Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

1. Hy vermaentse lieflick te zijn teghen de krancken, 6. de Dienaren te versorghen, 9. tot volstandicheyt, 14. te roemen in het cruyce Christi, 15. ende tot nieuwicheyt des leuens, 16. daer na wenscht hy hen alle goet.

A.1

BRoeders, ^a al ware oock een mensche in eenige misdaet ^b gheuallen, ^c onderwijst hem, ghy die gheestelick zijt, met den gheest der saechtmoedicheyt, siende op dy seluen, op dat du oock niet versocht en wordest.

a Roman. 15.a.1 1.Corinth. 9.c.22 2.Timoth. 2.c.25

b Of, verrascht,

c Gr. vermaeckt, of, heylt

2

^d Draecht malcanders last, ende volbrengt also de Wet Christi.

d Ioannis 13.b.14

3

Want so yemant denckt dat hy wat is, de wijle hy niet en is, die bedriecht hemseluen.

4

Maer een yeghelick ^e beproeue zijns selfs werck, ende dan sal hy aen hemseluen alleenlick roem hebben, ende niet aen eenen anderen.

e Ofte, make dat zijn werc goet zy,

5

^f Want een yegelick sal zijn eygen pack dragen.

f Psalm. 62.b.13 Ieremie 17.b.10 ende 32.b.19 Matthei 16.c.27 Roman. 2.a.6 ende 14.b.12 1.Corinth. 3.a.8 2.Corinth. 5.b.10 Apocal. 2.c.23 ende 22.b.12

6

^g Wie onderwesen wort met den woorde, die deyle alderley goet den ghenen die hem leert.

g Roman. 15.c.27 1.Corinth. 9.b.11

7

Laet v niet bedrieghen, God en wort niet bespot: ^h want wat de mensche sal ghesaeyt hebben, dat sal hy oock maeyen.

h Luce 16.c.25

8

Want wie ⁱ in zijn vleesch saeyt, die sal van den vleessche verderuinghe maeyen: maer wie inden Gheest saeyt, die sal vanden Gheest het eewighe leuen maeyen.

i Of, voor

9

^k Laet ons weldoende niet ^l vertraghen: want te syner tijt sullen wy maeyen sonder ^m ophouden.

k 2.Thess. 3.b.13

l Of, moede worden:

m Of, moede worden.

B.10

So dan, dewijle wy tijt hebben, laet ons goet doen aen eenen yeghelicken, ⁿ maer meest aen de huysghenooten des gheloofs.

n 1.Timoth. 5.a.8

11

Ghy siet hoedanigen brief ick v gheschreuen hebbe met myne hant.

12

Alle die willen teghenwoordelick na den vleessche behaghen, die bedwingen v besneden te worden, alleenlick om dat sy met den cruyce Christi niet en souden veruolcht worden.

13

Want oock sy die besneden worden, en houden de Wet niet: maer sy willen dat ghy besneden wort, om dat sy in uwen vleessche roemen souden.

14

Maer het zy verre van my, dat ick soude roemen, anders dan in het cruyce onses Heeren Iesu Christi, door het welcke de werelt my ghecruycicht is: ende ick der werelt.

15

^o Want in Christo Iesu en ghelt noch Besnijdinghe yet, noch Voorhuydt, maer de nieuwe ^p creatuere.

o Matth. 12.f.50 Ioannis 25.b.14 2.Corinth. 5.b.16 Galat. 5.a.6 Coloss. 3.b.12

p Of, scheppinghe.

16

Ende so vele alsser na desen reghel voortgaen, ouer dese [sal wesen] vrede ende barmherticheyt, ^q ende ouer den Israel Gods.

q Psalm. 125.a.5

17

Voort aen, niemant en make my moeyte, want ick draghe de teeckenen onses Heeren Iesu in mynen lichame.

18

De ghenade onses Heeren Iesu Christi, zy met uwen gheeste, broeders. Amen.

Tot de Galaten gheschreuen van Roomen.