebr. 9.b.12 1.Petri 1.b.19

8

Met de welcke hy oueruloedich is gheweest aen ons met alle wijsheyt, ende voorsichticheyt:

9

Ons te kennen gheuende ⁱ de verborgentheyt zijns willen, na syne goetwillicheyt die hy voorghenomen heeft in hemseluen,

i Roman. 16.c.24 Ephes. 3.a.9 Coloss. 1.c.26 2.Timoth. 1.b.10 Titi 1.a.2 1.Petri 1.c.20

B.10

^k [Namelick,] dat hy in de wtdeylinghe der volheyt des tijts soude weder in een versamelen in Christo, al wat in de Hemelen ende op der Aerden is: in hem [segghe ick:]

k Gene. 49.b.10 Danielis 9.c.24 Galat. 4.a.4

11

^l In den welcken wy verkoren zijn, die wy te voren ^m gheordineert waren, na zijn voornemen, die alle dinghen doet na den raet zijns willen:

l Roman. 8.b.17

m Of, bescheyden

12

Om dat wy tot prijs zijnder eerlickheyt souden wesen, die ⁿ wy eerst in Christum ghehoept hebben.

n Namelick, Ioden

13

Inden welcken ^o ghy oock [hoept] na dien ghy het woort der waerheyt gehoort hebt, [namelick,] het Euangelium uwer salicheydt, in het welcke ghy oock na dat ghy ghelooft hebt, ^p zijt verseghelt gheworden door den heylighen Gheest der beloften:

o Namelic, Heydenen

p Roman. 8.b.16 2.Corinth. 1.c.22 ende 5.a.5 Ephes. 4.d.30

14

De welcke is het pant onser eruen, ^q dat wy in de verlossinghe gantschelick gheurijet worden tot prijs zijnder eerlickheyt.

q Of, tot de verlossinghe der verkreghen besittinghe Exodi 19.a.5 Deuter. 7.a.6 ende 14.a.2 ende 26.b.18 1.Petri 2.a.9

15

^r Hierom, na dat ick oock van uwen ghelooue inden Heere ghehoort hebbe, ende van uwe liefde tot alle Heylighen:

r Philip. 1.a.3 Coloss. 1.a.3 1.Thess. 1.a.2 2.Thess. 1.a.3

16

En houde ick niet op voor v te dancken, uwer ghedenckende in myne ghebeden:

17

Dat de God onses Heeren Iesu Christi, de Vader der eerlickheyt v gheue den Gheest der wijsheyt ende der openbaringe ^s door syne kennisse,

s Of, dat ghy hem kennet,

18

Verlichtende de ooghen uwes verstants, dat ghy moecht sien, ^t hoedanich de hope zy daer hy ons toe gheroepen heeft, ende hoedanich de rijcdom der eerlickheyt zijnder eruen in de Heylighen [zy.]

t Griecx, welcke de hope is syner roepinghe

19

Ende hoedanich de wtnemende grootte zijnder kracht [zy,] aen ons die wy gheloouen ^u na de werckinghe der kracht zijnder sterckheyt:

u Coloss. 2.b.12

C.20

Die hy gewrocht heeft in Christo, als hy hem van de dooden opgeweckt heeft, ^x ende te syner rechter hant gheset heeft ^y in de Hemelen,

x Psalm. 110.a.1 Actuum 2.d.34 1.Corinth. 15.c.25 Coloss. 3.a.1 Hebre. 1.b.13 ende 10.b.13 1.Petri 3.c.22

y Griecx, in de hemelsche

21

Bouen alle Ouerheyt ende Macht, ende Ghewelt, ende Heerschappie, ende allen Naem die ghenaemt wort, niet alleenlick in deser werelt, maer oock in de toecomende.

22

^z Ende heeft alle dinghen synen voeten onderworpen, ende heeft hem ouer alle dinck tot een Hooft ghegheuen der Ghemeynte:

z Psalm. 8.a.7 Matthei 28.b.18 1.Corinth. 15.c.27 Hebre. 2.a.8

23

^a De welcke is zijn lijf, ende de veruullinghe des ghenen die alle dinck in allen veruult.

a Roman. 12.a.5 1.Corinth. 12.c.27 Ephes. 4.b.16 ende 5.c.23